په ۲۰۲۵ز کال کې د پاکستان سوپر لیګ راتلونکی لسم پړاو له خپل معمول وخت وروسته د اپرېل او می میاشتو ترمنځ ترسره کیږي.
د دغه لیګ د ترسراوي نېټې په وروسته کېدو سره د بولۍ د ترسره کېدو نېټه هم وروسته شوې او د ۲۰۲۵ کال د جنورۍ په یوولسمه له پاکستانه بهر ترسره کیږي.
د ای سي ای د راپورونو پر بنسټ، دا چې د آی پي اېل او پي اېس اېل سیالیو وختونه له یو بل سره په ټکر کې دي داسې انګیرل کېدل چې پې اېس اېل به خپل ډېر نړیوال او مخکښ لوبغاړي له لاسه ورکړي. خو بل لور د پاکستان سوپر لیګ فرنچائزونو پرېکړه کړې چې د آی پې اېل له بولۍ پاتې او نه پېرل شوي لوبغاړي دوی واخلي.
راپورونه ښيي، چې د پاکستان سوپر لیګ لوبډلو د دغه هېواد بورډ ته د هغو لوبغاړو نوملړ سپارلی چې ای پي اېل کې نه دي پېرل شوي او غواړي د پاکستاني لیګ له بولۍ وړاندې له دغو لوبغاړو سره خبرې وکړي چې په سوپر لیګ کې ولوبیږي.
په همدې حال کې ویل کیږي چې تراوسه د افغان لوبغاړو له ډلې محمد نبي او مجیب ځدراڼ پاکستاني لیګ ته نوملیکنه کړې او په ډېر احتمال سره یې د قرارداد په اړه هم خبرې شوې دي. تراوسه د نورو افغان لوبغاړو په اړه کوم خبر نشته.
دا په داسې حال کې ده چې تېر کال لسګونه افغان لوبغاړو د پاکستان سوپر لیګ ته نوملیکنه کړې وه خو یوازې درې لوبغاړي راشد خان، نوین الحق او نور احمد پېرل شوي وو. او یادو درېیو لوبغاړو هم سوپر لیګ تحریم کړ. راشد خان د ملا په برخه کې د جراحۍ او نوین الحق او نور احمد د سریلانکا پر وړاندې د افغانستان د لوبلړۍ له امله په سوپر لیګ کې ونه لوبېدل.