نن د سپټمبر ۹مه د ۲۰۲۵ کال اسیایي جام سیالۍ د متحده عربي اماراتو د ابوظبي په شېخ زاید لوبغالي کې پیل شوې.
د سږني آسیا جام لومړنۍ لوبه د افغانستان او هانګ کانګ هېوادونو ترمنځ ترسره شوه.
افغان لوبډلمشر راشد خان د لوبې پچې په ګټلو د لومړۍ توپوهنې پرېکړه وکړه.
د افغان توپوهونکو له ډلې پیلیز توپوهونکي صدیق الله اتل ۷۳ ، عظمت الله عمرزي ۵۳ او محمد نبي ۳۳ منډې ترسره کړې او مقابلې لوبډلې ته یې د ۱۸۹ منډو لوړ هدف وټاکه.
په توپ اچونه کې د هانګ کانګ لوبډلې لپاره کېنچېټ شاه او شوکلا دوه دوه لوبغاړي وسوځول.
په دویم ایننګز کې د هانګ کانګ لوبډله یواځې د ۹۴ منډو په ترسره کولو بریالۍ شوه او د آسیا جام لومړنۍ لوبه یې د ۹۴ منډو په توپیر وبایلله.
د افغان توپ اچوونکو له لوري فضل الحق فاروقي او ګلبدین نایب دوه دوه او ورسره راشد خان، عظمت الله او نور احمد یو یو لوبغاړی وسوځوه.
عظمت الله عمرزی د ۵۳ منډو او یوې وېکټې په اخیستو د لوبې غوره لوبغاړی وټاکل شو.
په ورته وخت کې عظمت الله عمرزی وتوانېده چې په نړیوالو شل اوریزو لوبو کې د افغان لوبډلې په ګټه په ۲۰ توپونو تر ټولو چټکه پنځوسیزه ترسره کړي.
د روان ۲۰۲۵ کال آسیا جام سیالیو په لړ کې به افغاستان په B ګروپ کې خپلې پاتې دوه نورې لوبې له سریلانکا او بنګله دېش سره ترسره کړي .