له افغانستان بچ شوې اسټرالیا له سویلي افریقا هم ځان وژغورو

د ۲۰۲۳ کال کرېکټ نړیوال جام د نیمه پای لوبو په درشل کې اسټرالیا له سویلي افریقا هم بچ شوه.

اسټرالیا چې نیمه پای لوبې ته د وتلو لپاره په ډېره سخته د افغانستان له خوا له ماتې خوړلو بچ شوې وه، پرون د نړیوال جام نیمه پای لوبه کې له سویلي افریقا هم په سخته وژغورل شوه او بلاخره یې ځان پای لوبې ته ورساوه.

اټکل کېده که افغان لوبډلې له اسټرالیا لوبه ګټلی وی له سویلي افریقا هم ورته ګټل اسانه کېدل او کېدی شي د دغه اټکل سره سم اوس افغان لوبډله په پای لوبه کې له هند سره وه.

اوس هند ماته کړې اسټرالیا د روان نړیوال جام پای لوبه کې یو ځل بیا له هند سره مخامخ کیږي.

اسټرالیا چې اته ځله د نړیوال جام پای لوبو ته وتلې او پنځه ځله یې اتلولي ګټلې په هند یې سترګه سره ده.

خو له بلې خوا په روان نړیوال جام کې د اسټرالیا سفر ان د افغان لوبډلې په پرتله هم دومره خوندور نه وو او وروستۍ لوبې یې په بېکاره ډول وګټلې.

په ورته مهال بیا د اسټرالیا مقابل کې هندۍ لوبډله په خپل کور او لوبغالي کې لوبیږي او تر دا مهاله یې د نړیوال جام ټولې لوبې ګټلي نو پر دې بنسټ پر اسټرالیا یې زور بر ښکاري او اسانه به نه وي چې د نړیوال جام ټرافي له هند ووځي.

ټاکل شوې د هند او اسټرالیا ترمنځ د نړیوال جام پای لوبه د نومبر په ۱۹مه د یکشنبې په ورځ د هند په ترټولو لوی لوبغالي احمد اباد کې ترسره شي.

ښایي د هند د لوبې نندارې لپاره لومړی وزیر نرېندرا مودي، نور سیاستوال، د هند مشهور فلمي لوبغاړي، ادا کاران او د کرېکټ پخواني لوبغاړي هم لوبغالي ته راشي.

د یو ورځنۍ لوبلړۍ له لغوه کولو وروسته اسټرالیا له افغانستان سره مخامخ کیږي

ټاکل شوې د نړیوال جام په دوام د نومبر په اوومه افغان ملي لوبډله له اسټرالیا سره لوبه وکړي.

دا چې اسټرالیا هم د کرېکټ د نړۍ پیاوړې او مخکښه لوبډله ده، افغان مینه وال د پاکستان په ګډون له نورو لوبډلو سره د تېرو لوبو په څېر له اسټرالیا سره هم لېواله دي او د یوې په زړه پورې لوبې لیدو ته شېبې شمېرې.

په همدې حال کې اسټرالیا د روان کال په جنورۍ میاشت کې له افغان لوبډلې سره یو ورځنۍ لوبلړۍ لغوه کړه او لامل یې هم افغانستان کې د نجونو او ښځو پر زده کړو او کار بندیز ښودلی وو او ویلي یې وو چې د بشري حقونو مسله ورته مهمه ده.

تازه افغان چټک توپ اچوونکي نوین الحق اسټرالیا ته په کنایه آمېز ډول ویلي چې ایا اسټرالیا ته اوس هم د بشري حقونو مسله مهمه ده که د نړیوال جام دوه پواینټونه.

نوموړي په خپله انسټګرام سټوري داسې کښلي:

«د دوه اړخیزه لوبلړۍ له انکار وروسته، اوس به په زړه پورې وي چې د اسټرالیا کرېکټ بورډ په نړیوال جام کې هم په خپل دریځ ودریږي او که دوی ته له “بشري حقونو” دوه پواینټونه مهم دي.»

د نوین دغو څرګندونو پراخ مخالف او ملاتړي غبرګونونه راپارولي خو ډېری افغان مینه والو له نوین ملاتړ کړی او د نوین څرګندونې یې سمې، پر ځای او پر وخت بللې دي.

افغانستان په خپلې اوومې لوبې کې له یوې با انرژي, د ګټې لیوالې, مستعدې او هڅاندې لوبډلې سره مخامخ دی.   دوی د ای سي سيبشپړ غړي نه دي, خو درې بشپړ غړي یې مات کړي.

‏افغانستان چې په لومړي ځل په شل اوریز نړیوال جام کې لوبېده، یوه لوبه یې له جنوبي افریقا سره وه. زما یادېږي هغه مهال د جنوبيافریقا کپتان ګریم سمیت ویلي وو چې د افغانستان لوبډله د کیلې د پوټکي په څېر ده، هره لوبډله پرې ښویدای شي. هغه وخت افغانستاندوې لوبې درلودې او دواړه یې وبایللې او کومه لوبډلې پرې ونه ښویده، خو په دې نړیوال جام کې د هالنډ لوبډله همدغسې ده. دوې لوبډلېجنوبي افریقا او بنګله دېش پرې ښویدلي دي.

افغانستان د جمعې په ورځ په نړیوال جام کې له هالنډ سره لوبه کوي. افغانستان په شپږو کې درې او هالنډ دوې لوبې ګټلې دي.

‏هالنډ په فیلډینګ، بالینګ او بیټینګ درې واړو کې ښه ځلېدلی, دوی د همدغه نړیوال جام د غوراوي په سیالیو کې ویسټ انډیز ته هم ماتېورکړه.

‏د دوی کپتان ایډوارډز، نور لوبغاړي اکرمن، بس دې لید، ون بیګ او ځینې نور یې مهم لوبغاړي دي او په دغو دوو بریو کې یې مهم روللوبولی دی. د هالنډ اکثریت لوبغاړي د انګلنډ په کاونټیو او کلبونو کې لوبېږي او همدا علت دی چې کرکټ یې ډېر ښه دی. دوی تر اتم اونهم لوبغاړي پورې هم بیټینګ کولای شي، الراونډران یې زیات لري.

‏تېرو لوبو ته په کتو د هالنډ لوبغاړي تېز بالران ښه لوبولای شي، مګر له سپن یا ورو توپ اچوونکو سره ستونزه لري، په دې هیله چېافغانستان دې ټکي ته پام وکړي.

دا لوبه د افغانستان لپاره ډېره مهمه ده او په بري سره به یې په جدول کې نور هم مخکې شي او ورسره سیمې فاینل او تر ټولو مهمچمپین ټرافي ته یې ورتګ کې ډېره مرسته کوي.

‏د افغانستان په لوبډلې کې فکر نکړم له ضرورت پرته کوم لوی تغیر راشي، خو د هالنډ کمزورتیا ته په کتو، شاید لکڼوال ښه انتخاب وي. لوبه په لکهنو کې ده، تېرو لوبو کې دا پچ د ورو توپ اچوونکو لپاره ښه و. خو روزونکي او کپتان به د پچ له کتو  وروسته اخري پرېکړهکوي.

‏افغانستان د لوبو ګټل پيل کړي، ان شاءالله چې له هالنډ څخه به یې هم وګټي. د پاکستان او سري لانکا سره د لوبو په څېر د ورکړل شويپلان تطبیق او ښه لوبه بری راوي. خو هالنډ باید اسان ونه ګڼل شي.

د افغانستان او هالنډ وروستۍ لوبې

‏افغانستان د ۲۰۲۲ د جنورۍ په میاشت کې په قطر  کې له هالنډ سره درې یوه ورځنۍ لوبې وکړې. هغه لوبې د همدغه نړیوال جام ته دورتګ لوبې وې. افغانستان درې صفر هالنډ ته ماتې ورکړه. هلته د هالنډ یو لوبغاړی کېنګما جریمه شوی هم و او له څلورو نړیوالو لوبو بندشوی و. هغه په لوبه کې «بال ټمپرینګ» کړی و.  بال ټمپرینګ هغه کار ته ویل کیږي چې په لوبه کې لوبغاړي په هرې وسیلې سره چې وي‌د توپ د اصلي بڼې د خرابولو هڅه وکړي او یا یې خرابه کړي. کېنګما په نوکانو باندې د بال بڼه خرابه او کنډ او کپر یې کړې وه، کله چېبال خراب شي بیا سوینګ ښه کېږي او هغه وخت کې توپ‌ وهونکي ته سرخوږی جوړیږي. دا کار د آی سي سي د قانون او ورزشياخلاقو ضد دی.

‏د افغانستان د بري په هیله.

د کرېکټ ملي لوبغاړي فرید ملک له خوا د سپینو زرو پر لیلام شوي مډال تر زر ډالرو پورته بولۍ وهل شوې.

په همدې حال کې افغان هنرمند میرخان مقري ویلي چې د فرید ملک مډال تر درې زره ډالرو پورې اخلي.

خو په ورته مهال د افغان کرېکټ ملاتړې او مینه والې وژمې ایوبي پرې بیا تر پنځه زره ډالرو پورې بولۍ وهلې.

له بل خوا لوګر کې د ټرانسپورټي شرکت مشر ګلرېز شېرازد ویلي چمتو دی چې د فرید ملک مډال په پنځه نیم زره ډالر واخلي.

ملي لوبغاړي فرید ملک ویلي چې د پاکستان سره د تېرې لوبلړۍ پرمهال یې ترلاسه کړی د سپینو زرو مډال پلوري او پیسې یې له پاکستانه راشړل شویو افغان کډوالو سره مرسته کوي.

د فرید ملک دغه اقدام او اخلاص د مینه والو له خوا له پراخ هرکلي سره مخ شوی او له نورو لوبغاړو او شتمنو یې هم غوښتي چې له پاکستانه د راغلیو کډوالو لاسنیوی وکړي.

دا چې د فرید ملک پر مډال به بولۍ څو ته پورته کیږي او څوک به یې اخلي په لنډ وخت کې به یې ښاغلی ملک خپله اعلان وکړي.

افغانستان د نړیوال جام په دوام له پاکستان وروسته دویمه پرلپسې لوبه هم وګټله او په دې توګه د دریو لوبو په ګټلو سره د نوملړ پنځم ځای ته پورته شو.

پاکستانیانو هیله درلوده چې افغان لوبډله د سریلانکا له خوا ماته شي، د دوی د تېرې ماتې غچ واخیستل شي او بیا د افغانستان ماتې په نڅاوو او سندرو ونمانځي خو افغان لوبډلې یو ځل بیا د یوې په زړه پورې لوبې په کولو سره ټول پاکستان ته ټکان ورکړ او هغوی چې د سندرو او نڅاوو ژمنې یې کړې وې هک حیران یې کړل.

افغان لوبډلې څه ډول چې تمه وه ښه لوبه وکړه او په روان نړیوال جام کې یې د نړیوالو جامونو درې اتلې لوبډلې ماتې کړې.

د افغانستان د کرېکټ مینه وال له افغان لوبډلې او ښه لوبې یې راضي دي او ټینګار کوي چې په هر حال کې به له خپلو لوبغاړو ملاتړ کوي.

بل خوا د کرېکټ برحاله او پخواني مخکښ لوبغاړي هم د افغانستان د ښو لوبو ستاینه کوي او اټکل کوي چې افغانستان کولی شي نیمه پای لوبې ته ووځي.

په همدې حال کې که افغانستان دوه نورې لوبې وګټي نیمه پای لوبې ته وځي خو د نه وتلو په صورت کې د نوملړ په پنځو لوبډلو کې د افغانستان راتلل له ښه مرغه چیمپینز ټرافۍ ته د لوبډلې تګ یقیني کړ چې په ۲۰۲۵ کال د پاکستان په کوربتوب ترسره کیږي.

د پنځوس اووریز نړیوال جام اووه مخکښې لوبډلې او کوربه پاکستان به د چمپین ټرافي په راتلونکي پړاو کې د ګډون حق ولري.

د اي اېس پي اېن مجلې د راپور پر اساس دغې ټورنمنټ ته د لار موندنې معیار او شرط د روان نړیوال جام په فهرست کې په لمړیو اته لوبډلو کې راتلل دي. د دوي په وینا لدې څخه تر اوسه هیڅ هیواد خبر نه وو او دا پرېکړه په وروستیو کې د کرېکټ د نړیوالې شورا لخوا نهایي شوې ده.

افغانستان دا وخت په نړیوال جام کې د انګلینډ، نیدرلینډ او بنګلدېش مخکې په اووم مقام قرار لري. په شویو پنځه سیالیو کې یې دوه ګټلي او درې یې باېللي. پاتې څلور لوبې یې د سرېلانکا، نیدرلینډ، سوېلي افریقا اواسټرالیا هیوادونو سره دي. په ځاې د پاتې کېدو یا مخکۍ تګ لپاره بایدلږ تر لږه دوه لوبې نورې هم وګټي.

هغه بشپړ غړي هیوادونه چې په نړیوال جام کې ګډون نلري (لکه وېسټ انډیز، زمبابوی او ایرلینډ)، چمپین ټرافي ته د کولېفاې یا لارموندنۍ لپاره هیڅ موقع نلري.

پاکستانۍ لوبډله د چمپین ټرافي برحال اتله لوبډله ده. دوي په ۲۰۱۷ کال کې هند په پاې لوبه کې په ماتې ورکولو سره یاد جام خپل کړیوو.

کچیرې افغانستان په لمړیو اته لوبډلو کې راشي او چمپین ټرافي ته لاره پیدا کړي، دا به د افغان کرېکټ په تاریځ کې لمړی وار وي چې افغانستان دا لاس ته راوړنه او ویاړ خپلوي.

له نړیوال جام د پاکستان کډې په بارېدو دي

پاکستان په نړیوال جام کې پرلپسې څلورمه ماتې هم وخوړه.

پاکستانۍ لوبډله د افغانستان له خوا له سختې ماتې خوړلو وروسته د سویلي افریقا له خوا هم ماته شوه.

د پرلپسې څلورو ماتو له خوړلو وروسته په نړیوال جام کې د پاکستان سفر او مخ ته تګ ناباوري شو.

که پاکستان خپلې پاتې لوبې وګټي او اسټرالیا پاتې لوبې وبایلې او په څنګ کې یې سریلانکا له پاتې لوبو یوه وبایلې پاکستان ته اړتیا ده چې راتلونکې لوبې په ښه رن رېټ وګټي نو بیا کولی شي چې د نړیوال جام راتلونکي پړاو ته لار پیدا کړي.

خو داسې ښکاري چې پاکستانۍ لوبډله به ونه توانیږي د راتلونکي پړاو لپاره دغه شرطونه عملي کړي ځکه د پرلپسې څلورو ماتو له خوړلو وروسته یاده لوبډله خورا ډېره ناهیلې او بې وسه ښکاري.

له بل خوا له افغانستانه ماتې خوړل د پاکستانۍ لوبډلې لپاره د زړه تر ماتېدلو هم سخته وه.

پاکستان هغه ډول چې فکر کاوه افغان لوبډله کمزورې ده او د دوی سیالي نه شي کولی خو داسې ماتې یې ترې وخوړه چې د پاکستان د کرېکټ په ټول تاریخ کې به یې نوم هېر نه شي.

اوس ټول پاکستان په دې باور دی چې نور د هند سیالي نه شي کولی او د دوی تر ټولو ډېر سرسخت سیال افغانستان دی ځکه تر څلورو ورځو یې له افغان لوبډلې پر ماتېدو ماتم وکړ او له افغانستان سره سر وهل هم ورته اوس اسانه نه ښکاري.

له کلونو وروسته نړیوال جام کې د افغانستان بریا او د هېواد والو خوښۍ

افغانستان له کلونو وروسته په نړیوال جام کې بریا ترلاسه کړه.

د ۲۰۲۳ نړیوال جام سیالیو په درشل کې افغانستان پرون د انګلېنډ پر وړاندې ولوبېد.

افغان لوبډلې د رحمن الله ګربز او اکرام علي خېل په غوره توپ وهنې سره انګلېنډ ته نسبتاً متوسط هدف ورکړ.

په دې لوبه کې هېواد وال او مینه وال د ګربز او علي خېل له توپ وهنې راضي وو خو بیا هم د لوبغاړو ځینې تېروتنې وې چې ګربز د سلیزې له پوره کولو وړاندې په اتیا منډو او ورپسې نور لوبغاړي هم زر زر وسوځېدل او دا هغه څه وو چې بریا ته یې د هېواد والو تمې کم رنګه کړې.

خو افغان لوبډلې د توپ وهنې پر مهال خپلې تېروتنې په توپ اچوونه کې جبران کړې او انګلېنډ یې پرېنښود چې هدف ته ځان نږدې کړي.

په ټوله افغان توپ اچوونکو ښه توپ اچوونه وکړه، په ځانګړې توګه د مجیب، راشد او د نبي د ورو توپ چاونې چادو د انګلینډ د منډو جوړولو مخه ډب کړه او له پښو یې وغورځول، افغانستان ته یې د نړیوال جام برحاله اتلې لوبډلې وړاندې د ۶۹ منډو په توپیر بریا خپله کړه.

له دې بریا سره هم مهاله په هېواد دننه او بهر افغانانو د افغانستان یاده لاسته راوړنه په شور او ولولو ولمانځله او د ښارونو پر سړکونو یې اتڼونه وکول.

د افغان لوبډلې مینه وال په دې باور دي چې افغانستان د خپلې وړتیا په ښکاره کولو سره ثابته کړه چې کولی شي نورې لوبې هم وګټي.

په ورته مهال د افغان لوبغاړو ترڅنګ د نړۍ یو شمېر مشهورو لوبغاړو هم افغانستان او افغانانو ته د دغې بریا مبارکي ورکړې او د افغان لوبډلې د په زړه پورې لوبې ستاینه یې کړې.

په همدې حال کې د افغانستان پرونۍ په زړه پورې لوبې هغه لوبډلې په خطر کې واچولې چې په نږدې ورځو کې ورسره مخامخ کیږي.

د افغان لوبډلې راتلونکې سیالۍ د اکټوبر په ۱۸مه له نیوزېلنډ او درویشتمه د ګاونډي پاکستان سره مخامخ کیږي.