له هند او سویلي افریقا پرته افغانستان د کرېکټ ټولې مخکښې لوبډلې ماتې کړې
افغان ملي لوبډلې چې له کږلیجونو ډک څو کلن مزل یې وکړ، ډېر ژر یې د نړیوالې شورا بشپړ غړیتوب ترلاسه کړ او په کمه موده کې یې ځان د مخکښو لوبډلو ځای ته ورساوه، تر دې مهاله یې د کرېکټ مخکښې، نوموتې، اتلې او پیاوړې څلور لوبډلې ماتې کړې دي.
افغانستان د لومړي ځل لپاره په هند کې د تېر ۲۰۲۳ کال یو ورځني نړیوال جام پر مهال د اکټوبر په ۱۵مه د نړیوال جام اتلې لوبډلې انګلېنډ ته د ۶۹ منډو په توپیر ماتې ورکړه او په دې سره یې په نړیوال فارمټ کې لومړنۍ مخکښه لوبډله ماته کړه.
له دې بریا وروسته د افغان لوبډلې سترګه یو څه سره شوه او په همدې یو ورځني نړیوال جام کې یې د انګلېنډ له ماتولو څو ورځې وروسته د اکټوبر په ۲۳مه پاکستان د ۷ وېکټو په توپیر مات کړ.
د جغرافیوي موقعیت او سیاسي کړکېچونو له مخې د پاکستان ماتول د افغان لوبډلې او افغانانو یوه لویه هیله وه.
د اکټوبر ۲۳مه هغه نېټه ده چې هېڅکله به د یو افغان هم هېره نه شي او لا یې هم په خواله رسنیو کې یاده کیږي.
په همدې حال کې افغانستان د درېیمې مخکښې لوبډلې په توګه په روان شل اووریز نړیوال جام کې نیوزیلنډ مات کړ.
افغان لوبډلې د جون په اتمه نیوزیلنډ ته په ګیانا لوبغالي کې د ۸۴ منډو په توپیر ماتې ورکړه.
او څلورمه نه هېرېدونکې او په زړه پورې بریا څو ورځې د نړیوال جام د بلې اتلې لوبډلې اسټرالیا پر وړاندې وه.
افغانستان چې په تېر نړیوال جام کې ترې اسټرالیا بچ شوې وه، سږ یې په شل اووریز جام کې داسې ماتې ورکړه چې ټول عمر به یې په یاد وي.
بل لور دا مهال هند او سویلي افریقا یوازنۍ لوبډلې دي چې تراوسه افغانستان نه دي ماتې کړې او ترې روغې وتلې دي.
له سویلي افریقا سره د افغانستان وروستۍ لوبه د ۲۰۲۳کال په تېر یو ورځني نړیوال جام کې د نومبر په ۱۰مه وه چې سویلي افریقا په کې افغان لوبډلې ته په ۵ وېکټو ماتې ورکړه.
له دې ټولو سره سره، له هند سره د افغان لوبډلې وروستۍ لوبه بیا د جون په ۲۰مه د روان نړیوال جام د اتو غوره لوبډلو پړاو کې وه چې افغانستان په کې د ۴۷ نورو منډو په پوره کولو کې پاتې راغی.
دا په داسې حال کې ده چې افغانستان د لومړي ځل لپاره د شل اووریز نړیوال جام نیمه پایلوبې ته لار پیدا کړه او په دې پړاو کې له سویلي افریقا سره پای لوبې ته د وتلو لپاره سبا د افغانستان پر وخت سهار پنځه بجې د سیالۍ ډګر ته ښکته کیږي.
په ورته مهال څو ورځې وړاندې د اسټرالیا پر وړاندې له بریا وروسته لوبډلمشر راشد خان د ای سي ای د همکار د پوښتنې په ځواب کې چې کله به هند ماتوي؟ وویل، د هند ماتول هم لېرې نه دي او ښایي په همدې نړیوال جام کې هند ته هم ماتې ورکړو انشاالله.