Author: Amina Azizi

افغان ملي لوبډله د نړیوال جام په تکل؛ د ویسټ انډیز په لور وخوځېده


د افغانستان کرېکټ ملي لوبډله د امریکا او ویسټ انډیز په ګډ کوربتوب د سږني شل اوریز نړیوال جام لپاره ولاړه.

دا چې د افغانستان ټولې لوبې په ویسټ انډیز کې مهالوېش شوي نو ملي لوبغاړي هم وار د مخه د تمریناتو لپاره د یاد هېواد په لور روان شول.

یو شمېر هغه لوبغاړي چې دا مهال په ای پي آل کې لوبیږي د خپلو لوبډلو د لوبو تر پای ته رسېدو به په هند کې وي او له هغې وروسته به د نړیوال جام لپاره په تمریناتي کمپ کې له افغان لوبغاړو سره یو ځای شي.

سږنی شل اوریز نړیوال جام د جون په لومړۍ نېټه پیلیږي او تر ۲۹مې به دوام وکړي.

بل لور افغانستان په نړیوال جام کې ټولې څلور لوبې لري او په (C) ګروپ کې له نیوزیلنډ، ویسټ انډیز، یوګانډا او پاپوا نیوګینې سره لوبیږي.

د افغانستان لومړنۍ لوبه د جون په درېیمه له یوګانډا، دویمه لوبه د جون په اوومه له نیوزیلنډ، درېیمه لوبه د جون په ۱۳مه له پاپوا نیوګیني او څلورمه لوبه له ویسټ انډیز سره د جون په ۱۷مه ده.

د کابل پریمیر لیګ سیالۍ او د لوبغاړو د بولي مراسم

د کابل پریمیر لیګ د دویم پړاو لپاره د لوبغاړو د بولۍ یا ډرافټ مراسم ترسره شول.

په دغه لیګ کې «کابل زلمي، کابل نایټ رایډرز، سپین غر واریرز، شاهین هېنټرز، شمشاد ایګلز او بند امیر لوبډلې لوبیږي، چې هرې لوبډلې د ډرافټ په مراسمو کې په بېلابېلو کټګوریو کې د لوبغاړو په اخیستو خپلې لوبډلې پوره کړي.

د کابل پریمیر لیګ دویم پړاو لپاره د ملي لوبډلې، نولس کلنو ملي لوبډلې او د کورني کرېکټ ۷۰۰ لوبغاړو نوملیکنه کړې وه. چې پرون د مختلفو لوبډلو په نوملړ کې یو ځای شول.

د یاد لیګ سیالۍ به د جون په څلورمه پیل او تر ۱۴مې به دوام وکړي.

د کابل پریمیر لیګ لومړنی پړاو تېر ۲۰۲۳ کال د جولای له ۲۴مې د اګسټ تر دویمې په کابل کې ترسره شوی وو چې په پای لوبه کې یې شاهین هېنټرز د کابل زلمي لوبډلې ته په ماتې ورکولو سره د کابل پریمیر لیګ لومړنۍ اتلولي وګټله.

سریلانکا او سکاټلینډ ښځینه نړیوال جام ته لار ومونده

د ښځو شل اووریز نړیوال جام او له غواروي پړاو د دوو لوبډلو لارموندنه

د ښځو د کرېکټ شل اوریز نړیوال جام لپاره چې سږکال د بنګله دېش په کوربتوب د اکټوبر له ۳مې تر ۲۰مې نېټې ترسره کیږي، په غوراوي پړاو کې دوه لوبډلې بریالۍ شوې.

د غوراوي پړاو په نیمه پای لوبه کې چې په متحده عربي اماراتو کې ترسره شوه، د سریلانکا د ښځو لوبډلې اماراتو ته او د سکاټلېنډ د ښځو لوبډلې ایرېلنډ ته په ماتې ورکولو نړیوال جام کې خپل ګډون یقیني کړ.

د سریلانکا او سکاټلېنډ د ښځو لوبډلې به سبا سه شنبه د غوراوي پړاو پای لوبه ولوبوي، خو دواړو لوبډلو نړیوال جام ته لار پیدا کړې.

د ښځو د شل اووریز نړیوال جام لوبډلې په دوو ګروپونو وېشل شوي دي. چې په هر ګروپ کې به پنځه-پنځه لوبډلې د یو بل پر وړاندې ولوبیږي.

د سکاټلېنډ د ښځو لوبډلې د لومړي ځل لپاره دغې نړیوال جام ته لار پیدا کړې او د کرېکټ د نړۍ له مخکښو ښځینه لوبډلو سره به سیالي کوي.

په ټوله کې تر دې دمه د ښځو اته شل اووریز نړیوال جامونه ترسره شوي چې شپږ اتلولۍ اسټرالیا، یوه انګلېنډ او یوه ویسټ انډیز ګټلې ده.

د ښځو لومړنی شل اووریز نړیوال جام په ۲۰۰۹ کال کې ترسره شوی وو چې اتلولي یې د انګلېنډ ښځینه لوبډلې ګټلې وه.

په هر حال، په سږني شل اووریز جام کې د هند، اسټرالیا، نیوزیلنډ، پاکستان، سریلانکا، سویلي افریقا، انګلېنډ وېسټ انډیز، بنګله دېش او سکاټلېنډ ښځینه لوبډلې لوبیږي.

ګلبدین نایب د اې پي ایل لپاره هند هیواد ته رسیدلی

د بل افغان لوبغاړي د بخت ستوری هم ای پي اېل کې وځلېد

ډهلي کاپیټلز لوبډلې د افغانستان د ملي لوبډلې وتلی الراونډر او پخواني لوبډلمشر ګلبدین نایب سره د تړون رسماً اعلان وکړ. یادې لوبډلې په خپل اېکس پاڼه لیکلي “د افغانستان پیاوړی لوبغاړی اوس د ډهلي کاپیټلز برخه دی. نایب ته د ټپي شوي استرالیايي لوبغاړي مېچل مارش د بدیل لوبغاړی په حیث هرکلی وایو.”

ګلبدین هم پرون له کابل هوایي ډګر څخه په خپلو رسمي پاڼو لیکلي وو “هند ته روان یم چې په ای پي ایل کې برخه واخلم. دا مې هیله وه چې په دغه ستر لیګ کې ګډون وکړم، زده کړې او ښو لوبو ته سترګې په لار یم.”

ګلبدین نایب له کابل هوایي ډګر څخه هند ته د تګ پر مهال

دا په داسې حال کې ده چې د ډهلي لوبډلې اسټرالیایی الراونډر مېچل مارش ټپي شوی او نوموړی د درملنې لپاره د اسټرالیا کرېکټ بورډ له خوا خپل هېواد ته غوښتل شوی دی.

ګلبدین نایب د هند پر وړاندې د وروستۍ شل اوریزې لوبلړۍ په دوو لوبو ښه ځلېدلی وو، ځکه یې د ای پي اېل لوبډلو او هندي مینه والو پام ځان ته را اړولی دی.

په دې سره ګلبدین نایب په ټوله کې یوولسم افغان لوبغاړی دی چې په هندي لیګ کې پیرل کیږي، او په سږني ای پي اېل کې نهم افغان لوبغاړی دی چې ګډون کوي. دا لمړی وار دی چې ډهلي لوبډله یو افغان لوبغاړی له ځان سره کوي.

سږکال په ګجرات ټایټنز لوبډله کې درې افغان لوبغاړي، کلکتې کې دوه، سنرایزرز حیدراباد، ممبۍ انډینز، لکنو سوپر جاینټز او ډهلي کیپټلز کې یو-یو افغان لوبغاړی لوبیږي.


تر دې وړاندې ظاهر خان هم په ۲۰۱۸ کال کې راجستان لوبډلې له ځان سره کړی وو خو په رسمي لوبو کې د ټپونو له وجې ګډون ونه شو کړای. مجیب ځدراڼ هم د ای پي اېل په څو پړاوونو کې لوبېدلی.

په همدې حال کې ای پي اېل درېیم سوداګریز لیګ دی چې ګلبدین نایب به په کې ولوبیږي.
نایب تر دې وړاندې د افغانستان پریمیر لیګ ها خوا د بنګله دېش پریمیر لیګ او د متحده عربي اماراتو لس اوریز کرېکټ لیګ کې له بېلابېلو لوبډلو سره لوبېدلی.

سونیل نراین په شل اوریز نړیوال جام کې د ګډون غوښتنې رد کړې


سونیل نراین په راتلونکي شل اوریز نړیوال جام کې د ګډون لپاره د خپلو لوبغاړو او مینوالو غوښتنې رد کړې

د ویسټ انډیز تقاعد شوي الراونډر سونیل نراین په راتلونکي شل اوریز نړیوال جام کې خپل نه ګډون تایید کړ.

نراین چې دا مهال په ای پي اېل کې د ګوتم ګمبیر تر روزنې لاندې په کلکتې لوبډله کې لوبیږي او په دې وروستیو کې د پیلیز لوبغاړي په توګه هم لوبې ته راوځي، خورا ښه ځلېدلی او تېرو څو سیالیو کې یې یوه سلیزه هم جوړه کړه.

د نراین د ښې کارکردګۍ په درشل کې د نوموړي مینه وال، کرېکټ شننونکي او په ځانګړې توګه د ویسټ انډیز متقاعد لوبغاړي او لوبډلمشر رومن پاول له نراین غوښتي چې خپل تقاعد بېرته واخلي او د هېواد لپاره یې په راتلونکي شل اوریز نړیوال جام کې ولوبیږي.

خو تازه نراین د دې ټولو غوښتنو په ځواب کې په خپل انسټګرام کې داسې لیکلي چې: «خوشاله او منندویه یم چې په دې وروستیو کې زما د ښې کارکردګۍ له امله ډېری خلک ما بېرته راتګ او تقاعد اخیستو ته هڅوي او غواړي په نړیوال جام کې ولوبېږم. خو ما په خپله خوښه د تقاعد پرېکړه کړې، نه غواړم څوک له ځان خفه کړم، دا دروازه اوس د ځان لپاره تړلې بولم خو زه د ټولو هغو ملګرو ملاتړ کوم چې د جون په میاشت کې د وېسټ انډیز لپاره میدان ته ښکته کیږي. هغه ځوانان چې په تېرو څو میاشتو کې یې سخت کار کړی.»

ویسټ انډیزی الروانډر سونیا نراین له ۲۰۱۹ کال راهیسې د خپل هېواد لپاره نه دی لوبېدلی او د ۲۰۲۳ کال په نومبر کې یې له نړیوال کرېکټ تقاعد اعلان کړ خو ډېری ویسټ انډیزي لوبغاړي له نږدې ۱۲ میاشتو راهیسې په دې هڅه کې دي چې نراین د خپل تقاعد له پرېکړې را وګرځوي.

د اې پي اېل په سږني پړاو کې نه ماتېدونکي ریکارډونه

د نړۍ تر ټولو ستر او معتبر کرېکټ لیګ ای پي اېل په سږني پړاو کې لوبغاړو په ځانګړې توګه د سنرایزرز حیدراباد توپ وهوونکو په خپلې بریدګرې توپ وهنې سره د داسې ریکارډونو بنسټ کېښود چې په هېڅ سوداګریز لیګ کې نه وو تکرار شوي او یا یې تکرار شوي ریکارډونه مات کړل.

سږکال د لومړي ځل لپاره حیدراباد په ای پي اېل کې د ممبۍ پر وړاندې د ۲۷۷ منډو لومړنی لوړ هدف جوړ کړ چې په دې سره یې په ۲۰۱۳ کال کې په ای پي اېل کې د رویل چلېنجرز بنګلور د ۲۶۲ منډو د لوړ هدف ریکارډ مات کړ.

یادې لوبډلې د ای پي اېل په دوام کې په یوه بله بربدګره لوبه کې د رویل چلېنجرز بنګلور پر وړاندې د ۲۸۷ منډو ستر هدف جوړ کړ چې په ورته وخت تراوسه په هېڅ کوم سوداګریز لیګ یا شل اوریز کرېکټ کې دومره ستر هدف نه دی جوړ شوی.

او په همدې حال کې یې له ډهلي کپیټلز سره په خپله بله لوبه کې په پاور پلی یا پیلیزو شپږو اورونو کې د نړۍ په فرنچائز یا سوداګریزو لیګونو او شل اوریز کرېکټ کې بل نوی ریکارډ ثبت کړ.

حېدراباد د ټراوېس هېډ او ابشېک شرما د بریدګرې توپ وهنې پر مټ په پاور پلی کې ۱۲۵ منډې جوړې کړې چې دغه رقم تراوسه په هېڅ فرنچائز لیګ او شل اوریز کرېکټ کې نه دی ترسره شوی. او په ای پي اېل کې هم د وروستي ځل لپاره د کلکتې لوبډلې په ۲۰۱۷ کال کې د بنګلور پر وړاندې په پاور پلی کې ۱۰۵ منډې جوړې کړې وې.

بل لور په پاور پلی کې د ټراوېس هېډ ۸۴ منډې جوړول د ای پي اېل په تاریخ کې په پیلیزو شپږو اورونو کې دویمې سترې منډې دي، تر دې وړاندې په ۲۰۱۴ کال کې سورېش رینا د پنجاب کېنګز پر وړاندې ۸۷ منډې کړې وې.

په همدې حال کې د ډهلي پر وړاندې لوبه کې د سنرایزرز حېدراباد پیلیزو توپ وهوونکو په پاور پلی کې ۲۴ بونډریانې ترسره کړې چې دا د نارینو په شل اوریز کرېکټ کې تر ټولو ډېرې بونډریانې دي او په دې سره یې په ۲۰۱۴ کال کې د ساسېکس پر وړاندې په پاورپلی کې د سریلانکا د ۲۰ بونډریانو ریکارډ مات کړ.

سنرایزرز حیدراباد په یو بل ریکارډ کې له لسو اورونو په کمو هغو کې ۱۵۸ منډې جوړې کړې چې په دې سره یې په شل اوریز کرېکټ کې له لسو په کمو اورونو کې د ۱۵۰ منډو ریکارډ مات کړ.

او بل لور تر دې دمه په ای پي اېل کې تر ټولو ستره ملګرتیا د کوینټن ډيکاک او کېل راهول ترمنځ وه چې د چنای سوپر کېنګز پر وړاندې یې ۱۳۴ منډې جوړې کړې خو دا چې سږکال به دا ریکارډ د کومې لوبډلې لوبغاړي ماتوي په راتلونکو لوبو کې به ولیدل شي.

لوبغاړي؛ بورډ توپیري چلند کوی. بورډ؛ دوي کارکردګي نلري

ځوان لوبغاړو شفیق الله غفاري او ذهیب زمانخېل د لندن پر لور هېواد پرېښود

له هېواده د ځوانو کورنیو لوبغاړو د وتلو په لړۍ کې تازه د کورني کرېکټ بل لوبغاړي ذهیب زمانخېل هم د لندن پر لور له وطن سره مخه ښه وکړه.

نوموړي څه موده وړاندې په وطن کې له کرېکټ کولو استعفا وړاندې کړې وه خو کوم کره لامل یې نه وو په ډاګه کړی.

تر دې وړاندې د شفیق الله غفاري په نوم د کورني کرېکټ لوبغاړي هم وطن پرېښود او په لندن کې یې له یو کرېکټ کلب سره د تړون له مخې خپل کرېکټ ته په یاد هېواد کې دوام ورکړ.

له هېواده د ځوانو لوبغاړو د وتلو په دوام کې کرېکټ بورډ ای سي ای ته په دې اړه وویل چې یادو لوبغاړو په کورني کرېکټ کې پرفامنس نه دی کړی او د کورني یا ډومسټېک کرېکټ تړونونه نه لري او په وروستیو کې له هېواده بهر په سیالیو بوخت وو.

خو په ورته مهال لوبغاړي بیا د کرېکټ بورډ دا څرګندونې ردوي او ای سي ای ته زیاتوي چې همدا اوس هم داسې لوبغاړو ته موقع ورکول کیږي چې هېڅ کورنی کرېکټ یې نه دی کړی، حتی داسې لوبغاړي شته چې د قوش تپې په ملي سیالیو کې د لوبېدو فرصت ورکړل شوی، خو له موږ سره توپیري چلند کوي.

په همدې حال کې له هېواده تازه وتلي ځوان لوبغاړي شفیق الله غفاري د کرېکټ شننونکي او خبریال جعفر هاند پر تازنۍ لیکنې په تبصره کې په ګیله من اندازه داسې لیکلي: «په کومه خاوره چې د وړتیا پرځای روابطو ته لومړیتوب ورکول کېږي نو وړتیا حقداره ده چې خپل ځان ته هرځای کې ښه او مناسب مقام پیدا کړي.»

دا لومړی ځل نه دی چې د کورني کرېکټ ځوان لوبغاړي دوی د موقع نه ورکولو له امله له کرېکټ بورډ ورته شکایت کوي. په ورته وخت کې کرېکټ بورډ هم د لوبغاړو لخوا د اصولو او شرایطو نه مراعطولو یادونه کوي او لوبغاړو ته د بهرنیو کلبونو او لیګونو نسبت، کورني کرېکټ ته د لمړیتوب سپارښتنه کوي تر څو دوي په کورني ملي لیګونو کې د کورني کرزکټ د کارکردګۍ پر بنیاد انتخاب شي.

د افغانستان سره د اسټرالیا د لوبلړۍ د ځنډولو په اړه د راشد خان تازه څرګندونې

له افغانستان سره د اسټرالیا د لوبلړۍ د ځنډولو او بېګ باش کې د ګډون په اړه د راشد خان تازه څرګندونې

افغانستان سره د اسټرالیا د شل اوریزې لوبلړۍ د ځنډولو په غبرګون کې راشد خان وایي د اسټرالیا دې پرېکړې خورا ځورولی او له امله به یې د بېګ باش راتلونکي پړاو کې پر خپل ګډون غور وکړي.

راشد خان په دې اړه له کرېک انفو سره په تازه مرکه کې ویلي، که چېرې یو څه د حکومت په لاس کې وي نو بیا ولې باید تر کرېکټ ورسیږي او کرېکټ زیانمن شي، آیا کرېکټ دا ستونزې حلولی شي؟ که حلولی یې شي بیا زه هم پرې خوښ یم.

راشد خان د اسټرالیا کرېکټ بورډ ته په اشاره سره وایي: «تاسې نه غواړئ زما د هېواد له لوبډلې سره ولوبېږئ، خو برعکس ما په بېګ باش کې غواړئ، دا څه توپیر لري؟ دا په دې معنا ده چې زه خپل لوبغاړي او هېواد کم راوړم؟ چې نه غواړئ زما له لوبډلې سره ولوبېږئ نو بیا خو زه هم ستاسو هېواد کې د لوبېدو اجازه نه لرم.»

نوموړي د اسټرالیا د پرېکړې په اړه په خپلو خبرو کې وړاندې زیاته کړې، دا دردونکې ده چې غواړې له لویو لوبډلو سره لوبې وکړې څو کرېکټ مو نور هم پرمختګ وکړي خو پرته په نړیوال جام کې د نورو دوه اړخیزو لوبو کولو فرصت ونه لرې.

راشد همدارنګه له هند سره د افغانستان د تېرې لوبلړۍ یادونه هم وکړه او ویې ویل: «موږ له هند سره لوبې وکړې چې له هغو لوبو په یوې کې یې افغان لوبډلې د ۲۱۲ منډو هدف په تعقیب ۲۰۰ منډې وکړې، فکر وکړئ که موږ دا لوبې نه وی کړی پر ځان باور به مو له کومه کاوه؟ له لویو لوبډلو سره لوبې کول زموږ لپاره لویه خبره ده.»

ښاغلي خان ټینګار کړی، کرېکټ یوازنۍ سرچینه ده چې په افغانستان کې د خلکو کورونو ته خوښۍ راوړي او که دا خوښي هم له خلکو اخلئ نو تاسو خلکو ته لا ډېر زیان رسوئ.

دا په داسې حال کې ده چې د اسټرالیا کرېکټ بورډ د تېر په څېر یو ځل بیا په مارچ میاشت کې له افغانستان سره په اګسټ کې ترسره کېدونکې شل اوریزه لوبلړۍ وځنډوله چې یاد بورډ یې عمده لامل په افغانستان کې د ښځو او نجونو اوسنی وضعیت او په نړۍ کې د ښځینه وو د کرېکټ وده په ګوته کړې وه.

د اسټرالیا کرېکټ بورډ د دغې پرېکړې پر وړاندې لا هم غبرګونونه دوام لري.

د محمد نبي د خیریه کارونو دوام؛ په کابل کې یې نوې پانګونه وکړه

د هېواد ملي لوبډلې پیاوړي لوبغاړي محمد نبي دا ځل د هېواد د پلازمېنې په لویدیځ کې د ادې روغتون نوې څانګه کې پانګونه کوې.

محمد نبي هم په دې اړه په خپله فېسبوک پاڼه خبر ورکړی چې په یو شمېر غوښتنو یې د کابل د لویدیځې برخې هېوادوالو ته هم د ادې روغتون څانګه پرانیسته چې په کې به معیاري روغتیایي خدمات وړاندې کیږي.

نوموړي په دې اړه له آی سي آی سره په خبرو کې وویل چې د ادې روغتون د نوې څانګې یوازې په یو څو برخو کې یې پانګونه کړې.

دا په داسې حال کې ده چې د محمد نبي په نوښت ادې روغتون تېر کال د ماشومانو د زیږون، د مور او روغتیا او نسایي ولادي څانګو په لرلو سره خپل فعالیت د کابل په زړه کې پیل کړ.

محمد نبي نه یوازې په کرېکټ بلکې تر ډېره په هېواد کې په خیریه چارو کې هم فعال دی.

د ښاغلي عیسی خېل دا اقدام د هېواد والو له خوا له پراخ او تاوده هرکلي سره مخ شوی.

نوموړي همدارنګه تېر کال ژمنه کړې وه چې په کابل کې به د تلسیمیا ناروغانو لپاره هم یو ځانګړی روغتون جوړ کړي خو تراوسه یې د یاد روغتون لپاره کوم تازه اقدام نه دی کړی.

د حیدر اباد د سترو منډو ریکارډ او د بنګلور ۵مه پرلپسې ماتې

سنرایزرز حیدر اباد د ۲۸۷ منډو په کولو سره خپل د سترو منډو هدف مات او نوی ریکارډ جوړ کړ.

د ای پي اېل سیالیو په لړ کې سنرایزرز حیدرآباد او رویل چلېنجرز بنګلور لوبډلو په خپله لوبه کې د یو بل پر وړاندې په زړه پورې مقابله وکړه.

د دې لوبې پچه چې بنګلور وګټله او په خپله خوښه یې حیدرآباد ته د توپ وهنې بلنه ورکړه، یاده پرېکړه ورته ډېره ګرانه تمامه شوه.

د حیدرآباد توپ وهوونکي دا ځل بیا د چټکې توپ وهنې په موډ کې وو او د بنګلور توپ اچوونکي یې سر پورته کولو ته پرېنښودل.

حیدرآباد د ټراوېس هېډ په ۱۰۲، هېنرېک کلاسن ۶۷، عبدالصمد ۳۷، ابشېک شرما ۳۴ او ادېن مارکرم د ۳۲ منډو پر مټ په بنګلور لوبډلې د ای پي اېل ترټولو سترې ۲۸۷ منډې جوړې کړې.

دا د ای پي اېل په تاریخ کې د سنرایزرز حیدراباد لخوا تر ټولو ستر نه ماتېدونکی هدف دی.
تر دې وړاندې یې په سږني ای پي اېل کې پر ممبۍ لوبډلې ۲۷۷ سترې منډې جوړې کړې وې.

د بنګلور توپ اچوونکو ونه شول کولی د حیدراباد د بریدګرې توپوهنې مخه ونیسي او یوازې درې لوبغاړي یې له مخې لېرې کړل.

بل پلو د بنګلور توپ وهوونکو هم د خپلې توپ وهنې په پاڼۍ کې تر خپلې وسې په زړه پورې مقابله وکړه او د هدف د ترلاسه کولو لپاره څه ناڅه ور نږدې شوي وو خو په اخیر کې د ۲۵ منډو په توپیر پاتې راغلل.

بنګلور په ټولو شل اورونو کې د ۷ لوبغاړو په زیان سره د دېنېش کارتېک ۸۳، فاف ډو پلېسیس ۶۲، ویرات کوهلي د ۴۲ او انوج راوت ۲۵ منډو پر مټ یوازې ۲۶۲ منډې جوړې کړې.

دا په داسې حال کې ده چې د ای پي اېل تر ټولو ستر هدف هم د لومړي ځل لپاره په ۲۰۱۳ کال کې د رویل چلېنجرز لوبډلې جوړ کړی وو.