Category: پښتو

by Spogmai Gharanai

د ۲۰۲۶ز کال شل اووریز نړیوال جام لپاره د افغانستان لویه ضایع

افغان چټک توپ اچوونکی نوین الحق د وېسټ انډیز پر وړاندې شل اوریزې لوب‌لړۍ او ورسره د راروان ۲۰۲۶ز شل اوریز نړیوال جام له سیالیو بهر شو.
د ملي لوبډلې پیاوړی چټک توپ اچوونکی نوین الحق د ښي لاس د اوږې پر هډوکي د ډېر فشار راتلو له امله د رامنځته شوي درز له وجې راروانو لوبو لپاره د ملي لوبډلې له ترکیب لرې کړای شو.

نوین الحق ته د ۲۰۲۵ کال فبرورۍ په میاشت د اوږې د عملیات ترسره کولو وروسته د ډاکټرانو لخوا د څه مودې لپاره استراحت سپارښتنه شوې وه. له سرجري وروسته نوموړي د جولای په میاشت کې د امریکا په میجر لیګ کې راڅرګند او یو وار بیا ټپي شو، چې له امله یې ونشو کړای په ۲۰۲۵ز کال آسیا جام سیالیو کې چې د سېپټمبر میاشت کې ترسره شوې، د ملي لوبډلې سره مل شي. د لنډې دمې وروسته یو وار بیا د دوبۍ تجارتي لیګ د مای امارات په لباس کې د دوه لوبو کولو وروسته یې ټپونه بیا تازه شو چې له وجې به یې د افغانستان لپاره د ۲۰۲۶ز کال نړیوال جام کې هم غیرحاصر وي.

د کرېکټ بورډ د خبر په اساس نوین الحق د لا ښې درملنې په موخه انګلستان هېواد ته تللی.

که څه هم نوین الحق د کرکټ په ډګر کې د خپل لوبیز ژوند د اوږدېدو او ډېر دوام لپاره له یو ورځنیو لوبو لاس په سر شوی خو لا هم د تېر یو کال راهیسې پدې نه دی توانېدلی چې د ټپونو له امله په شل اوریزو لوبو کې د افغانستان استازیتوب وکړي.

نوموړی چې د ملي لوبډلې تکړه او کلیدي لوبغاړو له ډلې دی چې شتون یې په لوبو کې په مقابلې لوبډلې د فشار راوستو لامل کیدای شي.

د افغانستان کرېکټ بورډ د نوین الحق په نشتون کې ،بل چټک توپ اچوونکې ضیاالرحمن شریفي د وېسټ انډیز په وړاندې لوبلړئ او ورسره راروان شل اوریز نړیوال جام لپاره د ملي لوبډلې نوملړ ته اضافه کړ.

په ورته مهال د ملي لوبډلې بل چټک توپ اچوونکی فرید ملک د لوبډلې سره د احتیاطي لوبغاړو ډله کې شامل شو.

د یادونې وړ ده چې نوین الحق چې په ۲۰۲۴ شل اوریز نړیوال جام کې د ملي لوبډلې سره یوځای وو، او د چټکې توپ اچوونې په برخه کې د ښې کارکردګۍ له امله افغان لوبډلې وکولای شول نیمه پایلوبې ته لار پیدا کړي، چې په سږکال نړیوال جام کې به یې نشتون او لوبډله کې تشه تر ډېره محسوسه شي.

ټاکل شوې افغان کرکټ ملي لوبډله د روانې اوونۍ پر یکشنبې ورځ د جنورۍ په ۱۹مه نېټه د وېسټ انډیز پر وړاندې درې شل اوریزو لوبو لوبلړئ پیل کړي، او ورسره د راتلونکې فبرورۍ میاشت کې په شل اوریز نړیوال جام کې برخه واخلي.

by Spogmai Gharanai

د ۱۹کلنو نړیوال جام پیل او د افغان لوبډلې لومړۍ بریا

د ۱۹ کلنو نړیوال جام سیالۍ تېره ورځ د جنورۍ په ۱۵مه نېټه د زیمبابوی او نمیبیا په کوربتوب پیل شوې.

د دې جام پر لومړۍ ورځ له درې سیالیو دوه لوبې وشوې چې ګټونکې لوبډلې یې وېسټ انډیز او هند وې. وېسټ انډیز تانزانیا ته او هند لوبډلې د امریکا متحده ایالاتو ۱۹کلنې لوبډلې ته ماتې ورکړه د لومړۍ ورځ دریمه لوبه دزمبابوی او سکاټلینډ تر منځ وه چې د اورښت له وجې لغوه شوه.


نن د نړیوال جام د پیل په دویمه ورځ افغان ۱۹کلنه لوبډله د جنوبي افریقا ۱۹کلنې لوبډلې په وړاندې د سیالۍ ډګر ته ښکته شوه.

د سویلي افریقا لوبډلمشر د لوبې پچه وګټله او د افغان ۱۹کلنې لوبډلې په وړاندې یې د لومړۍ توپ اچوونې پرېکړه وکړه.

افغان لوبډلې د ۸ لوبغاړو په سوځېدو ۵۰ اوورنو کې ۲۶۶ منډ جوړې کړې.
د افغان لوبډلې په ګټه فیصل شینوزاده ۸۱ منډې، خالد احمدزي ۷۴ او عزیر الله نیازي ۵۱ ډیرې منډې ترسره کړې.
سویلي افریقا لوبډله د هدف په پوره کېدو کې پاتې راغله، ټوله لوبډله یې په ۲۳۸ منډو وسوځېده، او لوبه یې د ۲۸ منډو په توپیر وبایلله.
افغان ۱۹کلنې لوبډلې ته د توپ اچوونې برخه کې عبدالعزیز او خاطر ستانکزي دوه دوه ، حفیظ ځدران او نورستاني عمرزي یوه یوه وېکټ ترلاسه کړه.

له دې سره افغان لوبډلې هم د ۲۰۲۶ ، ۱۹کلنو نړیوال جام په بریا سره پیل کړ.
عزیرالله نیازي په ۵۲ منډو او دوه کېچونو نیولو د لوبي غوره لوبغاړي جایزه ترلاسه کړه .

د یادونې وړ ده چې په ننۍ لوبه کې افغان لوبډلې لپاره په دویمه وېکټ د فیصل شینوازده او خالد احمدزي ترمنځ د ۱۵۲ منډو په زړه پورې او اوږده ملګرتیا ترسره شوه چې د افغان ۱۹ کلنې لوبډلې لپاره یې په یوورځنیو لوبو کې د نعمان شاه او سهیل خان زرمتي د ۱۵۱ منډو د ملګرتیا ریکارډ مات کړ.

ټاکل شوې په سږکال ۱۹کلنو نړیوال جام کې ټولې ۴۱ لوبې د ۱۶ لوبډلو په ګډون ترسره شي.
د افغانستان په ګډون آسټرالیا، هند، جنوبي افریقا، اېنګلنډ، بنګلدېش، آیرلنډ، جاپان، سریلنکا، نیوزیلنډ، پاکستان، سکاټلنډ، وېسټ انډیز، تانزانیا، نمیبیا او زیمبابوی د سږکال ۱۹کلنو نړیوال جام ګډون کوونکې لوبډلې دي، چې د تانزانیا هېواد د لومړي ځل لپاره ۱۹کلنو نړېوال جام ته لار موندلې ده.

ټولې لوبډلې په څلورو ګروپونو ویشل شوي دي، د افغاستان سره په ډي ګروپ  کې د جنوبي افریقا، وېسټ انډیز او تانزانیا لوبډلې ځای لري.

په ورته مهال د آسټرالیا ۱۹کلنه لوبډله د تیر پړاو ۱۹کلنو نړیوال جام اتله لوبډله ده.
د ۱۹ کلنو نړیوال جام کې تر دې دمه هند تر ټولو ډیر پنځه او د آسټرالیا ۱۹ کلنې لوبډلې څلور ځله اتلولي ګټلې ده.

by Bashir Gharwal

ویسټ انډیز د کلیدي لوبغاړو په نه شتون کې د افغانستان خلاف لوبډله اعلان کړه

د افغانستان خلاف د شل اووریزو سیالیو لپاره ویسټ انډیز د برانډن کینګ تر لوبډلمشرۍ لاندې شپاړس کسیزه لوبډله اعلان کړه. کینګ لدې وړاندې هم د خپل هیواد لوبډلمشري کړې، نوموړي په وروستي وار دغه مسوولیت د سوېلي افریقا خلاف خلاف په ۲۰۲۴ز کال کې ترسره کړی. د ویست انډیز کرکټ بورډ وایي د شل اووریزو لوبو لوبډلمشر شای هوپ د سویلي افریقا په تجارتي لیګ کې لوبیږي نو ځکه دې سیریز ته نه دی غوره شوی.

د شای هوپ تر څنګ روسټن چیس، اکیل حسین او شیرفین ردرفورډ هم د افغانستان خلاف شل اووریز کې نه دي غوره شوي، دوي هم اوس مهال د سوېلي افریقا لیګ کې په لوبېدو بوخت دي.
د ویسټ انډیز د شل اووریز فارمټ درې نورو مجربو لوبغاړو، جیسن هولډر، روومن پاول او روماریو شیفرډ ته آرام ورکړل شوی.

شمار جوزف او ایوین لیویس له ټپونو وروسته د افغانستان خلاف سکواډ ته راستانه شوي، خو چټک توپ اچوونکی الزاري جوزیف لا هم د ټپونو له وجې د لوبېدو جوګه نه دی بلل شوی.

د کلیدي لوبغاړو نه شتون یو ځوان لوبغاړي ته د لوبېدو زمینه مساعده کړې، کوینټین سمپسون ته په لومړي وار په شل اووریز سکواډ کې ځای ورکړل شوی. نوموړی په دې سکواډ کې رومن پوول بدیل لوبغاړی دی.

مشر روزونکي ډیرن سمي دا سیریز د شل اووریز نړیوال جام د چمتوالي لپاره مهم بللی، دا په داسې حال کې ده چې د نړیوال جام لپاره بعضې کلیدي لوبغاړي ددې سیالیو برخه نه دي. د ویسټ انډیز منتخب سکواډ به د ډیرین سمي په مشرۍ سبا، د جنوري په څوارلسمه نیټه له ویسټ انډیز څخه حرکت وکړي او په شپاړسمه نیټه به اماراتو ته ورسیږي. د دواړو هیوادونو تر منځ لومړۍ سیالۍ د جتوري په په ۱۹مه، دویمه په ۲۱مه او دریمه سیالۍ په ۲۲مه نیټه ترسره کیږي.

د ویسټ انډیز سکواډ:

برانډن کنگ (کپتان)
الیک اتانازي
کیسي کارټي
جانسن چارلس
میتیو فورډ
جسټین ګریوز
امیر جنګو
شمار جوزیف
ایوین لیوس
ګوډاکیش موتی
خاري پیری
کوینټین سمپسون
جیډن سیلز
رامون سیمونډز
شمار سپرېګر
شمرون هیتمایر

د یادونې وړ ده چې یو شمیر افغان لوبغاړي هم دم ګړۍ د سوېلي افریقا او بنګلدېش په تجارتي لیګونو کې لوبیږي چې بعضې یې اماراتو ته ستانه شوي دي، او پاتې لوبغاړي به هم نن/سبا یاد لیګونه پرېږدي.

by Spogmai Gharanai

د پلار او زوی د ګډ لوبېدلو ارمان – محمد نبي او حسن عیسیٰ خیل

د بنګلدېش پریمیر لیګ روان پړاو د نړۍ د کرېکټ مینه‌والو، او په ځانګړي ډول د افغان کرېکټ مینه‌والو لپاره یوه ځانګړې او تاریخي شېبه ډالۍ کړه.

تېره شپه د بنګلدېش پریمیر لیګ په سیالیو کې د افغانستان د کرېکټ وتلی ستوری محمد نبي او زوی یې، ځوان حسن عیسی‌خېل، په ګډه د نواخالي اېکسپرېس لوبډلې لپاره د سیالۍ میدان ته ښکته شول. دا د کرېکټ په تاریخ کې لومړی ځل و چې پلار او زوی د یوې لوبډلې په ګټه ولوبېدل.

په روان شل اوریز لیګ کې دا د حسن عیسی‌خېل لومړۍ لوبه وه چې نواخالي اېکسپرېس لوبډلې ورته د لوبېدو فرصت ورکړ. نوموړي هم له ورکړل شوي چانس څخه په غوره ډول ګټه واخیسته او په زړه پورې لوبه یې نندارې ته وړاندې کړه. حسن عیسی‌خېل د ۶۰ توپونو په لوبولو سره ۹۲ چټکې منډې ترسره کړې، خپله لوبډله یې بریا ته ورسوله او د لوبې د غوره لوبغاړي جایزه یې هم ترلاسه کړه.

محمد نبي او حسن عیسی‌خېل په ګډه د نواخالي اېکسپرېس لپاره په څلورمه وېکټ د ۵۳ منډو مهمه ملګرتیا وکړه، چې د لوبې په پایله کې یې مهم رول ولوباوه.

حسن عیسی‌خېل د ۱۵۳.۳۳ سټرایک رېټ سره، د اووه څلوریزو او پنځه شپږیزو په مټ ۹۲ منډې وکړې او خپلې سیالې لوبډلې ډاکه کپېټلز ته یې د ۱۸۴ منډو هدف وټاکه. ډاکه کپېټلز لوبډلې ونه شوای کولی ټاکلی هدف ترلاسه کړي او سیالۍ یې د ۴۱ منډو په توپیر وبایلله.

۱۹ کلن حسن عیسی‌خېل په دې وروستیو کې د افغانستان په کورني کرېکټ کې هم ښه ځلېدلی او په بېلابېلو کورنیو ټورنمنټونو کې یې د پام وړ کارکردګي ښودلې ده.

محمد نبي، چې د افغانستان د ملي لوبډلې تکړه او تجربه‌لرونکی لوبغاړی او د افغان کرېکټ له بنسټ اېښودونکو څخه ګڼل کېږي، د کلونو راهیسې په نړیوال او لیګ کرېکټ کې د خپلې ښې لوبې، پراخې تجربې او هر اړخیزې وړتیا له امله پېژندل کېږي. نوموړي د تېرې شپې د لوبې په اړه وویل:
«له ډېرې مودې راهیسې د داسې شېبې په انتظار وم چې له خپل زوی سره یوځای ولوبېږم، او هغه په خپلې لومړۍ لوبه کې په رښتیا هم ډېر ښه وځلېد.»

ورته مهال حسن عیسی‌خېل د لوبې له پای وروسته وویل:
«ما سخت تمرین کړی و، حتی په هغو ورځو کې چې د ارام لپاره وې هم مې تمرین کاوه. کله چې په لومړیو اوو لوبو کې د لوبډلې برخه نه وم، د نورو لوبغاړو لوبې مې څارلې، د هغوی تېروتنې مې په نښه کولې، ترڅو زه یې تکرار نه کړم.»

د افغانستان د ملي لوبډلې تکړه لوبغاړي رحمن‌الله ګربز هم په خپلو ټولنیزو رسنیو کې د تېرې شپې لوبه د خپل لوبیز ژوند یوه ځانګړې شېبه بللې او هیله یې څرګنده کړې چې حسن عیسی‌خېل د خپلې ښې کارکردګۍ په دوام سره وکولی شي د افغانستان ملي لوبډلې ته لار پیدا کړي.

by Spogmai Gharanai

د هند او بنګلدېش ترمنځ سیاسي کړکېچ او په کرکټ یې اغیز

د ۲۰۲۴ کال وروستیو کې په بنګلدېش کې ولسي پاڅون او هند ته د پخوانۍ صدراعظمې شېخ حسینه د تښتېدو وروسته د هند او بنګلدېش هېوادونو ترمنځ سیاسي او دیپلوماتیکې اړیکې ترینګلې شوې.
په دې وروستیو کې بنګلدېش کې د هندي وګړو سره ناسم چلند او تاوتریخوالی، او موده وړاندې په بنګلدېش کې د یوه هندي کارګر د سوځولو او وژلو وروسته، سلګونه هندوانو په نوي ډهلي کې په اعتراضونو لاس پورې کړ چې له امله یې د دواړو هېوادونو ترمنځ اړیکې لا خرابې شوې

د هند او بنګلدېش هېوادونو ترمنځ روان سیاسي کړکېچ پر سپورټ او په ځانګړې توګه کرېکټ باندې هم مستقیم اغیزه کړې ده .

تېره ورځ د هند کرېکټ بورډ (BCCI) په غوښتنه ، په هند غوره لیګ کې د کلکته نایټ رایډرز لوبډلې لخوا اخیستل شوی بنګلدیشی لوبغاړی مستفیظ الرحمن د نوموړې لوبډلې له ترکیب لرې کړای شو.
چټک توپ اچوونکی مستفیظ الرحمن چې هند غوره لیګ سیالیو کې د مختلفو لوبډلو سره لوبېدلی، تېره میاشت اماراتو کې په ترسره شوې بولۍ کې په ۹۲ ملیونه هندي کلدارو د کلکتې لوبډلې له لوري اخیستل شوی وو.


په ورته مهال د کلکتې لوبډلې څخه د مستفیظ الرحمن د لرې کېدو وروسته BCCI نوموړې لوبډلې ته ددې اجازه ورکړې ترڅو بل لوبغاړی د خپلې لوبډلې په ترکیب کې شامل کړي.

له آی پي اېل څخه د مستفیظ الرحمن د لرې کېدو وروسته، بنګلدېش کرېکټ بورډ بیړنۍ غونډه ترسره کړه.

د راپورونو په وینا بنګلدېش کرېکټ بورډ غواړي ترڅو د روان کال فبرورۍ میاشت کې د هند او سریلنکا په کوربتوب ترسره کېدونکي نړیوال شل اووریز جام کې د لوبغاړو د خوندیتوب لپاره خپلې لوبې له هند څخه انتقال کړي .
ټاکل شوې، د بنګلدېش لوبډله په نړیوال جام کې خپلې درې لوبې د هند په کلکتې ښار کې ترسره کړي.

by Amina Azizi

په ۲۰۲۵ کې د افغان ملي لوبډلې یو ورځنۍ لوبې، پایلې، بدلونونه او تاریخي کارنامه

افغان لوبډلې لکه د ټېسټ لوبو په څېر په تیر زېږدیز کال کې هم محدودې یو ورځنۍ لوبې کړي دي او په دې فارمټ کې یې بوخت کال نه درلود.

د افغانستان ملي لوبډلې په فبرورۍ میاشت کې د چمپینز ټرافۍ یا اتلانو جام کې د درې یو ورځنیو لوبو په ګډون ټولې شپږ یو ورځنۍ لوبې کړي چې درې یې د بنګله دېش پر وړاندې د یو ورځنۍ لوبلړۍ په چوکاټ کې ترسره کړې دي.

په چمپینز ټرافۍ کې هم افغان لوبډله د لومړي ځل لپاره ولوبېده چې په ب ګروپ کې له سویلي افریقا، انګلېنډ او اسټرالیا سره وه.

لومړۍ لوبه یې د سویلي افریقا پر وړاندې د ۱۰۷ منډو په ستر توپیر وبایلله.
په دې لوبه کې د افغانستان لپاره یوازې رحمت شا غوره توپ وهنه وکړه او ۹۰ منډې یې جوړې کړې.

په چمپینز ټرافۍ کې د افغان لوبډلې په نوملړ کې یو بدلون د صدیق اتل راتګ و چې په لومړي ځل یو نړیوال اېونټ کې د افغانستان لپاره ولوبېد.

په ۲۰۲۵ کال کې د افغانستان دویمه یو ورځنۍ لوبه په چمپینز ټرافۍ کې د انګلېنډ پر وړاندې وه چې په یوه په زړه پورې لوبه کې یې په اتو وېکټو ماتې ورکړه.

د دغې لوبې تر ټولو مهمې او جالبه شېبې د ابراهیم د توپ وهنې وې چې په ۱۴۶ توپونو یې ۱۷۷ سترې منډې وکړې او د افغانستان د یو ورځنیو لوبو په تاریخ کې یې د غوره انفرادي پاڼۍ کارنامه جوړه کړه.

همداراز په دې لوبه کې عظمت الله عمرزي په دواړو برخو توپ وهنه او توپ اچوونه کې عالي کارکردګي لرله چې ۴۱ منډې یې جوړې کړې او په توپ اچوونه کې یې پنځه لوبغاړي وسوځول چې په ټوله کې یې په بریا کې کلیدي رول ولوباوه.

درېیمه یو ورځنۍ لوبه یې د اسټرالیا پر وړاندې وه چې د ورښت له کبله بې پایلې شوه.

افغان لوبډلې سیالې اسټرالیا ته ۲۷۳ منډې هدف ورکړی و چې په دویمه پاڼۍ کې د ورښت له کبله لوبه د اسټرالیا د یو لوبغاړي په زیان د ۱۰۹ منډو پر مهال ودرېده او بې پایلې پای ته ورسېده.

په دې لوبه کې صدیق اتل په یو ورځنیو نړیوالو لوبو کې لومړۍ نیمه سلیزه جوړه کړه او د په زړه پورې توپ وهنې په دوام یې ۸۵ منډې جوړې کړې.

په ټوله کې د چمپینز ټرافۍ یو ورځنیو لوبو کې د افغانستان لپاره ابراهیم ځدراڼ ۲۱۶، عظمت الله عمرزي ۱۲۶، رحمت شاه ۱۰۶ او صدیق اتل ۱۰۵ ډېرې منډې وکړې.

په توپ اچوونه کې عظمت الله عمرزي اووه او محمد نبي ۴ وېکټې ترلاسه کړې.

افغان لوبډلې له چمپینز ټرافۍ وروسته د دوه اړخیزې لوبلړۍ په چوکاټ کې د بنګله دېش پر وړاندې درې یو ورځنۍ لوبې ترسره کړې چې درې واړه یې په ښه توپیر وګټلې.

دغه لوبلړۍ د اکټوبر په اتمه پیل شوه چې په لومړۍ لوبه کې یې افغانستان سیالې لوبډلې ته د ۵ وېکټو په توپیر ماتې ورکړه.

په دې لوبلړۍ کې د لومړي ځل لپاره ځوان توپ اچوونکي بشیر احمد افغان ته هم ځای ورکړل شوی و چې په لومړۍ لوبه کې یې ۲۵ منډې ورکړې او کومه لاسته راوړنه یې نه لرله.

همداراز په توپ وهنه کې رحمن الله ګربز او رحمت شاه نیمه سلیزې جوړې کړې او عظمت الله عمرزي ۴۰ منډې وکړې او توپ اچوونه کې یې درې لوبغاړي وسوځول چې د غوره لوبغاړي جایزه یې هم واخیسته.

دویمه لوبه هم افغانستان د ۸۱ منډو په ستر توپیر وګټله.

دا ځل ابراهیم ځدراڼ غوره پاڼۍ ولوبوله او ۹۵ منډې یې وکړې په توپ اچوونه کې راشد خان ۵ او عمرزي درې وېکټې ترلاسه کړې.

په دې لوبه کې رحمت شا د پښې د ټپ له امله له لوبې ریټایر اوټ شو او د لوبې په پای کې یې هم ونه شول کولی پاڼۍ ولوبوي.

نوموړی د ټپي کېدو له امله له ټولې لوبلړۍ ووت او پر ځای یې اکرام علیخېل نوملړ ته اضافه شو.

د لوبلړۍ درېیمه یو ورځنۍ لوبه او په ټوله کې په ۲۰۲۵ کې کې د افغانستان وروستۍ یو ورځنۍ لوبه د اکټوبر په ۱۴مه ترسره شوه چې دا هم افغان لوبډلې د ۲۰۰ منډو په ستر توپیر وګټله.

یو ځل بیا هم ابراهیم ځدراڼ ۹۵ منډې وکړې، همداراز ورپسې محمد نبي ۶۲ او رحمن الله ګربز ۴۲ ډېرې منډې وکړې.

په توپ اچوونه کې بلال سمېع چې په وروستۍ لوبه کې فرصت ورکړل شو او له وطنه لوبې ته ولاړ د پام وړ کارکردګي وکړه او ۵ لوبغاړي یې وسوځول، راشد خان درې او عمرزي یو وېکټ واخیسته.

په ۲۰۲۵ کال کې د افغانستان لپاره یو ورځنیو لوبو کې تر ټولو ډېرې منډې ابراهیم ځدراڼ ۴۲۹، عظمت الله عمرزي ۱۸۶، رحمت شا ۱۶۵ او صدیق اتل ۱۴۸ منډې کړي دي.

بل لور توپ اچوونه کې راشد خان ۱۲ او عمرزي ۱۱ وېکټې اخیستي دي.

د یادونې وړ ده چې راشد خان د ۲۰۲۵ کال تر پایه د یو ورځنیو لوبو د جدول لومړنی غوره توپ اچوونکی او عظمت الله عمرزی لومړنی غوره ټولچاری لوبغاړی پاتې شو.

by Amina Azizi

په تیر ۲۰۲۵ز کال کې په شل اووریزو فارمټ کې د افغان لوبډلې سفر

افغان لوبډلې سږکال د نورو فارمټونو په پرتله په شل اووریز کې نسبتاً ډېرې ۱۴ لوبې کړي چې اووه یې ګټلي او اووه یې بایللي دي.

که څه په شل اووریزو لوبو کې هم افغان لوبډله د نړۍ له پیاوړو او مخکښو لوبډلو حسابیږي خو سږکال یې سفر ډېر په زړه پورې نه وو.

افغان ملي لوبډلې له پاکستان او متحده عربي اماراتو سره د درې اړخیزې لوبلړۍ پر مهال ۵، په آسیا جام کې درې، له بنګله دېش سره دوه اړخیره لوبلړۍ کې درې او له زمبابوې سره هم په دوه اړخیره لوبلړۍ درې شل اووریزې لوبې کړي.

په درې اړخیزه لوبلړۍ کې یې د پایلوبې په ګډون دوه، په آسیا جام کې هم دوه او د بنګله دېش پر وړاندې یې درې شل اووریزې لوبې بایللې دي.

په درې اړخیزه لوبلړۍ کې یې یو د پاکستان او دوه د متحده عربي اماراتو پر وړاندې، په آسیا جام کې یوه د هانګ کانګ پر وړاندې او دوه اړخیزه لوبلړۍ کې یې د زمبابوې پر وړاندې درې شل اووریزې لوبې ګټلې دي.

د افغانستان پاکستان او متحده عربي اماراتو په درې ملیتي لوبلړۍ کې د لوبلړۍ په کچه او هم د افغانستان لپاره تر ټولو ډېرې ابراهیم ځدراڼ ۱۹۴ او بیا صدیق الله اتل ۱۵۴ منډې کړي.

همداراز توپ اچوونه کې د ملي لوبډلې لپاره راشد خان ۹ وېکټې اخیستي.

په آسیا جام کې د افغانستان لپاره په درې لوبو کې صدیق الله اتل ډېرې ۹۱ او په دویم نمبر عظمت الله عمرزي ۸۹ منډې کړې دي.

د بنګله دېش پر وړاندې تر ټولو ډېرې منډې رحمن الله ګربز ۸۲ او راشد خان ۶ وېکټې ترلاسه کړي دي او د زمبابوې پر وړاندې د افغان لوبډلې لپاره ابراهیم ځدراڼ ۱۶۹ منډې کړي او عبدالله احمدزي چې په لومړي ځل نړیوالو شل اووریزو لوبو ته غوره شوی وو اووه وېکټې ترلاسه کړي.

په ټوله کې په ۲۰۲۵ز کال کې د افغانستان لپاره په شل اووریزو لوبو کې ابراهیم ځدراڼ په ۱۴ پاڼیو کې ۴۵۳، رحمن الله ګربز هم ۱۴ پاڼیو کې ۳۸۴ او صدیق اتل په ۱۳ پاڼیو کې ۳۷۴ منډې جوړې کړي دي.

په توپ اچوونه کې بیا راشد خان په ۱۲ لوبو کې ۲۱، مجیب الرحمن ۹ لوبو کې ۱۳ او عظمت الله عمرزي ۱۳ لوبو کې ۱۲ وېکټې ترلاسه کړي دي.

by Amina Azizi

تېر ۲۰۲۵ز کال کې د افغانستان ټېسټ لوبو ته کتنه

د افغانستان ملي لوبډلې په ۲۰۲۵ کال کې ډېر بوخت لوبیز مهالوېش نه درلود او په ټول کال کې یې په ټېسټ یا سور توپ فارمټ کې یوازې دوه لوبې وکړې هغه هم ټولې د زمبابوې ملي لوبډلې پر وړاندې.

د ۲۰۲۵ کال لومړۍ ټېسټ لوبه یې چې د جنورۍ په دویمه پیل کړه د ۲۰۲۴ کال د دوه ټېسټ لوبو له ډلې وه چې په کې افغان لوبډلې د ۷۲ منډو په توپیر وګټله.

په لوبډله کې د افغانستان پیلیز توپ وهوونکي رحمن الله ګربز او ابراهیم ځدراڼ نه وو. پر ځای یې عبدالمالک او ریاض حسن انتخاب شوي وو خو د دواړو پیلیزو لوبغاړو کارکردګي د پام وړ نه وه او نه یې په هدف جوړولو کې کلیدي رول ولوباوه.

په دې ټېسټ لوبه کې د افغانستان لپاره تر ټولو ډېرې منډې رحمت شا وکړې چې په لومړۍ پاڼۍ کې یې ۱۹ او دویمه کې ۱۳۹ وکړې، همداراز عصمت عالم ۱۰۱ ډېرې منډې وکړې.

د لوبډلمشر حشمت الله شهیدي کارکردګي هم بېکاره وه او په دوه پاڼیو کې یې یوازې ۲۶ منډې وکړې.

بل لور، راشد خان په یوه پاڼۍ کې ۲۵ منډې جوړې کړې او په توپ اچوونه کې یې څلور لوبغاړي وسوځول او په دویمه پاڼۍ کې یې ۲۳ منډې وکړې او ۷ وېکټې یې واخیستې چې په ټوله کې یې د ۱۱ وېکټو په ترلاسه کولو سره د غوره لوبغاړي جایزه واخیسته.

د افغانستان دویمه یوازنۍ ټېسټ لوبه هم د زمبابوې پر وړاندې د اکټوبر په ۲۰مه وه چې دغه لوبه زمبابوې د یوې پاڼۍ او ۷۳ منډو په توپیر وګټله.

په دې لوبه کې د افغانستان د ټېسټ لوبو د ملا تیر لوبغاړی رحمت شاه ۹ ورځې مخکې د بنګله دېش پر وړاندې یو ورځنۍ لوبلړۍ کې ټپي شوی و او د زمبابوې پر وړاندې ټېسټ لوبه کې نه و، همداراز راشد خان هم په لوبه کې نه و.

بل لور په لوبډله کې عبدالمالک او بهیر شاه محبوب او په لومړي وار توپ اچوونکي ضیاء الرحمن شریفي ته هم ځای ورکړل شوی و چې عبدالمالک دوه پاڼیو کې ۳۲ او محبوب ۴۴ منډې وکړې خو په ټوله کې د افغانستان لپاره توپ وهنه کې ابراهیم ځدراڼ ۶۱ او رحمن الله ګربز ۴۶ ډېرې منډې وکړې. بل لور ضیاء الرحمن شریفي په خپله لومړۍ نړیواله ټېسټ لوبه کې په یوه پاڼۍ کې ۷ وېکټې ترلاسه کړې چې دا یې د لومړۍ لوبې په توګه د لوبیز ژوند تر ټولو غوره پاڼۍ هم حسابیږي.

by Bashir Gharwal

Kabul and Tashkent Join Hands for Cricket Growth – Afghanistan to Train Uzbekistan Cricket Team and Officials

Delegation and players of the Cricket Federation of Uzbekistan (CFU) visit Kabul following the landmark Memorandum of Understanding (MoU) signed between the two neighbouring countries. The Afghanistan Cricket Board (ACB) and CFU officially signed the MoU in Tashkent on the 1st of December, aimed at developing and fostering cricketing ties between the two nations. The request had initially come from the Chairman of CFU Mr. Aziz Mihliev in one of the ICC meetings. Mr Aziz told ACB Media “I met ACB Chairman, respected Mirwais Ashraf in one of the International Cricket Meetings. We had a very good discussion; I tried to convey to him the message (of supporting CFU). Following the ICC meeting, ACB had approached CFU to discuss the details of the MoU and how ACB can support cricket in Uzbekistan.

ACB Delegation in Tashkent – Uzbekistan

The MoU sets out a comprehensive roadmap over the course of five years aimed at enhancing organisational development, providing training to Uzbek national players as well as strengthening the technical capabilities of CFU, which will include coaching courses, umpiring and officiating training, S&C and physiotherapy programs, talent identification, and development camps led by elite Afghan coaches.

Friendly fixtures on youth level are also an integral part of the MoU. ACB Spokesperson Mr. Sayed Naseem Sadat told ACA “Afghanistan’s A team, U19 team and domestic competitions champion teams will also feature in bilateral fixtures in Uzbekistan in order to help provide the competitive exposure necessary for the CFU’s on-field cricket development.”

Following the official endorsement of the MoU, a delegation from CFU visited Kabul on the 21 December, including three officials and three players (fast bowlers). The officials attended the two days long match-referee course organised at the ACB headquarters in Kabul. The course was delivered by an official match referee from the international Cricket Council.

CFU official attended match-refree course at ACB in Kabul-Afghanistan

The three fast bowlers are invited to partake in ACB’s fast bowling training which is scheduled to take place in the southern city of Kandahar. “ACB requested us to send three bowlers, it was difficult to select only three players because the news was widespread among the players and the interest was so much that I had to request the ACB if we can send more players, ACB assured us that more similar opportunities will definitely arise in the near future, where there will be extra spaces allocated to CFU players.” said CFU’s Chairman Mr Aziz during his Kabul visit.

CFU players and officials in Kabul-Afghanistan

This mutual cooperation is a pivotal moment which marks a significant milestone for ACB as a rising cricketing body. By extending a helping hand beyond it’s border, ACB reinforces it’s role as regional influential stakeholder in the global growth of the game of cricket, as well as deepening diplomatic and institutional ties in the region. Sharing hard-earned expertise with emerging nations like Uzbekistan, positions Afghanistan as a leading force in nurturing cricket across the region.

by Amina Azizi

په ۲۰۲۵ کال کې د افغانستان کورنۍ سیالۍ

په ۲۰۲۵ کال کې د کورنیو سیالیو له اړخه په افغانستان دننه هم ګرم کال و چې فرسټ کلاس، واخان جام، لېسټ اې، شپږیزه، ګرېډ ون او ګرېډ ټو سیالۍ د یادونې وړ دي.

لومړی د احمد شاه ابدالي فرسټ کلاس لوبې له می میاشتې تر جون پورې د ننګرهار په کوربتوب د څلورو لوبډلو ترمنځ ترسره شوې چې میوند اتلانو یې د اتم پړاو سیالیو اتلولي وګټله.

په ټوله کې د فرسټ کلاس د پای لوبې په ګډون ټولې ۱۳ لوبې ترسره شوې چې څه باندې یوه میاشت یې دوام وکړ.
شپږ لوبې بې پایلې شوې او پاتې شپږو کې درې د ماهیپر ستورو او یوه– یوه لوبه میوند اتلانو، پامیر لېجنډز او هندوکش سټرایکرز وګټله.

په دې سیالیو کې د توپ وهوونکو له ډلې تر ټولو ډېرې منډې شاهدالله کمال جوړې کړي چې د شپږو لوبو په لسو پاڼیو کې یې د دوه سلیزوپر مټ ۵۴۱ منډې وکړې.

ورپسې په ترتیب سره په دویم مقام حشمت الله شهیدي د څلورو لوبو په لسو پاڼیو کې د درې سلیزو پر مټ ۴۹۵ او په درېیم مقام رحمن الله ځدراڼ د شپږو لوبو په لسو پاڼیو کې ۴۷۶ منډې جوړې کړې.

سږکال په فرسټ کلاس لوبو کې د یوې پاڼۍ تر ټولو لوړې انفرادي منډې حشمت الله شهیدي جوړې کړې چې ۲۰۵ منډې یې وکړې.

په همدې حال کې د توپ اچوونکو له ډلې د فرسټ کلاس په سږنیو لوبو کې شرف الدین اشرف تر ټولو ډېرې وېکټې واخیستې چې د شپږ لوبو په دولس پاڼیو کې یې ۳۶ لوبغاړي سوځولي دي.

ورپسې په دویم مقام یمین احمدزي د شپږو لوبو په دولس پاڼیو کې ۲۶ وېکټې او په درېیم مقام ضیاء الرحمن اکبر د پنځو لوبو په نهو پاڼیو کې ۲۵ وېکټې ترلاسه کړې دي.

د یوې پاڼۍ تر ټولو غوره توپ اچوونه بشیر احمد افغان کړې چې د ۴۹ منډو په ورکولو یې ۶ لوبغاړي سوځولي.

په ورته وخت، فرسټ کلاس لوبو پسې په جون میاشت کې د کندز ولایت په کوربتوب د واخان شل اوریزې سیالۍ ترسره شوې او د هندوکش لوبډلې په اتلولۍ پای ته ورسیدې.

هندوکش سټرایکرز، ماهیپر ستوري، میوند اتلان او پامیر لېجېنډز د سږ کال ملي شل اوریز لیګ ګډون کوونکې لوبډلې وې.

پایلوبې ته پامیر لېجېنډز او د ماهیپر ستورو لوبډلې وتلې وې.
چې په پایله کې یې هندوکش سټرایکرز وکولی شول د یوې وېکټې په توپیر پامیر لوبډلې ته ماته ورکړي او د شل اوریز جام اتلولي خپله کړي.

په دې ټورنمنټ کې تر ټولو ډېرې منډې ذبید اکبري جوړې کړې چې د هندوکش سټرایکرز لپاره یې ۱۶۷ منډې ترسره کړې او مخکښ ویکټ اخیستونکي یما عرب وو چې د خپلې لوبډل لپاره یې ۱۱ لوبغاړي وسوځول.

د یادونې وړ ده چې واخان شل اووریزې سیالۍ تېرکال د قوشتېپې سیالیو په نوم ترسره شوې وې.