د الله محمد غضنفر جادویي توپ اچوونه او د نوموړي د کرېکټ د سفر پیل
ځوان ورو توپ اچوونکی الله محمد غضنفر دا مهال په ملي لوبډله کې د توپ اچوونې د ملا تیر بلل کیږي.
نوموړي په دې وروستیو کې په هره لوبه کې غوره توپ اچوونه کړې په ځانګړې توګه د زمبابوې پر وړاندې یو ورځنۍ لوبلړۍ کې یې توپ اچوونه خورا ډېره د پام وړ وه.
غضنفر د یو ورځنۍ لوبلړۍ په دوو لوبو کې په خپلې جادویي توپ اچوونې سره ټولې اته وېکټې ترلاسه کړې چې دې ورځو کې د نړیوالو رسنیو د خبرونو سرټکی جوړ شوی.
دا چې څنګه غضنفر د کرېکټ سفر پیل او دومره زر تر نړیوال سټېج راورساوه، د نوموړي له بېلابېلو مرکو مو را اخیستي.
الله محمد غضنفر په خپله یوه مرکه کې ویلي، د کرېکټ د پیل وختونو کې یې خپله وړتیا نه وه پېژندلې او تېزه توپ اچوونه یې کوله خو د روزونکي له مشورې وروسته یې ورو توپ اچوونه پیل کړه او خپله وړتیا یې په کې وښودله.
غضنفر د کرېکټ رسمي سفر په ۲۰۲۰ کال کې له ۱۶ کلنو کم عمره لوبډلې سره پیل کړ او له دې لوبدلې بریالی راووت چې له مخې یې ورو ورو د ګرېډ ټو او فرسټ کلاس په ګډون کورنیو سیالیو ته لار پیدا کړه.
نوموړي ویلي کله یې چې په ماشومتوب کې په کلي کې ټېنس بال کرېکټ کاوه نو ده او ملګرو به یې په ځان د ملي لوبډلې لوبغاړو نومونه اېښودل خو یوه ورځ داسې هم راغله چې په شپږیزه لیګ کې له همغو لوبغاړو سره ولوبېد.
غضنفر سره له دې چې په شپږیزه لیګ کې نه وو اخیستل شوی او نه د نوملړ برخه وو، خو د لومړي ځل لپاره په «۲۰۲۲» کال کې کله چې دوه پاکستاني لوبغاړي د امنیتي اندېښنو له کبله له کابل ووتل، غضنفر له مېس عینک لوبډلې سره د لوبې ډګر ته ښکته شو او په خپلې ښې توپ اچوونې سره د لوبې غوره لوبغاړی هم ونومول شو.
د غضنفر په وینا، د توپ اچوونې د بریا راز یې دا دی چې ډېر زر په شپږیزه لیک کې له ملي لوبغاړو سره یوځای شو او بېلابېلې تجربې یې ترلاسه کړې.
غضنفر ویلي، مشر ورور یې کرېکټ کولو ته وهڅولو او د ځینو مواردو په زده کولو کې یې هم خواري ورسره کوله.
که څه هم د غضنفر د کرېکټ لوبیز سفر ډېر له کړکېچونو او پېچومو سره مل نه وو خو په کم وخت کې یې ډېره اوږده لاره ووهله او په نړیوال جام کې له ۱۹ کلنې لوبډلې سره تر ښې کارکردګۍ وروسته په ای پي اېل کې کلکتې لوبډلې د مجیب د ځایناستي په توګه له ځان سره کړ.
نوموړی تر ټولو کم عمره افغان لوبغاړی وو چې په ای پي اېل کې وپېرل شو او له هغې وروسته یې نورو لیګونو ته هم لارې پرانیستل شوې.
غضنفر دا مهال د ای پي اېل په ګډون د لانکا پریمیر لیګ، متحده عربي اماراتو ټي ټين لیګ او یو شمېر نورو نړیوالو لیګونو برخه دی.
نوموړي په خپله یوه مرکه کې ویلي چې له کرېکټ ور ها خوا یې فري فایټ او فوټبال سره هم مینه ده او کرېکټ ته له راتګ مخکې یې فري فایټ او فوټبال کاوه.
غضنفر دا مهال ټولې ۱۱ یو ورځنۍ لوبې کړي چې ۲۱ وېکټې یې په کې ترلاسه کړي او له محیب الرحمن وروسته چې نوموړي د افغانستان لپاره په خپلو لومړنیو ۱۱ یو ورځنیو لوبو کې ۲۷ وېکټې اخیستې وې، دویم ریکارډ ثبت کړی.