سنرایزرز حیدر اباد د ۲۸۷ منډو په کولو سره خپل د سترو منډو هدف مات او نوی ریکارډ جوړ کړ.

د ای پي اېل سیالیو په لړ کې سنرایزرز حیدرآباد او رویل چلېنجرز بنګلور لوبډلو په خپله لوبه کې د یو بل پر وړاندې په زړه پورې مقابله وکړه.

د دې لوبې پچه چې بنګلور وګټله او په خپله خوښه یې حیدرآباد ته د توپ وهنې بلنه ورکړه، یاده پرېکړه ورته ډېره ګرانه تمامه شوه.

د حیدرآباد توپ وهوونکي دا ځل بیا د چټکې توپ وهنې په موډ کې وو او د بنګلور توپ اچوونکي یې سر پورته کولو ته پرېنښودل.

حیدرآباد د ټراوېس هېډ په ۱۰۲، هېنرېک کلاسن ۶۷، عبدالصمد ۳۷، ابشېک شرما ۳۴ او ادېن مارکرم د ۳۲ منډو پر مټ په بنګلور لوبډلې د ای پي اېل ترټولو سترې ۲۸۷ منډې جوړې کړې.

دا د ای پي اېل په تاریخ کې د سنرایزرز حیدراباد لخوا تر ټولو ستر نه ماتېدونکی هدف دی.
تر دې وړاندې یې په سږني ای پي اېل کې پر ممبۍ لوبډلې ۲۷۷ سترې منډې جوړې کړې وې.

د بنګلور توپ اچوونکو ونه شول کولی د حیدراباد د بریدګرې توپوهنې مخه ونیسي او یوازې درې لوبغاړي یې له مخې لېرې کړل.

بل پلو د بنګلور توپ وهوونکو هم د خپلې توپ وهنې په پاڼۍ کې تر خپلې وسې په زړه پورې مقابله وکړه او د هدف د ترلاسه کولو لپاره څه ناڅه ور نږدې شوي وو خو په اخیر کې د ۲۵ منډو په توپیر پاتې راغلل.

بنګلور په ټولو شل اورونو کې د ۷ لوبغاړو په زیان سره د دېنېش کارتېک ۸۳، فاف ډو پلېسیس ۶۲، ویرات کوهلي د ۴۲ او انوج راوت ۲۵ منډو پر مټ یوازې ۲۶۲ منډې جوړې کړې.

دا په داسې حال کې ده چې د ای پي اېل تر ټولو ستر هدف هم د لومړي ځل لپاره په ۲۰۱۳ کال کې د رویل چلېنجرز لوبډلې جوړ کړی وو.

پاکستانی تېز توپ اچوونکی احسان الله له اوږدې مودې راهیسې د څنګل په برخه کې د ټپي کېدو له امله په کور ناست شوی وو.

په دې وروستیو کې د پاکستان کرېکټ بورډ نوموړي ته د نه پاملرنې له امله له نیوکو سره مخ شوی.

د پاکستان سوپر لیګ د ملتان سلطان لوبډلې مالک علي ترین په اېکس شبکه کې د احسان الله لپاره غږ پورته کړ او له دې لارې د احسان موضوع په پراخه کچه رسنیزه شوه.

ښاغلي ترین ویلي، د ملتان لوبډلې مشرتابه په لاهور کې اوږده موده د احسان الله په درملنه کې مرسته کړې.

د احسان الله په اړه د علي ترین څرګندونو د پاکستان کرېکټ بورډ له سختو نیوکو او غوسو سره مخ کړو او یاد بورډ اړ شو چې د خپل لوبغاړي د درملنې لپاره سمدستي اقدام وکړي.

پاکستاني کرېکټ بورډ بلاخره تېره ورځ احسان الله لندن ته لېږلی او هلته د ډاکټر آډم واټز تر درملنې لاندې دی چې ټول لګښت به یې یاد بورډ ورکوي.

احسان الله د ۲۰۲۳ کال په اپرېل کې له نیوزیلنډ سره د پاکستان د ټېسټ لوبلړۍ پر مهال ټپي شوی وو خو پاکستان کرېکټ بورډ یې په ټپي کېدو باور نه کاوه.

دا لومړی ځل نه دی چې پاکستانی کرېکټ بورډ خپل لوبغاړي داسې له پامه غورځوي بلکې تر دې وړاندې شاهین شاه افریدي هم د ځنګون په برخه کې د ټپي کېدو له امله اړ شوی وو، په خپل شخصي لګښت د درملنې لپاره لندن ته ولاړ شي چې پاکستاني کرېکټ بورډ پرې غوږ هم نه وو ګرولی تر دې چې بیا د شاهین افریدي خسر شاهد افریدي د خپل زوم لپاره په رسنیو کې غږ پورته کړ او پاکستانی بورډ یې د نوموړي د درملنې لپاره وهڅولو.

د احسان الله او شاهین شاه افریدي په ګډون نسیم شاه، حسنین او او نور پاکستاني لوبغاړي هم د درملنې او بیا رغونې په برخه کې د پاکستاني کرېکټ بورډ او د لوبډلې د روغتیایي ډیپارټمېنټ له خوا له ورته بې غورۍ سره مخ شوي دي.

د سوداګریزو لیګونو د درې افغان ستورو اړوند لوبډلې ګجرات ټایټنز په خپله شپږمه لوبه کې په سږني ای پي اېل کې راجستان رویلز ته لومړنۍ ماتې ورکړه.

د لوبې پچه ګجرات وګټله او په خپله خوښه یې لومړی د ډګر ساتنې پرېکړه وکړه.

راجستان په ټاکلو شل اورونو کې نسبتاً بریدګره لوبه وکړه او یوازې د درې لوبغاړو په زیان یې ګجرات ته ۱۹۶ منډې هدف ورکړ.

دا ځل هم د ګجرات یوولس کسیزه لوبډله کې عظمت الله عمرزی نه وو او راشد خان او نور احمد توپ اچوونه وکړه.

راشد په څلورو اورونو کې ۱۸ منډې ورکړې او یو لوبغاړی یې وسوځاوه او نوراحمد په خپلو څلورو اورونو کې بې د کومې وېکټې له اخیستو ۴۳ منډې ورکړې.

د یاد هدف په تعقیب ګجرات خپل اووه لوبغاړي له لاسه ورکړل او په وروستیو اورونو کې پر ویشتنځای دوه افغان ستوري ښکارېدل.

راشد او نور احمد د لوبې وروستي اورونه ولوبول او د ګجرات په درېیمه بریا کې خپل رول ادا کړ.

ښاغلي خان په یوولس توپونو د چټکو ۲۴ منډو په جوړولو سره د ګجرات لپاره له ټاکلي هدف هم منډې واړولې او خپلو هندي مینه والو ته یې په اختریزه ډالۍ کې ستره بریا وړاندې کړه.

راشد خان په دې لوبه کې د غوره توپ اچوونې او توپ وهنې له امله د لوبې د غوره لوبغاړي جایزه ترلاسه کړه او لومړنی افغان لوبغاړی شو چې په سږني ای پي اېل کې د لوبې غوره لوبغاړی ټاکل کیږي.

د نوموړي په اړه له لوبې وروسته د ګجرات لوبډلمشر شوبمن ګېل په خپلو څرګندونو کې وویل: «راشد یو داسې لوبغاړی دی چې هر څوک یې په خپله لوبډله کې غواړي. د لوبې په درې واړو برخو (توپ اچوونه، توپ وهنه او ډګر ساتنه) کې خواري کښ دی.»

بل لور راجستان رویلز د راشد خان پر مټ له ګجرات د دغې لوبې په بایللو سره د سږني ای پي اېل لومړنۍ ماتې وخوړله او دوه پواینټونه یې له لاسه ورکړل.

د سترو معتبرو سوداګریزو لیګونو د مخکښو لوبډلو شل اوریز لیګ، چمپینز لیګ

د هند غوره لیګ، د اسټرالیا بېګ باش، د سویلي افریقا لیګ، پاکستان سوپر لیګ او ورته نورو سوداګریزو لیګونو د مخکښو لوبډلو شل اوریز «چمپینز لیګ» د بیا پیلولو په اړه بحثونه راپورته شوي.

دا مهال د هند، اسټرالیا او انګلېنډ کرېکټ بورډونو ترمنځ د دغه لیګ د بیا په لاره اچولو په اړه سلامشورې روانې دي.

د سوداګریزو لیګونو د شهرت په دې دوران کې اوس د مخکښو هېوادونو کرېکټ بورډونه په دې فکر کې شوي چې اوس یې وخت دی یاد چمپینز لیګ بیا پیل کړي خو د پیل پر وړاندې یې اساسي خنډ د مناسب وخت ټاکل دي.

ویل کیږي چې ښایي د نارینوو د سوداګریزو لیګونو د مخکښو لوبډلو د چمپینز لیګ نه وړاندې د ښځینوو لیګ ترسره شي او کېدی شي د نارینوو د لیګ لپاره راتلونکي یا بل کال کې مناسب وخت وکتل شي.

په ورته مهال د اسټرالیا لوبډلمشر پټ کمېنز هم د دغه لیګ پر پیلېدو ټینګار کړی او ویلي یې دي چې د کرېکټ نړیوالو او سوداګریزو لوبو ترمنځ باید تناسب وساتل شي او په دې برخه کې فوټبال ښه بېلګه کېدی شي.

کمېنز وړاندې زیاتوي چې د کرېکټ یو داسې پلټ فارم جوړولو ته اړتیا ده چې په هغې کې د هند او پاکستان په ګډون د نړیوالو لوبو او سوداګریزو لیګونو مخکښ او نوموتي لوبغاړي ولوبیږي.

کمېنز پورتنۍ څرګندونې په داسې حال کې کوي چې د پاکستان او هند ترمنځ د سیاسي ناندریو له کبله پاکستاني لوبغاړي په هند غوره لیګ کې نه اخیستل کیږي او دا راز هندي لوبغاړي له ای پي اېل پرته په بل هېڅ لیګ کې نه لوبیږي.

پټ کمینز همدا راز وایي، د چمپینز لیګ په ترسره کېدو به په کلنۍ توګه دا هم په ډاګه شي چې په نړۍ کې د کرېکټ کوم لیګ او د لیګ کومې لوبډلې پیاوړې او مخکښې دي.

په همدې حال کې د سوداګریزو لیګونو د مخکښو لوبډلو چمپینز لیګ د لومړي ځل لپاره په ۲۰۰۹ کال کې پیل او تر ۲۰۱۴ کال پورې یې شپږ پړاوه ترسره شوي وو چې له هغې را وروسته د کرېکټ بورډونو د بې پامۍ له کبله همداسې پاتې شو.

دغه لیګ څلور ځله په هند او دوه ځل په سویلي افریقا کې ترسره شوی وو چې څلور ځله د هندي غوره لیګ لوبډلو، دوه ځلې چنای سوپر کېنګز او دوه ځلې ممبۍ انډینز ګټلی وو، یو ځل د سویلي افریقا نیو سوت افریقا وېلز لوبډلې او یو ځل د اسټرالیا سېډني سېکسرز لوبډلې ګټلی وو.

بنګلور د ای پي اېل لومړنۍ لوبډله شوه چې په خپل کور کې ماتې خوري

د ای پي اېل په درشل کې رویل چلېنجرز بنګلور لوبډلې په خپل کوربتوب له کلکتې سره لوبه وکړه.

د لوبې پچه کلکتې وګټله او لومړی یې د توپ اچوونې پرېکړه وکړه.

بنګلور د خپلې توپ وهنې په پاڼۍ کې د پخواني لوبډلمشر ویرات کوهلي په بریدګرې لوبې او چټکو ۸۳ ناټ اوټ منډو مقابلې لوبډلې ته ۱۸۳ منډې هدف ورکړ.

د بنګلور لپاره ویرات ۸۳، کی مېرون ګرین ۳۳ او ګلېن مکسوېل ۲۸ ډېرې منډې جوړې کړې.

د کلکتې د توپ وهنې پاڼۍ کې د معمول خلاف الراونډر او مخکښ لوبغاړی سونیل نارین د لوبې په پیل کې راووت او خپلې لوبډلې ته یې چټک پیل ورکړ.

نوموړي د ۴۷ چټکو منډو په جوړولو سره د پاتې راتلونکو لوبغاړو لپاره هدف نږدې کړ او له مخامخ کېدونکي فشار یې وژغورل.

د کلکتې لپاره وینکاتېش لایر ۵۰، نارین ۴۷، فېل سالټ ۳۳ او لوبډلمشر شریاس لایر ۳۹ ډېرې منډې وکړې.

دا لوبه بنګلور ته په خپل کور کې د اوو وېکټو په توپیر په ماتې ورکولو پای ته ورسېده.

تر دې دمه په ای پي اېل کې ترسره شوې ټولې لوبې کوربه لوبډلو ګټلې وې خو بنګلور یوازنۍ او لومړنۍ لوبډله شوه چې په خپل کور کې یې ماتې وخوړه.

رویل چیلنجرز بنګلور له ۲۰۱۶ کال راهیسې تر اوسه په بنګلور کې د کلکته نایټ رایډرز پر وړاندې بریا نه ده ترلاسه کړې او دا یې په خپل کور کې له یادې لوبډلې شپږمه ماتې وه.

بل لور د ای پي اېل په بله لوبه کې راجستان رویلز د نوین الحق اړوند لوبډلې لکنو سوپر جاینټز ته د ۲۱ منډو په توپیر ماتې ورکړه.

د ممبۍ انډینز لپاره د هاردېک پانډیا تازنۍ لوبډلمشري او پر وړاندې یې مخالفتونه

د ګجرات ټایټنز پخوانی لوبډلمشر هاردېک پانډیا چې د ای پي اېل سږني پړاو کې د ممبۍ انډینز لوبډلمشري کوي، د نوموړي د ټاکل کېدو له پیله تراوسه یې د لوبډلمشرۍ پر وړاندې مخالفتونه او غبرګونونه نه دي ساړه شوي.

پانډیا چې د ممبۍ پخوانی لوبغاړی دی او په تېر پړاو کې ګجرات د لوبډلمشر په توګه اخیستی وو، سږ کال خپلې پخوانۍ لوبډلې بېرته له ځان سره کړ خو د نوموړي یو شرط دا وو چې باید لوبډلمشري ورکړل شي.

د ممبۍ تېر لوبډلمشر روهېت شرما چې په ټول ای پي اېل کې یو له مخکښو لوبډلمشر دی او تر اوسه یې د یادې لوبډلې په څو ګونو اتلولیو کې رول لوبولی له سږنۍ لوبډلمشرۍ کېنول شوی او پانډیا یې ځایناستی ټاکل شوی دی.

د لوبډلمشر په توګه د پانډیا له ټاکل کېدو سره هغه وخت د بومرا په ګډون د ممبۍ یو شمېر لوبغاړو هم مخالفت ښودلی وو.

که څه هم د ای پي اېل تېر کلني پړاو کې د ګجرات لپاره د پانډیا لوبډلمشري د راشد خان په څېر لوبغاړو او اشېش نېهرا په څېر روزونکو سره بریالۍ وه او ګجرات یې تر پای لوبې ورساوه خو سږکال یې د ممبۍ لپاره د لوبډلمشر په توګه د ای پي اېل پرانیسته بریالۍ نه وه.

د نوموړي د لوبډلمشرۍ پر وړاندې نه یوازې د ممبۍ بلکې د نورو لوبډلو مینه وال هم خپل مخالفتونه او غبرګونونه لري او د ممبۍ لپاره پانډیا د لوبډلمشرۍ وړ نه ګڼي.

سږکال ممبۍ خپله لومړنۍ لوبه د پانډیا پخوانۍ لوبډلې ګجرات ټایټنز ته وبایلله او پانډیا د لوبډلمشر په توګه خورا سختې شېبې او فشار تېر کړ تر دې چې میدان ته راغلیو ټولو مینه والو پرې پېغور ډوله چغې او نارې وهلې چې ګواکې لوبډلمشري نه شي کولی.

په همدې حال کې بیا د کرېکټ هندي شننونکي سونیل ګاواسکر د پانډیا د ډاډ او حوصلې لپاره ډېر په ځغرده وویل چې د ممبۍ د مینه وال په توګه یې ملاتړ کوي په داسې حال کې چې شننونکي او کمېنټېټران تل بې طرفه وي او کوم قاطع لوری نه اخلي.

د هاردېک پانډیا لپاره تر دې وروسته د لوبډلمشر په توګه له ګجرات سره مخامخ کېدل خورا سخت دي ځکه نوموړی د یادې لوبډلې پخوانی مشر وو او له ممبۍ لوبډلې نه شي کولی د افغان لوبغاړو په ګډون د ګجرات له لوبډلې سره وجنګیږي.

اسټرالیا له افغانستان سره راتلونکې شل اوریزه لوبلړۍ وځنډوله

د اسټرالیا کرېکټ بورډ اعلان کړی چې له افغانستان سره یې په راتلونکې اګسټ میاشت کې ترسره کېدونکې شل اوریزه لوبلړۍ وځنډوله.

یاد بورډ د ځنډولو لامل په افغانستان کې د ښځو او نجونو اوسنی وضعیت او په نړۍ کې د ښځینه وو د کرېکټ وده په ګوته کړې ده.

د اسټرالیا کرېکټ بورډ وایي پرېکړه یې له حکومت سره په مشوره کړې او له افغانستان سره به د راتلونکو لوبو په اړه د کرېکټ نړیوالې شورا او افغان کرېکټ بورډ سره په جریان کې پاتې شي او تجدید نظر به ورباندې کړي.

له دې داسې ښکاري چې د اسټرالیا کرېکټ بورډ په خپلو ځینو پرېکړو کې خپلواک نه دی او ډېر کله یې حکومت د خپلو سیاسي موخو لپاره په چارو کې لاسوهنه کوي.

دا په داسې حال ده چې په کرېکټ او نورو لوبو کې تل ټینګار پر دې کیږي چې لوبغاړي او اړوندې ادارې یې باید له سیاسي اغېزو او حکومتي لاسوهنو لېرې وي او د دې ترڅنګ باید کرېکټ او سیاست جلا وي، نه باید سیاست ورزشي اړیکې خرابې کړي خو په دې وروستیو کې د پاکستان او هند او اسټرالیا او افغانستان په لوبو د سیاست اغېز له ورایه ښکاري.

اسټرالیا تر دې وړاندې په ۲۰۲۱ کال کې په افغانستان کې د سیاسي بدلون له امله ټېسټ لوبه او بیا ۲۰۲۳ کال په مارچ میاشت کې هېواد کې د بشري حقونو د وضعیت له امله له افغان لوبډلې سره یو ورځنۍ لوبلړۍ لغوه کړې وه.

د اسټرالیا د یادې پرېکړې په غبرګون کې یو شمېر افغان ستورو لکه راشد خان او نوین الحق او ګڼو نورو د یاد هېواد له سوداګریز لیګ سره پرېکون اعلان کړ او تر دې دمه په کې ونه لوبېدل.

له بلې خوا په تېر نړیوال جام کې د اسټرالیا او افغانستان د لوبې پر مهال نوین الحق یاد هېواد ته پېغور هم ورکړی وو چې اوس ورته بشري حقونه مهم نه دي بلکې دوه پواینټونه مهم دي.

شننونکي وایي په ټوله کې د اسټرالیا دا پرېکړه سیاسي رېښه او موخې لري که یاد هېواد واقعاً بشري حقونو ته ژمن وی، نو په تېر نړیوال جام کې به هم له افغانستان سره له لوبې لاس په سر شوی وی او له هغې وړاندې به یې په ۲۰۲۲ کال کې په خپل کور کې نړیوال جام کې د افغانستان د ګډون مخه نیولی وی.

له اجرائیه ریئسانو سره د کرېکټ نړیوالې شورا ناسته او نوې پرېکړې

د کرېکټ نړیوالې شورا د جمعې په ورځ د هېوادونو د کرېکټ بورډونو له اجرائیه رییسانو سره ناسته وکړه، د سپین بال فارمټ پر ځینو اصولو یې تجدید نظر وکړ او ځینې نوي قوانین یې وضع کړل.

نړیوالې شورا تېرکال په دېسمبر میاشت کې په امتحاني ډول یو قانون وضع کړی وو چې د سپین بال فارمټ لوبو کې باید هر اوور پسې بل اوور په ۶۰ ثانیو کې پیل شي که دوه ځل داسې پیل نه شي نو کومه خبره نه ده خو که درېیم ځل هم پیل نه شي نو مقابلې لوبډلې ته پنځه منډې پنالتې ورکول کیږي.

دا قانون له دېسمبر تر اپرېل میاشت په امتحاني ډول وو.
نړیوالې شورا اوس د دغه قانون مثبتو پایلو ته په کتو چې لوبه په کې لنډه او زر خلاصیږي، اوږدمهاله کړ او د راتلونکي شل اوریز نړیوال جام نه به د دغه قانون حتمي پلي کول پیل شي.

بل لور په دې ناسته کې د راتلونکې نړیوال جام د نیمه پایلوبې او پایلوبې لپاره د ریرزف یا احتیاطي ورځې په اړه هم پرېکړه وشوه چې د باران یا بل عذر پر مهال دا لوبې بلې ورځې ته واړول شي.

او په نړیوال جام کې د ګروپ سټېج هغه لوبو کې چې پر مهال یې باران کیږي د پوره لغوه کېدو پر ځای به یې له دې وروسته هغه لوبډله چې دویم توپ وهنه کوي حداقل پنځه اووره لوبوي او د ناک اوټ سټېج لوبو کې به لږ تر لږه لس اووره کیږي څو ګټوونکی او بایلوونکی لوری معلوم شي.

او د ناستې وروستۍ پرېکړه دا شوه چې د ۲۰۲۶ کال د شل اوریز نړیوال جام لپاره به دولس لوبډلې مستقیم لاره پیدا کوي.
په دغو لوبډلو کې به اته هغه لوبډلې وي چې د سږکال شل اوریز نړیوال جام له مخې په نوملړ کې تر اتمې شمېرې ځایونه خپلوي او پاتې څلور لوبډلې به د رنکګېنګ له مخې وځي او اته نورې لوبډلې به د غوراوي پړاو نه له تېرېدو وروسته لار پیدا کوي.

په شل اوریزه لوبلړۍ کې د ایرلېنډ له خوا د افغانستان ماتې خو د ځوانو لوبغاړو ځلېدل

افغانستان د ایرلېنډ پر وړاندې د شل اوریزې لوبلړۍ لومړۍ لوبه د ۳۸ منډو په توپیر بایلوده.

په لوبه کې دا ځل د تېر خلاف د نوملړ ټولو ځوانو لوبغاړو ته د لوبېدو موقع ورکړل شوې وه.

د لوبې پچه افغانستان وګټله او لوبډلمشر راشد خان لومړی د ډګر ساتنې پرېکړه وکړه.

افغانستان د خپلو ځوانو استعدادونو پر مټ د توپ اچوونې ښه پیل درلود.

راشد خان له اوږد ځنډ وروسته یو ځل بیا په خپل پخواني سټایل او جادو را وګرځېد.

په ډګر ساتنه کې هم د افغان لوبغاړو خواري له پامه د غورځولو نه ده.

راشد خان او ننګیال خروټي د توپ اچوونې په زړه پورې ننداره وړاندې کړه.

راشد درې او ننګیال دوه لوبغاړي وسوځول او کمې منډې یې ورکړې.

په لومړیو کې پر ایرلېنډي لوبغاړو د افغان توپ اچوونکو او ډګر ساتونکو فشار او اغېز ډېر وو وېکټې یې زر له لاسه ورکړې خو په وروستیو اورونو کې هېري ټېکټر بریدګره لوبه وکړه ۵۶ ناسوځېدلې منډې یې جوړې کړې او د ایرلېنډ هدف یې تر یو نیم سلو منډو ورساوه.

افغانستان د ایرلېنډ د ۱۵۰ منډو په تعقیب کې پاتې راغی او په ۱۱۱ منډو یې ټول لوبغاړي له لاسه ورکړل.

افغان پیلیزو لوبغاړو ونه شول کولی ښه پیل واخلي، رحمن الله ګربز په صفر او صدیق اتل په یوه منډه وسوځېده.

له دې وروسته منځنیو لوبغاړو لکه ابراهیم ځدراڼ او عظمت الله عمرزي هم لوبه ونه شوه کړی.

د افغانستان یوازې درې چټک لوبغاړي په صفر منډو وسوځېدل او پاتې لوبغاړو هم د هدف پوره کولو لپاره ملا ونه تړله.

د افغانستان لپاره یوازې اسحاق رحیمي غوره او تېزه توپ وهنه وکړه او په ۲۲ توپونو یې ۳۳ منډې جوړې کړې له اسحاق وروسته محمد نبي ۲۵ او اعجاز احمدزي ۱۶ ډېرې منډې وکړې.

د ایرلنډ لوبډلې بېن وایټ د افغانستان څلور لوبغاړي، جوش لېټل درې، مارک اداير او بري مکارتې یو یو توپ وهوونکی وسوځاوه.

که څه هم د ځوانو لوبغاړو په راتګ سره د افغانستان بریا ته هیلې وې خو له محمد اسحاق او ننګیالي پرته نور لوبغاړي ډېر ګټور او اغېزمن تمام نه شول.

خو مینه وال وایي، ګټه په تاوان کیږي، د ځوانو لوبغاړو لومړنۍ نړیوالې لوبې دي. دا چې ولوبېدل او ځینو یې له ځانه وړتیا ښکاره کړه، افغانستان په دې سره د عصري کرېکټ لپاره نوي استعدادونه ترلاسه کړل چې همدا بسنه کوي.

افغانستان او اېرلېنډ به د دویمې شل اوریزې لوبې لپاره سبا سره مخامخ شي.