د کرېکټ نړیوالې شورا په روان شل اوریز نړیوال جام کې د هر پړاو لوبډلو لپاره ورکول کېدونکي نغدي امتیازات په ډاګه کړل.

په ټوله کې سږکال د نړیوال جام ګډون کوونکو لوبډلو ته ورکول کېدونکی امتیاز ۱۱.۲۵ میلیونه ډالر ټاکل شوی دی چې له دې جملې ۲.۴۵ میلیونه ډالر د اتلولۍ ګټوونکې لوبډلې ته او ۱.۲۸ میلیونه ډالر د نیمه اتلولۍ ګټوونکې یا دویم مقام لوبډلې ته ورکول کیږي.

په ورته مهال هرې ګډون والې لوبډلې ته به د ټولو لوبو ۲ لکه ۲۵ زره ډالر ورکول کیږي ان که ټولې لوبې هم وبایلې.

له دې ور ها خوا د اتو او څلورو غوره لوبډلو په پړاو کې هم د لوبډلو لپاره جلا امتیازات په نظر کې نیول شوي دي.

هغه لوبډلې چې د اتو غوره لوبډلو یا سوپر اېټ پړاو کې پاتې راځي هرې یوې ته به یې ۳ لکه ۸۲ زره ۵۰۰ ډالر ورکول کیږي.
او هغه لوبډلې چې د څلور غوره لوبډلو پړاو یا نیمه پای لوبې ته لار پیدا کوي هرې یوې ته به یې ۷ لکه ۸۷ زره ۵۰۰ ډالر ورکول کیږي.
یادې ټولې هغه لوبډلې دي چې د نړیوال جام په نوملړ کې تر اتو مقامونو راځي.

بل لور د نورو مقامونو لوبډلو ته هم ځینې جلا امتیازات ورکول کیږي لکه له اتو مقامونو وروسته لوبډلو ته چې له نهم تر دولسم مقام پورې راځي هره یوه به ۲ لکه ۴۷ زره ۵۰۰ ډالر ترلاسه کوي.
او له ۱۳م تر تر شلم مقام پورې لوبډلې به ۲ لکه ۲۵ زره ډالر ترلاسه کوي.

په همدې حال کې په روان نړیوال جام کې به په ټوله کې د هرې لوبې ګټوونکې لوبډلې ته د بریا په سر ۳۱ زره ۱۵۴ ډالر ورکول کیږي.

دا په داسې حال کې ده چې دا د کرېکټ نړیوالې شورا په تاریخ کې ترټولو ستر شل اووریز نړیوال جام دی.

په دې جام کې د ګډون والو لوبډلو د زیات شمېر ترڅنګ په لویه کچه امتیازات هم ټاکل شوي، تر دې وړاندې په نړیوالو جامونو کې دومره لوی نغدي امتیازات نه وو ورکړل شوي.

هم مهاله په روان نړیوال جام کې ټولې ۵۰ لوبې د ۲۸ ورځو په اوږدو کې د امریکا او ویسټ انډیز په ګډ کوربتوب په نهو بېلابېلو لوبغالو کې ترسره کیږي.

 

ټاکل شوې راشد خان په سږني شل اوریز نړیوال جام کې د افغان لوبډلې مشري وکړي.

نوموړي په خپلې وروستۍ مرکه او د نړیوالې شورا خبري کنفرانس کې د لوبغاړو د چمتووالي او لوبو ګټلو ته د کلک هوډ په اړه یو لړ څرګندونې وکړې.

راشد خان باوري دی چې د لوبغالو ویشتنځای د افغان لوبډلې سپېنرانو ته جوړ دی، د هغه په باور څو لوبغاړو په کارابېین لیګ سیالیو کې ګډون کړی او د دغه ځای له هوا او ویشتنځای سره بلد دي نو کولی شي د مخالفو لوبغاړو لپاره لوبه کول سخت کړي.

ښاغلي خان د کرېکټ نړیوالې شورا له لوري په خبري کنفرانس کې زیاته کړې، چې زموږ لپاره مهمه لومړنۍ لوبه ده چې څه رنګ یې کولی شو ځکه په وینا یې په شل اوریز کرېکټ کې د لوبې تر وروستۍ شېبې بایلل او ګټل معلوم نه وي، ښایي کمزورې لوبډله پر پیاوړې غالبه شي.

بل لور راشد خان له کرېک انفو سره په مرکه کې ویلي، چې د اتو غوره لوبډلو پړاو ته د وتلو لپاره د لوبغاړو ترمنځ پر ځان باور وجود لري.
موږ مخکې هم څو ځل په شل اوریز فارمټ کې ویسټ انډیز مات کړی، په یو ورځنۍ لوبو کې مو هم مات کړی او تر ټولو مهمه دا ده چې زموږ څو لوبغاړي د ای پي اېل سږني پړاو کې ولوبېدل چې دا د نړیوال جام لپاره ښه چمتووالی وو.

خان هیله لري چې افغان لوبډله همغه پر ځان باور ولري لکه په هند کې یې چې په یو ورځني نړیوال جام کې درلود.

راشد خان ټینګار کوي چې زموږ لپاره مهم څه دا دي چې موږ په کوم ذهنیت میدان ته ځو، که موږ دا باور لرو چې کولی شو نیوزیلنډ مات کړو، یا ویسټ انډیز مات کړو، نو کله چې دا باور رامنځته شو بیا کولی شئ هره لوبډله ماته کړئ او دا همغه باور وو چې موږ په هند کې په تېر نړیوال جام کې درلود.

د افغانستان او افغانانو ویاړ او په شل اووریز نړیوال جام کې افغان لوبدلمشر راشد خان د لوبغاړو د چمتووالي خبره هم هېره نه کړه.

خان د نړیوالې شورا د خبري کنفرانس پر مهال د خبریال د پوښتنې په ځواب کې چې لوبغاړي له ګرمۍ سره څنګه دي؟ وویل د دې لپاره چې له ګرمۍ سره بلد شو موږ دووه اوونۍ وړاندې دلته راغلو.

نوموړي همدارنګه خپل مینه وال هم هېر نه کړل او ویې ویل چې زموږ لوبې وختي دي او کله چې مو مینه وال د سهار لمونځ لپاره راپاڅیږي موږ ته به هم دعاوې کوي.

ښاغلي خان په وروستیو ټکو کې د تل په څېر یاده کړه چې موخه یې افغانستان ته خوشالي راوړل دي او له مینه والو یې د بریاوو لپاره د دعاوو هیله وکړه.

 

افغانستان او سکاټلېنډ له نړیوال جام د مخه د وار مپ یا تمریناتي سیالیو په لړ کې د هېواد پر وخت بېګا شپه اووه بجې د سیالۍ ډګر ته ښکته شول.

د لوبې پچه افغانستان ګټلې وه او لوبډلمشر لومړی د توپ وهنې پرېکړه وکړه.

افغانستان د معمول په څېر ډېری لوبې د پچې د ګټلو په صورت کې د توپ وهنې پر پرېکړې ګټلي او ښایي په نړیوال جام کې هم تر ډېره دغه تخنیک وکاروي.

په همدې حال کې افغان لوبډلې په ټولو شل اورونو کې د اتو لوبغاړو په زیان سیالې لوبډلې ته ۱۷۸ منډې هدف ورکړ.

په دغه لوبه کې نوي څه له ګربز سره د پیل لوبې لپاره د ګلبدین نایب را ایستل وو چې په ورته وخت ګټور هم تمام شو. نوموړي ۶۹ چټکې منډې وکړې او توپ اچوونه کې یې یو وېکټ واخیسته.

په خواله رسنیو هم د مینه والو له لوري د پیلیز لوبغاړي په توګه د ګلبدین نایب لوبولو پرېکړه له هرکلي سره مخ شوې او ډېری په دې باور دي چې که نایب نړیوال جام کې هم پر همدې ځای را وایستل شي ممکن همداسې خوندوره لوبه وکړي.

د تېرو پیلیزو لوبغاړو لکه ګربز او ابراهیم ځدراڼ د لوبې مزه نه وه او د مسوولیت سره سمه توپ وهنه یې ونه شوه کړی.
ګربز په اتو او ابراهیم په نهو منډو وسوځېد.

بل لور له ګلبدین وروسته عظمت الله عمرزي هم ثابته کړه چې د پام او حساب وړ الراونډر دی.
نوموړي د خپلو تېرو لوبو په څېر هم وکولی شول ښه توپ وهنه او توپ اچوونه وکړي.
په توپ وهنه کې یې ۴۸ منډې جوړې کړې او توپ اچوونه کې یې د ۲۶ منډو په ورکولو یو لوبغاړی وسوځاوه.

افغان لوبغاړو د سکاټلېنډ پر وړاندې له ټاکلي هدف ښه دفاع وکړه او سیالې لوبډلې د نهه لوبغاړو په له لاسه ورکولو په شلو اوورونو کې ټولې ۱۲۹ منډې وکړې.

په ورته وخت په دغه لوبه کې د افغان لوبډلې قوي نقطه د تل په څېر بیا هم غوره توپ اچوونه وه.
افغان لوبډلې د غوره توپ اچوونې د نندارې په وړاندې کولو سره په نړیوال جام کې د خپل ګروپ لوبډلو ته ور وښوده چې د دوی له جادویي توپ سره احتیاط وکړي.

په ټوله کې هره لوبډله له افغانستان سره د مخامخ کېدو پر مهال د توپ وهنې په پرتله یې له توپ اچوونې ډار لري.

په دې لوبه کې د افغانستان توپ وهنې او توپ اچوونې ته په کتو افغان لوبغاړي د نړیوال جام سیالیو ته تر ډېره چمتو برېښي.
د ګلبدین نایب او عمرزي بېرته قوي راګرځېدل ښیي چې افغانستان د توپ وهنې له اړخه هم پوره چمتو دی او که راتلونکو سیالیو کې پیلیز لوبغاړي ښه لوبه وکړي نو د نړیوال جام غوره او لوړ هدف ورکولی شي.

او هم مهاله د افغان لوبغاړو مخکښه توپ اچوونه په ځانګړې توګه د افغانستان د ګروپ لوبډلو لپاره له وړاندې د خطر زنګ دی.

 

د هند غوره لیګ یا ای پي اېل سیالۍ بلاخره له دوه میاشتني دوام سره نن پای ته رسیږي.

د ای پي اېل سږنی پړاو د مارچ په ۲۲مه د چنای سوپر کېنګز او رویل چلېنجرز بنګلور په مخامخ کېدو پیل شوی وو او نن د می ۲۶مه د کلکته نایټ رایډرز او سنرایزرز حیدرآباد په سیالۍ پای ته رسیږي.

د هند غوره لیګ پای لوبه نن ماښام د دغه هېواد په چنای ښار کې ترسره کیږي.

نننۍ لوبې ته د لوبغاړو، مینه والو او حتی رسنیو هیجان ډېر دی. ځکه دواړه پیاوړې او د جوړښت له مخې متوازنې لوبډلې د سیالۍ ډګر ته ښکته کیږي.

بل لور په دواړو لوبډلو کې افغان لوبغاړي شته.
په حیدراباد کې فضل الحق فاروقي چې تراوسه هم د لوبېدو چانس ور نه کړل شو او په کلکتې کې رحمن الله ګربز او الله محمد غضنفر دي چې ښایي یوازې ګربز ولوبول شي.

 

په ټوله کې دواړه لوبډلې د ای پي اېل اتلې پاتې شوې دي.
کلکتې په ۲۰۱۲ او ۲۰۱۴ کلونو کې د ای پي اېل اتلولي ګټلې، درې ځلې نیمه پای لوبې او دوه ځلې پای لوبې ته وتلې ده.

په ورته مهال حیدرآباد بیا تر دې دمه یو ځل اتلولي ګټلې، په ۲۰۱۶ کال کې یې په پای لوبه کې بنګلور ته په ماتې ورکولو سره د لومړي ځل لپاره د ای پي اېل اتلولي وګټله.
دغه لوبډله شپږ ځلې نیمه پای لوبې او یو ځل پای ته وتلې چې په ۲۰۱۸ کال کې یې له چنای په پای لوبه کې ماتې وخوړه او اتلولي یې له لاسه ورکړه.

سږکال حیدراباد لوبډلې په ای پي اېل او شل اوریز کرېکټ کې تاریخي ریکارډونه جوړ کړي او له همدې امله اټکل کیږي چې یاده لوبډله به نن ماښام هم ښه مبارزه وکړي.

بل لور بیا په خواله رسنیو کې ښکاري چې د ای پي اېل افغان مینه وال تر ډېره د کلکتې په لور دي، په دغه لوبډله کې د ګربز د لوبېدو له امله غواړي اتلولي هم د ګربز اړوند لوبډله یعنې کلکته وګټي.

خو نن ماښام به ولیدل شي چې کومه لوبډله د ای پي اېل سږنۍ اتلولۍ په ګټلو برلاسې کیږي.

د افغانستان کرېکټ ملي لوبډله د امریکا او ویسټ انډیز په ګډ کوربتوب د سږني شل اوریز نړیوال جام لپاره ولاړه.

دا چې د افغانستان ټولې لوبې په ویسټ انډیز کې مهالوېش شوي نو ملي لوبغاړي هم وار د مخه د تمریناتو لپاره د یاد هېواد په لور روان شول.

یو شمېر هغه لوبغاړي چې دا مهال په ای پي آل کې لوبیږي د خپلو لوبډلو د لوبو تر پای ته رسېدو به په هند کې وي او له هغې وروسته به د نړیوال جام لپاره په تمریناتي کمپ کې له افغان لوبغاړو سره یو ځای شي.

سږنی شل اوریز نړیوال جام د جون په لومړۍ نېټه پیلیږي او تر ۲۹مې به دوام وکړي.

بل لور افغانستان په نړیوال جام کې ټولې څلور لوبې لري او په (C) ګروپ کې له نیوزیلنډ، ویسټ انډیز، یوګانډا او پاپوا نیوګینې سره لوبیږي.

د افغانستان لومړنۍ لوبه د جون په درېیمه له یوګانډا، دویمه لوبه د جون په اوومه له نیوزیلنډ، درېیمه لوبه د جون په ۱۳مه له پاپوا نیوګیني او څلورمه لوبه له ویسټ انډیز سره د جون په ۱۷مه ده.

د بل افغان لوبغاړي د بخت ستوری هم ای پي اېل کې وځلېد

ډهلي کاپیټلز لوبډلې د افغانستان د ملي لوبډلې وتلی الراونډر او پخواني لوبډلمشر ګلبدین نایب سره د تړون رسماً اعلان وکړ. یادې لوبډلې په خپل اېکس پاڼه لیکلي “د افغانستان پیاوړی لوبغاړی اوس د ډهلي کاپیټلز برخه دی. نایب ته د ټپي شوي استرالیايي لوبغاړي مېچل مارش د بدیل لوبغاړی په حیث هرکلی وایو.”

ګلبدین هم پرون له کابل هوایي ډګر څخه په خپلو رسمي پاڼو لیکلي وو “هند ته روان یم چې په ای پي ایل کې برخه واخلم. دا مې هیله وه چې په دغه ستر لیګ کې ګډون وکړم، زده کړې او ښو لوبو ته سترګې په لار یم.”

دا په داسې حال کې ده چې د ډهلي لوبډلې اسټرالیایی الراونډر مېچل مارش ټپي شوی او نوموړی د درملنې لپاره د اسټرالیا کرېکټ بورډ له خوا خپل هېواد ته غوښتل شوی دی.

ګلبدین نایب د هند پر وړاندې د وروستۍ شل اوریزې لوبلړۍ په دوو لوبو ښه ځلېدلی وو، ځکه یې د ای پي اېل لوبډلو او هندي مینه والو پام ځان ته را اړولی دی.

په دې سره ګلبدین نایب په ټوله کې یوولسم افغان لوبغاړی دی چې په هندي لیګ کې پیرل کیږي، او په سږني ای پي اېل کې نهم افغان لوبغاړی دی چې ګډون کوي. دا لمړی وار دی چې ډهلي لوبډله یو افغان لوبغاړی له ځان سره کوي.

سږکال په ګجرات ټایټنز لوبډله کې درې افغان لوبغاړي، کلکتې کې دوه، سنرایزرز حیدراباد، ممبۍ انډینز، لکنو سوپر جاینټز او ډهلي کیپټلز کې یو-یو افغان لوبغاړی لوبیږي.

تر دې وړاندې ظاهر خان هم په ۲۰۱۸ کال کې راجستان لوبډلې له ځان سره کړی وو خو په رسمي لوبو کې د ټپونو له وجې ګډون ونه شو کړای. مجیب ځدراڼ هم د ای پي اېل په څو پړاوونو کې لوبېدلی.

په همدې حال کې ای پي اېل درېیم سوداګریز لیګ دی چې ګلبدین نایب به په کې ولوبیږي.
نایب تر دې وړاندې د افغانستان پریمیر لیګ ها خوا د بنګله دېش پریمیر لیګ او د متحده عربي اماراتو لس اوریز کرېکټ لیګ کې له بېلابېلو لوبډلو سره لوبېدلی.

سونیل نراین په راتلونکي شل اوریز نړیوال جام کې د ګډون لپاره د خپلو لوبغاړو او مینوالو غوښتنې رد کړې

د ویسټ انډیز تقاعد شوي الراونډر سونیل نراین په راتلونکي شل اوریز نړیوال جام کې خپل نه ګډون تایید کړ.

نراین چې دا مهال په ای پي اېل کې د ګوتم ګمبیر تر روزنې لاندې په کلکتې لوبډله کې لوبیږي او په دې وروستیو کې د پیلیز لوبغاړي په توګه هم لوبې ته راوځي، خورا ښه ځلېدلی او تېرو څو سیالیو کې یې یوه سلیزه هم جوړه کړه.

د نراین د ښې کارکردګۍ په درشل کې د نوموړي مینه وال، کرېکټ شننونکي او په ځانګړې توګه د ویسټ انډیز متقاعد لوبغاړي او لوبډلمشر رومن پاول له نراین غوښتي چې خپل تقاعد بېرته واخلي او د هېواد لپاره یې په راتلونکي شل اوریز نړیوال جام کې ولوبیږي.

خو تازه نراین د دې ټولو غوښتنو په ځواب کې په خپل انسټګرام کې داسې لیکلي چې: «خوشاله او منندویه یم چې په دې وروستیو کې زما د ښې کارکردګۍ له امله ډېری خلک ما بېرته راتګ او تقاعد اخیستو ته هڅوي او غواړي په نړیوال جام کې ولوبېږم. خو ما په خپله خوښه د تقاعد پرېکړه کړې، نه غواړم څوک له ځان خفه کړم، دا دروازه اوس د ځان لپاره تړلې بولم خو زه د ټولو هغو ملګرو ملاتړ کوم چې د جون په میاشت کې د وېسټ انډیز لپاره میدان ته ښکته کیږي. هغه ځوانان چې په تېرو څو میاشتو کې یې سخت کار کړی.»

ویسټ انډیزی الروانډر سونیا نراین له ۲۰۱۹ کال راهیسې د خپل هېواد لپاره نه دی لوبېدلی او د ۲۰۲۳ کال په نومبر کې یې له نړیوال کرېکټ تقاعد اعلان کړ خو ډېری ویسټ انډیزي لوبغاړي له نږدې ۱۲ میاشتو راهیسې په دې هڅه کې دي چې نراین د خپل تقاعد له پرېکړې را وګرځوي.

د نړۍ تر ټولو ستر او معتبر کرېکټ لیګ ای پي اېل په سږني پړاو کې لوبغاړو په ځانګړې توګه د سنرایزرز حیدراباد توپ وهوونکو په خپلې بریدګرې توپ وهنې سره د داسې ریکارډونو بنسټ کېښود چې په هېڅ سوداګریز لیګ کې نه وو تکرار شوي او یا یې تکرار شوي ریکارډونه مات کړل.

سږکال د لومړي ځل لپاره حیدراباد په ای پي اېل کې د ممبۍ پر وړاندې د ۲۷۷ منډو لومړنی لوړ هدف جوړ کړ چې په دې سره یې په ۲۰۱۳ کال کې په ای پي اېل کې د رویل چلېنجرز بنګلور د ۲۶۲ منډو د لوړ هدف ریکارډ مات کړ.

یادې لوبډلې د ای پي اېل په دوام کې په یوه بله بربدګره لوبه کې د رویل چلېنجرز بنګلور پر وړاندې د ۲۸۷ منډو ستر هدف جوړ کړ چې په ورته وخت تراوسه په هېڅ کوم سوداګریز لیګ یا شل اوریز کرېکټ کې دومره ستر هدف نه دی جوړ شوی.

او په همدې حال کې یې له ډهلي کپیټلز سره په خپله بله لوبه کې په پاور پلی یا پیلیزو شپږو اورونو کې د نړۍ په فرنچائز یا سوداګریزو لیګونو او شل اوریز کرېکټ کې بل نوی ریکارډ ثبت کړ.

حېدراباد د ټراوېس هېډ او ابشېک شرما د بریدګرې توپ وهنې پر مټ په پاور پلی کې ۱۲۵ منډې جوړې کړې چې دغه رقم تراوسه په هېڅ فرنچائز لیګ او شل اوریز کرېکټ کې نه دی ترسره شوی. او په ای پي اېل کې هم د وروستي ځل لپاره د کلکتې لوبډلې په ۲۰۱۷ کال کې د بنګلور پر وړاندې په پاور پلی کې ۱۰۵ منډې جوړې کړې وې.

بل لور په پاور پلی کې د ټراوېس هېډ ۸۴ منډې جوړول د ای پي اېل په تاریخ کې په پیلیزو شپږو اورونو کې دویمې سترې منډې دي، تر دې وړاندې په ۲۰۱۴ کال کې سورېش رینا د پنجاب کېنګز پر وړاندې ۸۷ منډې کړې وې.

په همدې حال کې د ډهلي پر وړاندې لوبه کې د سنرایزرز حېدراباد پیلیزو توپ وهوونکو په پاور پلی کې ۲۴ بونډریانې ترسره کړې چې دا د نارینو په شل اوریز کرېکټ کې تر ټولو ډېرې بونډریانې دي او په دې سره یې په ۲۰۱۴ کال کې د ساسېکس پر وړاندې په پاورپلی کې د سریلانکا د ۲۰ بونډریانو ریکارډ مات کړ.

سنرایزرز حیدراباد په یو بل ریکارډ کې له لسو اورونو په کمو هغو کې ۱۵۸ منډې جوړې کړې چې په دې سره یې په شل اوریز کرېکټ کې له لسو په کمو اورونو کې د ۱۵۰ منډو ریکارډ مات کړ.

او بل لور تر دې دمه په ای پي اېل کې تر ټولو ستره ملګرتیا د کوینټن ډيکاک او کېل راهول ترمنځ وه چې د چنای سوپر کېنګز پر وړاندې یې ۱۳۴ منډې جوړې کړې خو دا چې سږکال به دا ریکارډ د کومې لوبډلې لوبغاړي ماتوي په راتلونکو لوبو کې به ولیدل شي.

ځوان لوبغاړو شفیق الله غفاري او ذهیب زمانخېل د لندن پر لور هېواد پرېښود

له هېواده د ځوانو کورنیو لوبغاړو د وتلو په لړۍ کې تازه د کورني کرېکټ بل لوبغاړي ذهیب زمانخېل هم د لندن پر لور له وطن سره مخه ښه وکړه.

نوموړي څه موده وړاندې په وطن کې له کرېکټ کولو استعفا وړاندې کړې وه خو کوم کره لامل یې نه وو په ډاګه کړی.

تر دې وړاندې د شفیق الله غفاري په نوم د کورني کرېکټ لوبغاړي هم وطن پرېښود او په لندن کې یې له یو کرېکټ کلب سره د تړون له مخې خپل کرېکټ ته په یاد هېواد کې دوام ورکړ.

له هېواده د ځوانو لوبغاړو د وتلو په دوام کې کرېکټ بورډ ای سي ای ته په دې اړه وویل چې یادو لوبغاړو په کورني کرېکټ کې پرفامنس نه دی کړی او د کورني یا ډومسټېک کرېکټ تړونونه نه لري او په وروستیو کې له هېواده بهر په سیالیو بوخت وو.

خو په ورته مهال لوبغاړي بیا د کرېکټ بورډ دا څرګندونې ردوي او ای سي ای ته زیاتوي چې همدا اوس هم داسې لوبغاړو ته موقع ورکول کیږي چې هېڅ کورنی کرېکټ یې نه دی کړی، حتی داسې لوبغاړي شته چې د قوش تپې په ملي سیالیو کې د لوبېدو فرصت ورکړل شوی، خو له موږ سره توپیري چلند کوي.

په همدې حال کې له هېواده تازه وتلي ځوان لوبغاړي شفیق الله غفاري د کرېکټ شننونکي او خبریال جعفر هاند پر تازنۍ لیکنې په تبصره کې په ګیله من اندازه داسې لیکلي: «په کومه خاوره چې د وړتیا پرځای روابطو ته لومړیتوب ورکول کېږي نو وړتیا حقداره ده چې خپل ځان ته هرځای کې ښه او مناسب مقام پیدا کړي.»

دا لومړی ځل نه دی چې د کورني کرېکټ ځوان لوبغاړي دوی د موقع نه ورکولو له امله له کرېکټ بورډ ورته شکایت کوي. په ورته وخت کې کرېکټ بورډ هم د لوبغاړو لخوا د اصولو او شرایطو نه مراعطولو یادونه کوي او لوبغاړو ته د بهرنیو کلبونو او لیګونو نسبت، کورني کرېکټ ته د لمړیتوب سپارښتنه کوي تر څو دوي په کورني ملي لیګونو کې د کورني کرزکټ د کارکردګۍ پر بنیاد انتخاب شي.

له افغانستان سره د اسټرالیا د لوبلړۍ د ځنډولو او بېګ باش کې د ګډون په اړه د راشد خان تازه څرګندونې

افغانستان سره د اسټرالیا د شل اوریزې لوبلړۍ د ځنډولو په غبرګون کې راشد خان وایي د اسټرالیا دې پرېکړې خورا ځورولی او له امله به یې د بېګ باش راتلونکي پړاو کې پر خپل ګډون غور وکړي.

راشد خان په دې اړه له کرېک انفو سره په تازه مرکه کې ویلي، که چېرې یو څه د حکومت په لاس کې وي نو بیا ولې باید تر کرېکټ ورسیږي او کرېکټ زیانمن شي، آیا کرېکټ دا ستونزې حلولی شي؟ که حلولی یې شي بیا زه هم پرې خوښ یم.

راشد خان د اسټرالیا کرېکټ بورډ ته په اشاره سره وایي: «تاسې نه غواړئ زما د هېواد له لوبډلې سره ولوبېږئ، خو برعکس ما په بېګ باش کې غواړئ، دا څه توپیر لري؟ دا په دې معنا ده چې زه خپل لوبغاړي او هېواد کم راوړم؟ چې نه غواړئ زما له لوبډلې سره ولوبېږئ نو بیا خو زه هم ستاسو هېواد کې د لوبېدو اجازه نه لرم.»

نوموړي د اسټرالیا د پرېکړې په اړه په خپلو خبرو کې وړاندې زیاته کړې، دا دردونکې ده چې غواړې له لویو لوبډلو سره لوبې وکړې څو کرېکټ مو نور هم پرمختګ وکړي خو پرته په نړیوال جام کې د نورو دوه اړخیزو لوبو کولو فرصت ونه لرې.

راشد همدارنګه له هند سره د افغانستان د تېرې لوبلړۍ یادونه هم وکړه او ویې ویل: «موږ له هند سره لوبې وکړې چې له هغو لوبو په یوې کې یې افغان لوبډلې د ۲۱۲ منډو هدف په تعقیب ۲۰۰ منډې وکړې، فکر وکړئ که موږ دا لوبې نه وی کړی پر ځان باور به مو له کومه کاوه؟ له لویو لوبډلو سره لوبې کول زموږ لپاره لویه خبره ده.»

ښاغلي خان ټینګار کړی، کرېکټ یوازنۍ سرچینه ده چې په افغانستان کې د خلکو کورونو ته خوښۍ راوړي او که دا خوښي هم له خلکو اخلئ نو تاسو خلکو ته لا ډېر زیان رسوئ.

دا په داسې حال کې ده چې د اسټرالیا کرېکټ بورډ د تېر په څېر یو ځل بیا په مارچ میاشت کې له افغانستان سره په اګسټ کې ترسره کېدونکې شل اوریزه لوبلړۍ وځنډوله چې یاد بورډ یې عمده لامل په افغانستان کې د ښځو او نجونو اوسنی وضعیت او په نړۍ کې د ښځینه وو د کرېکټ وده په ګوته کړې وه.

د اسټرالیا کرېکټ بورډ د دغې پرېکړې پر وړاندې لا هم غبرګونونه دوام لري.