په اسټراليا کې له تيرو څلويښتو کلونو راهیسې هر کال د ډيسمبر مياشتې په ۲۶مه په مېلبورن کرکټ لوبغالي کې د اسټراليا او يوې ميلمه لوبډلې ترمنځ ټيسټ لوبه ترسره کيږي، چې د باکسينک ورځې ټيسټ لوبې په نوم ياديږي.
اوس له ډيرو کرکټ مينه والو سره پوښتنه پيدا کيږي، چې ولې په دې ورځ پيل کيدونکې ټيسټ لوبې ته د باکسينګ ورځې ټيسټ لوبه ويل کيږي؟
اصل کې دلته له باکسينګ موخه دا نه ده چې دوه کسان پر يو بل وارونه کوي، بلکې دغه اصطلاح د کريسمس جشن پورې تړلې ده، چې په سبا يعنې د ډيسمبر په ۲۶مه په اسټراليا، نيوزيلينډ، کاناډا، انګلينډ او ځينې نورو هيوادنو کې خلک یو بل ته په باکسونه کې ډالۍ ورکوي، چې له امله يې دغه ورځ د باکسينګ او دغه لوبه هم د باکسينګ ورځې لوبې په نوم ياديږي.
د باکسينګ ورځې لوبه ۱۳۰ کاله تاريخ لري، د لومړي ځل لپاره د اسټراليا په شېفل شېلټ سياليو کې د دوه کورنيو لوبډلو ويکټوريا او نيو ساوت ويلز ترمنځ په ۱۸۹۲ کال کې ترسره شوه، له دغې لوبې ۵۸ کاله وروسته په ۱۹۵۸ کال کې د لومړي ځل لپاره په نړيوال کرکټ کې په دغه ورځ د اسټراليا او انګلينډ ترمنځ لوبه ترسره شوه، چې دغه لړۍ له همغه تاريخ پيل شوه او وروسته په ۱۹۵۲، ۱۹۶۸، ۱۹۷۴ او ۱۹۷۵ کالونو کې دغه ټيسټ لوبه د اسټراليا په مېلبورن کرکټ لوبغالي کې ترسره شوي، د دې ترڅنګ په ۱۹۷۲ او ۱۹۷۶ کلونو کې دغه ټيسټ لوبه د اسټراليا په ايډليډ لوبغالي کې ترسره شوې.
خو له ۱۹۸۰ کال راهيسي په همدې ورځ په او مېلبورن کرکټ لوبغالي کې هرکال د باکسينګ ورځې ټيسټ لوبه ترسره کيږي.
د يادونې وړ ده چې دغه سيالۍ نه يوازې په اسټراليا بلکې په افريقا، نيوزيلينډ او نورو هيوادنو کې هم ترسره کيږي، چې سږکال به افغانستان هم په لومړي ځل د باکسينګ ورځې ټيسټ لوبه ترسره کړي او د کوربه زيمبابوې په وړاندې به سبا د ډيسمبر مياشتې په ۲۶مه د سيالۍ ډګر ته ښکته شي.
د باکسينګ ورځې په دوه نورو ټيسټ لوبو کې بيا سږکال کوربه سويلي افريقا د پاکستان په وړاندې او هند به د کوربه اسټراليا په وړاندې د سيالۍ ډګر ته ښکته شي.