د روان شل اووریز نړیوال جام ګروپ سټېج پړاو پرون پای ته ورسېد او نن د جون ۱۹مه د نړیوال جام د اتو غوره لوبډلو پړاو شروع کیږي چې اته لوبډلې به په دوه ګروپونو کې د نیمه پای لوبې لپاره سره لوبه کوي.

افغانستان د دې پړاو په ای ګروپ کې له هند، اسټرالیا او بنګله دېش سره لوبیږي.

د افغان لوبډلې لومړنۍ لوبه د جون په شلمه له هند سره ده.

افغانستان چې په دې شل اووریز جام کې یې ډېرې په زړه پورې لوبې وکړې، تمه کیږي چې د هند پر وړاندې به هم ښه مبارزه وکړي.
نړیوال تحلیلونه دا دي چې اوس د پاکستان پر ځای د هندۍ لوبډلې سیاله لوبډله افغانستان دی.

افغان لوبډلې د روان کال په پیل کې هم له هند سره شل اووریزه لوبلړۍ ولوبوله او تر ډېره بریده یې ښه مبارزه وکړه نو هیلې دا دي چې په نړیوال جام کې به هم وکولی شي پر هندۍ لوبډلې خپل رعب او وېره واچوي.

د افغانستان دویمه لوبه د جون په ۲۳مه له اسټرالیا سره ده.
اسټرالیا وار د مخه په تېر یو ورځني نړیوال جام کې د افغان لوبډلې د بریدګرې توپ اچونې د جادو ډار لیدلی، ښایي بیا هم د دواړو لوبډلو ترمنځ هیجاني لوبه وشي.
دا مهال اسټرالیا هم د نورو لوبډلو پر ځای له افغانستان سره له مخامخ کېدو فشار لري ځکه په دې نړیوال جام کې د افغان چټکو توپ اچوونکو جوړې ټولو لوبډلو ته ټکان ورکړی.

او په اتو غوره پړاو کې د افغانستان وروستۍ لوبه د جون په ۲۵مه له بنګله دېش سره ده.

افغانستان له بنګله دېش سره په خپلو وروستیو لوبو کې هم ښه ثابت شوی.
له بنګله دېشۍ لوبډلې سره یې د وروستۍ ځل لپاره یوه ټېسټ لوبه او یو ورځنۍ او شل اوریزه لوبلړۍ ترسره کړې چې ټېسټ لوبه او شل اووریزه لوبلړۍ بنګله دېش او یو ورځنۍ لوبلړۍ افغانستان ګټلې ده.

بل لور د بنګله دېش لوبډله به هم هڅه کوي چې د مخکښو لوبډلو د سیالې لوبډلې افغانستان پر وړاندې د مخامخ کېدو پر مهال محتاطه اوسي.

 

په روان شل اووریز نړیوال جام کې افغانستان د دوو ښو لوبو په ترسره کولو او په ټوله کې د لوړ رن رېټ درلودو له کبله د ګروپ سټېج پړاو تر ټولو مخکښه لوبډله ده.

په ډي ګروپ کې له افغانستان سره سره د کرېکټ نړۍ دوه نورې پیاوړې لوبډلې هم دي چې یوه یې د وېسټ انډیز او بله یې د نیوزیلنډ لوبډله ده.

افغانستان تر اوسه دوه لوبې کړي او په دواړو لوبو کې یې سیالو لوبډلو ته خورا سخته او په لوی توپیر ماتې ورکړې.

د یادو لوبډلو له منځه یوه د نیوزیلنډ لوبډله ده چې افغان لوبغاړو پرې خپل رعب و داب واچاوه او د لومړي ځل لپاره یې نه هېرېدونکې ماتې ورکړه.

اوس تر دې دمه په ګروپ سټېج پړاو کې د افغانستان یوازې دوه لوبې پاتې دي چې یوه یې له پاپوا نیو ګینې او بله وېسټ انډیز له سره ده.

دا مهال د کرېکټ ډېری مینه والو ته پوښتنه دا ده چې آیا که افغانستان خپلې راتلونکې دوه لوبې وبایلې بیا هم کولی شي راتلونکي پړاو ته ووځي که نه؟

د ای سي ای د معلوماتو او تحلیل پر بنسټ، که افغانستان خپلې راتلونکې دوه لوبې په لوی توپیر یعنې لومړۍ لوبه د ۶۰ منډو او دویمه لوبه د ۷۰ منډو په توپیر وبایلي نو اوسنی مثبت ۵.۲۲۵ رن رېټ به یې مثبت ۰.۹۸ ته راشي.
بل لور نیوزیلنډ چې خپلې لومړنۍ دوه لوبې یې بایللي او دا مهال یې رن رېټ منفي ۴.۲۰۰ دی، خپلې راتلونکې دوه لوبې په لوی توپیر یعنې لومړنۍ لوبه د ۷۰ منډو او دویمه لوبه د ۹۰ منډو په توپیر وګټي، رن رېټ یې له اوسنۍ کچې مثبت ۰.۷۸ ته راځي چې په دې توګه بیا هم د افغانستان رن رېټ پرې لوړ دی او افغان لوبډله سره له دې هم کولی شي بل پړاو ته ووځي.

خو په دې نړیوال جام کې د افغان لوبډلې چمتووالي او د لوبې د ټولو برخو پیاوړتیا ته په کتو ښکاري چې کولی شي راتلونکې دوه لوبه هم په ښه توپیر وګټي.

 

د پاکستان پخواني لوبغاړي اعجاز احمد د هند او پاکستان له لوبې وروسته په یوه ژوندۍ تلویزیوني خپرونه کې د خپلو خبرو په لړ کې د پښتونخوا پښتنو او پښتنو لوبغاړو ته سپکاوی وکړ.

نوموړي ویلي، «اوس د پاکستان ۸۰ سلنه کرکټ په لرو پرتو سیمو کې دی چې هلته پښتانه اوسیږي. د پاکستان په لوبډله کې به ضرور پنځه یا شپږ لوبغاړي پښتانه وي، هغه ټول بې تعلیمه او د غرونو خلک دي. دوی سهار د کاکا یا مشر ورور سره لمونځ ته ځي او بېرته ویده کیږي. دوی فشار نه شي زغملی.»

داسې ښکاري چې نوموړي دا توندې څرګندونې د هند پر وړاندې د پاکستان د لوبې پر مهال وروستیو اوورونو ته د نسیم شاه او شاهین افریدي چې دواړه پښتانه لوبغاړي، د توپ وهنې پر مهال کړي ځکه یادو دواړو لوبغاړو ونه شول کولی په وروستیو توپونو هدف پوره کړي او پاکستان بریا ته ورسوي.

د پاکستاني پخواني لوبغاړي دغو خبرو په خواله رسنیو کې په خیبر پښتونخوا او ټولو پښتون مېشتو سیمو کې د پښتنو غبرګونونه راپارولي.

دوی وایي، په تلوېزیوني خپرونو کې ولې ویاند مېلمنو ته د داسې تعصبي خبرو اجازه ورکوي او ولې یې نه منع کوي.

اعجاز احمد دا خبرې داسې مهال کوي چې د پاکستان په لوبډله کې ډېر پښتانه لوبغاړي تېر شوي او دغه لوبډله پښتنو لوبغاړو یو ځای ته رسولې.
بل لور په پاکستانۍ لوبډله کې برحاله دوه پښتانه توپ اچوونکي لوبیږي چې ډېر کله پرې یاده لوبډله په سختو حالاتو کې تکیه کوي.

دا په داسې حال کې چې تر دې وړاندې د پاکستان پخواني لوبغاړي کامران اکمل د هند او پاکستان د لوبې پر مهال ارشدیپ سینګهـ ته په اشاره سېکهانو ته سپکاوی وکړ چې د هندي پخواني لوبغاړي او رسنیزې مخکښې څېرې هربجن سینهګـ له توند ځواب سره مخ شو.

 

پاکستان او هند د روان شل اووریز نړیوال جام په دوام پرون د نیویارک په ناساو کاونټي لوبغالي کې سره مخامخ شول.

دغه لوبه پاکستان په ډېره اسانۍ او خورا کم توپیر هند ته وبایلله.

د لوبې سره هم مهاله په بېلابېلو پاکستاني او هندي رسنیو کې پخوانیو لوبغاړو او د کرېکټ تحلیل ګرانو بحث کاوه.

د پاکستان ملي لوبډلې پخواني لوبغاړي کامران اکمل په یوه تلوېزیوني مرکه کې د هندي برحال لوبغاړي ارشدیپ سینګ په نښه کولو سره، توکمپاله او تعصبي څرګندونې وکړې.

د اکمل دې څرګندونو چې سېکهـ مذهب ته سپکاوی بلل کیږي پراخ غبرګونونه راپارولي.

کامران اکمل په پاکستان کې په یوې ژوندۍ خپرونې کې دا څرګندونې هغه مهال وکړې چې د پاکستان د توپ وهنې په پاڼۍ کې په وروستیو شپږو توپونو ۱۸ منډو ته اړتیا وه، تبصره کوونکو په دې بحث وکړ چې ایا له ارشدیپ به دا منډې پوره شي که نه.
نو په ورته وخت اکمل جنجالي او ناندرۍ پاروونکې خبرې وکړې.
نوموړي وویل: «وروستی اوور باید د ارشدیپ له خوا ترسره شي او دا هم وټکول شي. تاسو خو پوهېږئ چې دوی لا د مخه ۱۲ دي، له ۱۲ وروسته دوی ته هېڅ سېکهـ نه ورکول کیږي.»

د هند ملي لوبډلې پخواني لوبغاړي او په هندي رسنیو کې مشهورې څېرې هربجن سېنګهـ په اېکس شبکه کې د کامران اکمل دغو پاروونکو څرګندونو ته توند غبرګون ښودلی.

نوموړي په اېکس کې په یوه یادښت کې لیکلي: «لکونه لعنت دې وي په تا کامرانه. مخکې له دې چې خپله ناپاکه خوله خلاصه کړې، باید د سېکهانو په تاریخ پوه شې، موږ سېکهانو خپلې خویندې او میندې هغه مهال وژغورلې چې یرغلګرو برمته کړې وې او د شپې دولس بجې وې. شرم وکړئ، لږ قدردانی خو یې وکړئ.»

دا په داسې حال کې ده چې د ۱۲ بجو روایت د مغلو د امپراتورۍ وخت ته ورګرځي او کامران اکمل د مغلو د امپراتورۍ پرمهال پر سېکهـانو د ظلم او د دوی له لوري د خپلو برمته شویو ښځو د خلاصون لپاره د شپې د ۱۲ بجو د عملیاتو پېغور ورکړی.

 

د شل اووریز نړیوال جام په دوام، افغان لوبډلې په یوه سخته او په زړه پورې لوبه کې نیوزیلنډ ته په ستر توپیر ماتې ورکړه.

د لوبې پچه نیوزیلنډ وګټله او ویشتنځای ته په کتو یې لومړی د توپ اچوونې پرېکړه وکړه.

ویشتنځی سخت وو او د نیوزیلنډي لوبغاړو توپ اچوونې ته په کتو سخته برېښېده چې افغان توپ وهوونکي دې ښه توپ وهنه وکړي یا دې نسبتاً لوړ هدف ورکړي.

رحمن الله ګربز او ابراهیم ځدراڼ د تېرې لوبې په څېر یو ځل بیا چټک پیل واخیست او دواړو سل منډې ملګرتیا وکړه چې دا په روان نړیوال جام کې د دواړو دویمه ستره ملګرتیا ده.

د لوبغاړو د توپ وهنې انرژۍ ته په لیدو که چېرې ویشتنځی سخت نه وی ښایي د پیلیزو لوبغاړو ملګرتیا نوره هم لوړه وی او یا افغان لوبډلې له دې هم لوړ هدف ورکړی وی.

افغان لوبډلې په پیلیزو شپږو یا پاور پلی اورونو کې ډېره ښه لوبه وکړه خو له هغې وروسته اورونو کې لوبغاړي په توپ وهنه کې محتاط شول.

په منځنیو اورونو کې بیا هم ښه توپ وهنه وشوه او رحمن الله ګربز او عظمت الله عمرزي د لویو او بریدګرو شاټونو زړه وکړ خو په وروستیو اورونو کې چې افغانستان یو څو لوبغاړي هم له لاسه ورکړي وو، توپ وهنه ورو شوه او یوازې ۱۶۰ منډې هدف جوړ شو.

له دویمې پاڼۍ وړاندې داسې انګیرل کېده چې د نیوزیلنډ مخکښ توپ وهوونکي به وکولی شي دا هدف ترلاسه کړي او یا به یې په سخته پوره کړی شي خو بل لور یې پر وړاندې د افغانستان سوکه او چټک توپ اچوونکي وو چې که نیوزیلنډي لوبغاړو هر څومره د ښې او بریدګرې توپ وهنې زړه کړی وی افغان توپ اچوونکو یې په خپل جادویي توپ مخه ډب کوله.

د افغانستان لپاره یو ځل بیا فضل الحق فاروقي د توپ اچوونې حیرانوونکی پیل واخیست او د نیوزیلنډ په صفر منډو یې پیلیز لوبغاړی وسوځاوه چې دې کار د نیوزیلنډ لپاره توپ وهنه نوره هم سخته کړه او پاتې لوبغاړي د افغانستان له توپ اچوونې تر فشار لاندې راغلل.

فضل الحق فاروقي په پیلیزو شپږو یا پاور پلی اورونو کې درې وېکټې واخیستې چې په دې سره د افغانستان د توپ اچوونکو انرژي او پر ځان باور نور هم لوړ شو.

په پاور پلی اورونو کې د یو دوه لوبغاړو سوځول پاتې توپ اچوونکو ته لوبه اسانوي او په مقابل لوري فشار نور هم ډېروي.

په ټوله کې د افغانستان د توپ اچوونې جوړې یو په زړه پورې ننداره وړاندې کړه او له هر اوور وروسته یې د یوې- یوې وېکټ په اخیسو سره د مینه والو او لیدونکو لپاره هم لوبه ډېره خوندوره کړه.

نیوزیلنډي توپ وهوونکو د افغانستان د معجزه یي توپ اچوونې له وېرې هم بېټ پورته نه شو کړی او هېڅ لوبغاړو په کې ان تر ۱۵ منډو هم ملګرتیا جوړه نه شوه کړی.
د یادې لوبډلې لپاره یوازې ګرېن فلېپز ۱۸ او مټ هېنري ۱۲ ډېرې منډې وکړې او ټوله لوبډله یې په ۷۵ منډو راټوله شوه.

په دې سره افغانستان د لومړي ځل لپاره نیوزیلنډ ته ماتې ورکړه.

د افغانستان په وروستیو دوو لوبو کې د توپ اچوونکو بریدګرې توپ اچوونې د ګروپ پاتې لوبډلو ته ټکان ورکړ او دا په راتلونکو پړاوونو کې د نورو لوبډلو لپاره د خطر زنګ دی.

رحمن الله ګربز تل د فاروقي د غوره لوبغاړي جایزې ګټلو مخه نیسي

ښایي لیدلي مو وي چې په ډېری لوبو کې رحمن الله ګربز او فاروقي دواړه د لوبې په خپلو اړوندو برخو کې ښه کارکردګي کوي.
ګربز په توپ وهنه کې ډېرې منډې جوړوي او فضل الحق فاروقي ډېرې وېکټې اخلي.

د رحمن الله ګربز ښه او لوړې منډې تل د فاروقي د غوره لوبغاړي د جایزې مخه نیسي.

فضل الحق فاروقي د یوګانډا پر وړاندې د افغانستان له بریا وروسته په یوه مرکه کې ویلي چې هر کله ښه توپ اچوونه وکړي او ډېرې وېکټې واخلي په همغې لوبه کې بیا رحمن الله ګربز ښه توپ وهنه کوي، ډېرې منډې جوړوي او د غوره لوبغاړي جایزه اخلي.

فاروقي وایي د ګربز ښه لوبه د دې لامل کیږي چې زه د غوره لوبغاړي جایزه وانه خلم.

نوموړي له یوګانډا سره د افغانستان لوبې ته هم اشاره وکړه او زیاته یې کړه، کله چې ګربز ډېرې منډې وکړې زړه کې مې وویل، بیا ګربز توپ اچوونکي وټکول نو فکر نه کوم چې زما د ښې توپ اچوونې سره سره به هم د غوره لوبغاړي جایزه واخلم.

خو په ورته مهال فاروقي په یاده لوبه کې د کمو منډو په ورکولو پنځه لوبغاړي وسوځول او د غوره لوبغاړي جایزه یې واخیسته.

څه موده مخکې د ایرلېنډ پر وړاندې د افغانستان یو ورځنۍ لوبلړۍ کې هم د یوې لوبې پر مهال فضل الحق فاروقي څلور وېکټې واخیستې او په همدې لوبه کې رحمن الله ګربز ۱۲۱ منډې وکړې.
د همدغې لوبې په اړه د کرېکټ بورډ پر پاڼه خپرې شوې وېډیو کې فضل الحق فاروقي له ټوکو ویلي وو چې په کومه لوبه کې ښه کارکردګي وکړم ګربز راپسې ډېرې منډې کوي او د مین اف د مېچ یا د لوبې د غوره لوبغاړي جایزه رانه اخلي.

فضل الحق فاروقي تر ډېره په افغان ملي لوبډله کې پر شوخ مزاجه او ټوکي لوبغاړي مشهور دی او مینه وال یې ورته له ډېرې مینې شینو خطاب کوي.

د ګواښونو له امله د هند او پاکستان د لوبې لپاره له وړاندې امنیتي تابیا؛

د امریکا په کوربتوب په شل اووریز نړیوال جام کې د هند او پاکستان د لوبې پر مهال د احتمالي امنیتي ګواښونو له امله له وړاندې امنیتي تابیاوې نیول شوې دي.

د یادو هېوادونو ترمنځ لوبه چې د جون په نهمه د نیویارک په ناساو کاونټي لوبغالي کې ترسره کیږي د دغه لوبغالي په شاوخوا سیمو کې هم امنیتي تدابیر سخت شوي دي.

د راپورونو له مخې د ناساو کاونټي د پولیسو څانګې څارنه پیل کړې څو ډاډ ترلاسه کړپ چې د جون له ۳مې تر ۱۲مې ټولې لوبې پرته له کومې پېښې ترسره شي.

د داعش خراسان څانګې له خوا د ورکړل شویو ګواښونو له امله حتی د ناساو کاونټي لوبغالي په شاوخوا سیمو کې نښه ویشتونکي هم ځای پر ځای کیږي.

بل لور لوبغالي ته دننه کېدونکي نندارچیان به هم پلټل کیږي او د ځانګړو سکېنرونو نه به تیریږي.
پر دې سربېره به د امنیت د لا ټینګښت لپاره په ملکي جامو کې هم ځواکونه په میدان کې ګزمه کوي.

په ورته مهال د کرېکټ نړیوالې شورا هم بي بي سي نړیوال سروېس ته ویلي، چې په روان جام کې د ټولو امنیت او خوندیتوب ورته لومړیتوب دی او یو ټولیز او پیاوړی امنیتي پلان لري.

دا په داسې حال کې ده چې د نړیوال جام د مخه له شمالي پاکستانه د لوبو پر مهال د امنیتي پېښو د ترسره کېدو ګواښ ورکړل شوی وو.

د یوګاناډا پر وړاندې د بریا په اړه جانتن ټرات ویلي، دا د پر ځان باور وده ده چې ښه لوبه مو وکړه.

د افغان ملي لوبډلې مشر روزونکي جانتن ټرات د یوګانډا پر وړاندې د افغانستان له بریا وروسته په خبري کنفرانس کې د پیلیزې جوړې رحمن الله ګربز او ابراهیم ځدراڼ او دا را راز د تېز مخکښ توپ اچوونکي فضل الحق فاروقي د لوبې ستاینه وکړه.

ښاغلي ټرات وویل، د یوګانډا پر وړاندې په بریا سره د رن رېټ وده به، په سي ګروپ کې افغانستان په ښه ځای کې ودروي.

نوموړي زیاته کړې: «فکر کوم چې د اړخونو له کیفیت سره په یو سخت ګروپ کې د نېټ رن رېټ کچه به خپل اغېز ولري. زه د هوا او باران ډېره اندېښنه نه لرم او دا د کرېکټ چارواکو پورې اړه لري خو فکر کوم، چې دا د پر ځان باور یو ډول دی چې موږ لوبه وکړه او پای ته مو ورسوله، فضل الحق فاروقي ډېره ښه لوبه وکړه او له ټولې لوبډلې سره یې مرسته وکړه چې دا ډېره خوشالوونکې ده.»

بل لور د رحمن الله ګربز او ابراهیم ځدراڼ د پیل لوبې او ملګرتیا په شل اووریز نړیوال کرېکټ کې د دویمې سترې ملګرتیا بنسټ کېښود.

مشر روزونکي د افغانستان پیلیزې جوړې ته هم اشاره وکړه او زیاته یې کړه چې زموږ د پیل ملګرتیا واقعاً ښه وه او یو ښه پلېټ فارم یې جوړ کړ خو فکر کوم ښکاره ده چې څومره موږ غوښتل ترې ګټه واخلو په هغه کچه مو ونه شول کولی او دا هغه څه دي چې باید پرې کار وکړو.

ښاغلي ټرات د پیلیزو لوبغاړو له سوځېدو وروسته د پیل منځنیو لوبغاړو د لوبې په اړه هم وویل چې باید یې د پیلیزې جوړې د توپ وهنې بڼې ته دوام ورکړی وی خو دا زموږ ملامتي ده او لا هم داسې څه شته چې موږ یې باید په ښه والي کار وکړو.

په ورته مهال فضل الحق فاروقي له یو څه مودې وروسته بېرته خپلې مخکښې جادویي توپ اچوونې ته را ګرځېدلی.
نوموړي د یوګانډا پر وړاندې د نړیوال جام د لوبې په پیل کې د نهه منډو په ورکولو پنځه وېکټې واخیستې.

ښاغلي ټرات د فضل الحق فاروقي په یادې کارکردګۍ خوښي څرګنده کړه او ویې ویل، نوموړي واقعاً پر خپلې لوبې سخت کار کړی، زه ورته ډېر خوشاله یم، هغه خپل مهارت وښود چې کولی شي خپل توپ سوېنګ کړي او وېکټ واخلي.
دا تل مقابل لوري ته سرخوږی جوړوي او موږ یوې سمې لارې ته سیخوي.

له دې ټولو سره سره افغانستان خپله دویمه لوبه د ویسټ انډیز پر وخت د جون په اوومه او د افغانستان پر وخت د جون په اتمه له نیوزیلنډ سره لوبوي.

 

د کرېکټ نړیوالې شورا په روان شل اوریز نړیوال جام کې د هر پړاو لوبډلو لپاره ورکول کېدونکي نغدي امتیازات په ډاګه کړل.

په ټوله کې سږکال د نړیوال جام ګډون کوونکو لوبډلو ته ورکول کېدونکی امتیاز ۱۱.۲۵ میلیونه ډالر ټاکل شوی دی چې له دې جملې ۲.۴۵ میلیونه ډالر د اتلولۍ ګټوونکې لوبډلې ته او ۱.۲۸ میلیونه ډالر د نیمه اتلولۍ ګټوونکې یا دویم مقام لوبډلې ته ورکول کیږي.

په ورته مهال هرې ګډون والې لوبډلې ته به د ټولو لوبو ۲ لکه ۲۵ زره ډالر ورکول کیږي ان که ټولې لوبې هم وبایلې.

له دې ور ها خوا د اتو او څلورو غوره لوبډلو په پړاو کې هم د لوبډلو لپاره جلا امتیازات په نظر کې نیول شوي دي.

هغه لوبډلې چې د اتو غوره لوبډلو یا سوپر اېټ پړاو کې پاتې راځي هرې یوې ته به یې ۳ لکه ۸۲ زره ۵۰۰ ډالر ورکول کیږي.
او هغه لوبډلې چې د څلور غوره لوبډلو پړاو یا نیمه پای لوبې ته لار پیدا کوي هرې یوې ته به یې ۷ لکه ۸۷ زره ۵۰۰ ډالر ورکول کیږي.
یادې ټولې هغه لوبډلې دي چې د نړیوال جام په نوملړ کې تر اتو مقامونو راځي.

بل لور د نورو مقامونو لوبډلو ته هم ځینې جلا امتیازات ورکول کیږي لکه له اتو مقامونو وروسته لوبډلو ته چې له نهم تر دولسم مقام پورې راځي هره یوه به ۲ لکه ۴۷ زره ۵۰۰ ډالر ترلاسه کوي.
او له ۱۳م تر تر شلم مقام پورې لوبډلې به ۲ لکه ۲۵ زره ډالر ترلاسه کوي.

په همدې حال کې په روان نړیوال جام کې به په ټوله کې د هرې لوبې ګټوونکې لوبډلې ته د بریا په سر ۳۱ زره ۱۵۴ ډالر ورکول کیږي.

دا په داسې حال کې ده چې دا د کرېکټ نړیوالې شورا په تاریخ کې ترټولو ستر شل اووریز نړیوال جام دی.

په دې جام کې د ګډون والو لوبډلو د زیات شمېر ترڅنګ په لویه کچه امتیازات هم ټاکل شوي، تر دې وړاندې په نړیوالو جامونو کې دومره لوی نغدي امتیازات نه وو ورکړل شوي.

هم مهاله په روان نړیوال جام کې ټولې ۵۰ لوبې د ۲۸ ورځو په اوږدو کې د امریکا او ویسټ انډیز په ګډ کوربتوب په نهو بېلابېلو لوبغالو کې ترسره کیږي.

 

ټاکل شوې راشد خان په سږني شل اوریز نړیوال جام کې د افغان لوبډلې مشري وکړي.

نوموړي په خپلې وروستۍ مرکه او د نړیوالې شورا خبري کنفرانس کې د لوبغاړو د چمتووالي او لوبو ګټلو ته د کلک هوډ په اړه یو لړ څرګندونې وکړې.

راشد خان باوري دی چې د لوبغالو ویشتنځای د افغان لوبډلې سپېنرانو ته جوړ دی، د هغه په باور څو لوبغاړو په کارابېین لیګ سیالیو کې ګډون کړی او د دغه ځای له هوا او ویشتنځای سره بلد دي نو کولی شي د مخالفو لوبغاړو لپاره لوبه کول سخت کړي.

ښاغلي خان د کرېکټ نړیوالې شورا له لوري په خبري کنفرانس کې زیاته کړې، چې زموږ لپاره مهمه لومړنۍ لوبه ده چې څه رنګ یې کولی شو ځکه په وینا یې په شل اوریز کرېکټ کې د لوبې تر وروستۍ شېبې بایلل او ګټل معلوم نه وي، ښایي کمزورې لوبډله پر پیاوړې غالبه شي.

بل لور راشد خان له کرېک انفو سره په مرکه کې ویلي، چې د اتو غوره لوبډلو پړاو ته د وتلو لپاره د لوبغاړو ترمنځ پر ځان باور وجود لري.
موږ مخکې هم څو ځل په شل اوریز فارمټ کې ویسټ انډیز مات کړی، په یو ورځنۍ لوبو کې مو هم مات کړی او تر ټولو مهمه دا ده چې زموږ څو لوبغاړي د ای پي اېل سږني پړاو کې ولوبېدل چې دا د نړیوال جام لپاره ښه چمتووالی وو.

خان هیله لري چې افغان لوبډله همغه پر ځان باور ولري لکه په هند کې یې چې په یو ورځني نړیوال جام کې درلود.

راشد خان ټینګار کوي چې زموږ لپاره مهم څه دا دي چې موږ په کوم ذهنیت میدان ته ځو، که موږ دا باور لرو چې کولی شو نیوزیلنډ مات کړو، یا ویسټ انډیز مات کړو، نو کله چې دا باور رامنځته شو بیا کولی شئ هره لوبډله ماته کړئ او دا همغه باور وو چې موږ په هند کې په تېر نړیوال جام کې درلود.

د افغانستان او افغانانو ویاړ او په شل اووریز نړیوال جام کې افغان لوبدلمشر راشد خان د لوبغاړو د چمتووالي خبره هم هېره نه کړه.

خان د نړیوالې شورا د خبري کنفرانس پر مهال د خبریال د پوښتنې په ځواب کې چې لوبغاړي له ګرمۍ سره څنګه دي؟ وویل د دې لپاره چې له ګرمۍ سره بلد شو موږ دووه اوونۍ وړاندې دلته راغلو.

نوموړي همدارنګه خپل مینه وال هم هېر نه کړل او ویې ویل چې زموږ لوبې وختي دي او کله چې مو مینه وال د سهار لمونځ لپاره راپاڅیږي موږ ته به هم دعاوې کوي.

ښاغلي خان په وروستیو ټکو کې د تل په څېر یاده کړه چې موخه یې افغانستان ته خوشالي راوړل دي او له مینه والو یې د بریاوو لپاره د دعاوو هیله وکړه.