Category: کرکټ

by Spogmai Gharanai

د راشد خان نوی ریکارډ – شاید تر لسیزو څوک ورنږدې نه شي

په شل اوریزو لوبو کې د خان نوی ریکارډ
د افغانستان ملي لوبډلې ستوری لوبغاړی او د نړۍ له تر ټولو اغېزمن لېګ سپېن توپ اچوونکی راشد خان یو ځل بیا د شل اوریز کرکټ په تاریخ کې خپل نوم په سرو زرو ولیکه. راشد خان د هند ډهلي لوبغالي کې د شل اوریز نړیوال جام په لړ کې د متحده عربي اماراتو پر وړاندې د سیالۍ پر مهال د محمد عرفان وېکټې په اخیستو سره په ټولو شل اوریزو سیالیو کې خپلې ۷۰۰ وېکټې بشپړې کړې او دې تاریخي ریکارډ ته رسېږي.

راشد خان د شل اوریزو لوبو په تاریخ کې لومړی توپ اچوونکی شو چې ۷۰۰ وېکټې ترلاسه کوي. . تر هغه وروسته د وېسټ انډیز پخوانی الراونډر ډېون براوو د ۶۳۱ وېکټو په لرلو دویم ځای کې دی.
خان په ۵۱۸ شل اوریزو لوبو کې د لوبېدو وروسته یاد ریکارډ په خپل نوم کړ.

په ورته مهال راشد خان په نړیوالو شل اوریزو لوبو کې هم د ډېرو وېکټو اخیستونکو لوبغاړو په سر کې ځای لري. نوموړي تر دې مهاله ۱۹۱ نړیوالې وېکټې اخیستي او د نیوزیلنډ تېز توپ اچوونکي ټېم سوتي څخه مخکې په لومړي مقام کې ځای لري.
دا ریکارډ د دې څرګندونه کوي چې راشد نه یوازې په لیګونو، بلکې په نړیوال ډګر کې هم د افغانستان لپاره ستره سرمایه ده او په زړه پورې لوبې یې نندارې ته وړاندې کړي دي.

د افغان لوبډلې لوبډلمشر راشد خان په شل اوریزو لوبو کې خپله لومړئ لوبه د ۲۰۱۵ کال اکټوبر په ۲۵مه د زیمبابوی په وړاندې ترسره کړې .

۶/۱۷ ، په شل اوریزو لوبو کې د خان تر ټولو غوره توپ اچوونه ده چې یواځې د ۱۷ منډو په ورکولو یې شپږ لوبغاړي سوځولي.

همدارنګه راشد خان په نړیوالو شل اوریزو لوبو کې د 6.05 ایکانومۍ سره غوره اقتصادي توپ اچوونه ترسره کړې ده.

راشد د معاصر شل اوریز کرکټ تر ټولو بریالی، باثباته او اقتصادي توپ اچوونکی دی چې د ملي لوبډلې سربېره د نړۍ په ګڼو لیګونو لکه د هند غوره لیګ، SAt20، ILt20 او نورو لیګونو کې یې شتون اغېزمن ثابت شوی او د خپلې لوبډلې په ګټه یې په زړه پورې لوبې ترسره کړي دي.

by Spogmai Gharanai

پاکستان د هند سره د نړیوال جام سیالۍ د باېکاټ پرېکړه بېرته واخیسته

د هند او پاکستان کرکټ ملي لوبډلې به د ۲۰۲۶م کال شل اوریز نړیوال جام په لړ کې د فبرورۍ په ۱۵مه نېټه د سرلینکا په کولمبو کې د یو بل په وړاندې لوبه ترسره کړي.
د یوې اونۍ کړکېچ او جنجال وروسته د پاکستان حکومت خپل کرکټ لوبډلې ته د هند په وړاندې د لوبېدو اجازه ورکړه.
اوونۍ وړاندې پاکستاني حکومت د بنګلدېش کرکټ بورډ څخه د ملاتړ لپاره په نړیوال جام کې د هند په وړاندې د لوبېدو څخه انکار کړی وو.
نړیوال جام کې یاد جنجالونه هغه مهال رامنځته شول کله چې هند کرکټ بورډ بنګالی توپ اچوونکی مستفیظ الرحمن د راتلونکي پړاو آی پي اېل لیګ څخه بهر کړ چې په پایله کې بنګلدېش نړیوال جام کې د لوبېدو لپاره هند ته له تلو انکار وکړ او د کرکټ نړیوالې شورا څخه ېې وغوښتل ترڅو د بنګلدېش لوبډلې لوبې سریلنکا ته ولېږدوي.
د آی سي سي له لوري د بنګلدېش پرېکړې نه منل کېدو له امله بنګالۍ لوبډلې نړیوال جام کې د لوبېدو څخه انکار وکړ او د ۲۰۲۶م کال نړیوال جام څخه بهر شوه، پرځای یې د سکاټلنډ لوبډله د نړیوال جام برخه شوه.
پاکستان حکومت د آی سي سي له لوري د بنګلدېش کرکت بورډ د غوښتنې له رد کېدو وروسته د بنګلدېش څخه د ملاتړ لپاره پرېکړه وکړه چې د نړیوال جام په لړ کې له هند سره ترسره کېدونکې لوبه لغوه کوي.
همدا راز د پاکستان کرکټ بورډ مشر محسن نقوي د بنګلدېش په ملاتړ خبرو کې ویلي وو چې له بنګلدېش سره ناعادلانه چلند شوی او له نړیوال جام څخه ددې لوبډلې د لرې کېدل یې ظلم ګڼلی.
په ورته مهال د یادو جنجالونو د حل لپاره بنګلدېش حکومت له پاکستان غوښتي وو چې د هند په وړاندې لوبه ترسره کړي . د بنګلدېش کرکټ بورډ مشر امین الاسلام زیاته کړې وه:
«موږ د بنګله‌دېش د ملاتړ لپاره د پاکستان له هڅو ژور اغېزمن شوي یو. پدې هیله چې زموږ ورورولي تلپاتې وي.»

ددې ترڅنګ د سریلنکا ولسمشر هم له لومړي وزیر شهباز شریف سره په تلیفوني خبرو کې له نوموړي غوښتي وو چې د روان کړکېچ د سوله‌ییز حل لپاره جدي غور وکړي.

په پایله کې د فبرورۍ په نهمه د دوشنبې په ورځ پاکستان حکومت په یوې خپرې شوې اعلامیه کې اعلان وکړ چې:

“د څو اړخیزو بحثونو د پایلو او د ملګرو هېوادونو د غوښتنې په نظر کې نیولو سره، د پاکستان حکومت د پاکستان کرکټ ملي لوبډلې ته لارښوونه کوي چې د ۲۰۲۶ کال د فبرورۍ په ۱۵مه نېټه د آی سي سي د نارینه وو شل اوریز نړیوال جام په خپل ټاکل شوې لوبه کې میدان ته ووځي”.

همدارنګه په اعلامیه کې ویل شوي:
“سربېره پر دې، دا پرېکړه د کرکټ د روحیې د ساتنې او په ټولو ګډون کوونکو هېوادونو کې د دې نړیوالې لوبې د دوام د ملاتړ په موخه شوې ده”.

هند او پاکستان دواړه د شل اوریز او یو ورځني کرکټ له پیاوړو ټیمونو څخه دي. د دواړو لوبډلو ترمنځ سیالۍ اکثراً ډېرې هیجاني وي.
د دوی ترمنځ لوبه یوازې یوه عادي ورزشي سیالي نه ده بلکه دا د نړۍ تر ټولو مشهوره، تر ټولو ډېر لیدل کېدونکې او تر ټولو ارزښتناکه مقابله بلل کېږي. دا سیالۍ سیاسي، تاریخي، اقتصادي او احساساتي اړخونه لري چې ددې لوبې ارزښت یې څو چنده زیات کړی دی.

په شل اوریز نړیوالو جامونو کې د هند له پاکستان ترمنځ ترسره شویو لوبو کې هند له پاکستان څخه ۷-۱ مخکې دی.

by Amina Azizi

شپاړس کلونه، ۸ نړیوال جامونه، یو لوبغاړی-محمد نبي

محمد نبي د افغانستان د کرکټ په تاریخ کې یوازنی لوبغاړی دی چې له ۲۰۱۰ کال راهیسې تر سږکاله د افغان لوبډلې لپاره په شل اووریز نړیوال جام کې لوبیږي.

نوموړی د سږني را روان نړیوال جام په نوملړ کې هم شامل دی.

سږکال به د محمد نبي د اتم ځل لپاره په شل اووریز نړیوال جام کې د افغانستان استازیتوب وکړي.

محمد نبي په ټوله کې د اوو نړیوالو جامونو په چوکاټ کې ۳۰ لوبې کړي چې په کې یې ۳۴۷ منډې کړي، د یوې پاڼۍ غوره منډې یې ۵۲ دي او په توپ اچوونه کې یې ۲۲ وېکټې اخیستي چې تر ټولو غوره توپ اچوونه یې د شلو منډو په ورکولو سره څلور وېکټې اخیستل دي.

له محمد نبي وروسته ګلبدین نایب، راشد خان او نجیب الله ځدراڼ د افغانستان لپاره ډېر شل اووریز نړیوال جامونه لوبولي دي.

په ورته وخت، راشد خان د شل اووریزو نړیوالو جامونو په کچه د پنځم لوبغاړي په توګه ډېرې ۳۷ وېکټې اخیستي دي. که را روان شل اووریز نړیوال جام کې ښه او اغېزناکه توپ اچوونه وکړي او ۱۳ وېکټې واخلي نو د شل اووریزو نړیوال جامونو لومړنی غوره توپ اچوونکی به شي.

په همدې حال کې د نړیوالو لوبغاړو له ډلې د هند پخواني لوبډلمشر روهېت شرما او د بنګله دېش پخواني ټولچاري لوبغاړي ډېر ۹-۹ شل اووریز نړیوال جامونه لوبولي دي.

by Spogmai Gharanai

له ټیپ بال کرکټ تر نړیوال جام – د افغان ځوان سفر

 

په کوڅو او پارکونو کې د ټېپ‌بال کرکټ څخه تر نړیوال جام پورې؛ د زین‌الله احسان الهام‌بښونکی سفر

افغانستان کې زېږېدلی ځوان او د سکاټلنډ د کرکټ ملي لوبډلې تیز توپ اچوونکی زین‌الله احسان د لومړي ځل لپاره د ۲۰۲۶م کال د شل اوریز نړیوال جام سیالیو لپاره د سکاټلنډ د ملي لوبډلې غړیتوب ترلاسه کړ.

نولس کلن زین‌الله احسان په افغانستان کې زېږېدلی او له ماشومتوبه یې له کرکټ سره ژوره مینه لرله.
هغه په ۲۰۲۲م کال کې د سکاټلنډ هېواد کې د اوسېدو قانوني اقامه ترلاسه کړه او هماغه ځای کې یې د کرکټ په ډګر کې د خپل خوبونو د پوره کېدو لپاره جدي هڅې پیل کړې.

زین‌الله د خپل لوبیز ژوند سفر د ټېپ‌بال له لوبو پیل کړ. نوموړي ګلاسکو ته تر کډوالېدو وروسته له نورو افغان مهاجرینو سره په پارکونو کې د ټېپ‌بال کرکټ لوبې کولې، خو د لوړې کچې لوبو ته د رسېدو ارمان یې تل له ځانه سره لره.

د زین‌الله په وینا، جي هیچ کی کرکټ کلب کې یې د خپل ورور په ملاتړ د هارډبال کرکټ پیل وکړ، چې همدا د هغه د مسلکي کرکټ بنسټ وګرځېد. د نوموړي چټک رفتار، د توپ کنټرول او زړورتیا ډېر ژر د کلب د روزونکو پام ځان ته واړاوه.

زین‌الله احسان په کلب کرکټ کې د غوره ځلېدو وروسته د سکاټلنډ د ۱۷ کلنو ځوانانو ټرایل کې بریالی شو او ورسره د همدې عمر ملي لوبډلې ته انتخاب شو. نوموړي وروسته د سکاټلنډ د ۱۹ کلنو او همدارنګه د «الف» لوبډلې لپاره هم لوبې وکړې او خپله وړتیا یې لا نوره هم ثابته کړه.

د ۲۰۲۶م کال د جنورۍ میاشت کې زین‌الله د کرکټ په ډګر کې د خپل ژوند تر ټولو ستر سفر پیل کړ، کله چې هغه د ۲۰۲۶م کال د نارینه وو د شل اوریز نړیوال جام لپاره د سکاټلنډ د ۱۵ کسیزې لوبډلې په نوملړ کې شامل شو. دغه نړیوال جام به په هند او سریلانکا کې ترسره شي.

زین‌الله د تیرې چهارشنبې په ورځ د نامیبیا خلاف تمریني لوبه کې د سکاټلینډ لوبډلې برخه وو. نوموړي په دې سیالۍ کې د ۴۹ منډو په بدل کې یو لوبغاړی وسوځاوه، خو سکاټلنډ د ناميبيا پر وړاندې له ماتې سره مخ شو.

د سکاټلنډ ملي لوبډله به د ریچي بیرینګټن تر مشرتابه لاندې په نړیوال جام کې سیالۍ ترسره کړي. سکاټلنډ دغه نړیوال جام ته وروسته له هغې لار وموندله چې بنګله‌دېش د هند سره د شته ستونزو له امله نړیوال جام کې له ګډون لاس واخیست، او سکاټلنډ د شل اوریز نړیوال رېنکېنګ کې د مخته والي له مخې دې سیالیو ته لار پیدا کړه.

زین‌الله احسان نن د زرګونو افغان کډوالو ځوانانو لپاره د امید، زحمت او نه‌ماتېدونکی ارادې بېلګه ده؛ یو داسې سفر چې له پارکونو او ټېپ‌بال څخه پیل شو او د نړیوال جام تر ستر سټېج پورې ورسېد.

by Spogmai Gharanai

افغان نولس کلن یو وار بیا د نړیوال جام په نیمه پای لوبه کې

افغان نوولس کلنه لوبډله په نیمه پایلوبه کې
افغان ۱۹کلنو ځوانانو آیرلنډ ته په ماتې ورکولو د درېیم ځل لپاره د ۱۹کلنو نړیوال جام سیالیو نیمه پایلوبې ته ووتله.

افغان لوبغاړو د یوې په زړه پورې لوبې وروسته آیرلنډ ته د ۱۹۱ منډو په توپیر لویه ماته ورکړه.

سوپر سېکس پړاو کې له یوې بریا او یوې ماتې وروسته افغان ځوانان د آیرلنډ په وړاندې مهمې او برخلیک ټاکونکې لوبې لپاره میدان ووتله.
لوبډلمشر محبوب خان د لوبې پچه وګټله او د توپ اچوونې پرېکړه یې وکړه.
که څه هم افغان لوبډلې خپلې دوه لومړئ وېکټې ژر له لاسه ورکړې خو وروسته، منځنیو لوبغاړو ښکلې لوبه ترسره کړه.
د فیصل شینوزاده او لوبډلمشر محبوب خان ترمنځ د ۱۸۸ منډو اوږده ملګرتیا ترسره شوه چې په پایله کې افغان لوبغاړو د ۷ لوبغاړو په سوځېدو ۳۱۵ منډې ترسره او آیرلنډ ته یې د ۳۱۶ منډو هدف وټاکه.
فیصل شینوزاده یو ځل بیا بهترینه توپوهنه ترسره کړه او ۱۶۳ ډیرې منډې یې ترسره کړې. ورسره لوبډلمشر محبوب خان په ۷۹ توپونو ۸۹ منډې وکړې.

د یاد هدف څخه په دفاع کې افغان توپ اچوونکو ښه لوبه پیل کړه او د آیرلنډ لوبغاړي یواځې د ۱۲۴ منډو په جوړولو وتوانېدل.
عبدالعزیز او عقیل خان درې درې، نصرت نورستاني او روح الله عرب یو یو لوبغاړی وسوځوه.

فیصل شینوزاده د ۱۹کلنو نړیوال جام کې د کریم جنت ۱۵۶ ډیرو انفرادي منډو ریکارډ په خپل نوم کړ او په ۱۴۲ توپونو یې ۱۶۳ منډې جوړې کړې، او د لوبې غوره لوبغاړي جایزه یې هم ترلاسه کړه.

په ورته وخت کې د ۱۹کلنو نړیوال جام کې د افغانستان لپاره په څلورمه وېکټ تر ټولو اوږده ملګرتیا هم د محبوب خان او فیصل شینوزاده ترمنځ ترسره شوه.

لدې بریا سره افغان لوبډله د درېیم ځل لپاره د نړیوال جام نیمه پایلوبې ته ووته.
له بریا وروسته د ملي لوبډلې لوبډلمشر راشد خان په خپل فېسبوک پاڼې د ځوانانو بریا مبارکئ ترڅنګ ددوي د پرمختګ د دوام غوښتنه یې کړې.
د راشد ترڅنک یو شمیر ډیرو نورو ملي لوبغاړو هم د دې بریا مبارکي ویلی.
د افغانستان ترڅنګ لدې ګروپه آسټرالیا د اتو نمرو سره بل پړاو ته لار موندلې ده.

له دویم ګروپه انګلستان ،نیوزیلنډ ته په ماتې ورکولو او ۸ پواینټونو سره د نیمه پایلوبې ته ووتله.
د نیمه پایلوبې څلورمه لوبډله به د هند او پاکستان د لوبې وروسته په ډاګه شي.

by Spogmai Gharanai

شل اووریز نړیوال جام: د بنګله دېش پر ځای سکاټلینډ

کرکټ نړیوالې شورا اعلان وکړ، چې په هند او سریلنکا کې راروان شل اوریز نړیوال جام کې به دبنګله دېش پر ځای سکاټلنډ لوبېږي

وروسته له هغې چې بنګالی چټک توپ اچوونکی مستفیظ الرحمن د هند له غوره لیګ لیرې کړای شو د هند او بنګله دېش تر منځ کړکېچ لا زیات شوی ،چې په پایله کې د بنګلدېش کرکټ بورډ په هند کې د خپلو لوبغاړو او چارواکو د خوندیتوب او امنیت په اړه اندېښنې څرګندې کړې. دوی په رسمي ډول له آی سي سي غوښتنه وکړه چې لوبې یې سریلانکا ته ولېږدول شي. سره له دې چې سریلانکا ګډ کوربه هېواد دی، آی سي سي لا له وړاندې د سیالیو مهالوېش اعلان کړی و او د بنګلدېش لوبې یې په هند کې ټاکلې وې.

کرکټ نړیوالې شورا د امنیتي کارپوهانو له لوري هند کې امنیتي ارزونې ترسره کړې. په پایله کې د آی سي سي له خوا وویل شول چې دبنګله دېش کرکټ لوبډلې لوبغاړو، چارواکو او مینه والو ته په هند کې د لوبېدو په تړاو هېڅ کوم تأیید شوی ګواښ نشته.

د آی سي سي په وینا دا چې د سیالیو پیل کېدو ته کم وخت پاتې دی نو له همدې امله، دبنګله دېش کرکټ بورډ د غوښتنې پوره کول ممکن نه دي.

د کرکټ نړیوالې شورا ،بنګله دېشکرکټ بورډ ته د تېرې چهارشنبې په ورځ ۲۴ ساعته وروستی مهلت ورکړل شوی وو چې تایید کړي، ایا لوبډله به د اعلان شوي مهالوېش له مخې په هند کې لوبې وکړي که نه.

خو بنګالۍ لوبډله بیا هم په خپل دریځ ولاړه وه او هند ته له تلو یې انکار وکړ .

دبنګله دېش کرکټ بورډ مشر امین الاسلام هم ویلي وو “که د نږدې ۲۰۰ میلیونه نفوس لرونکی هېواد له نړیوال جامه پاتې شي، نو آی‌سي‌سي به په لویه کچه خپل لیدونکي له لاسه ورکړي.”

په ورته وخت کې د پاکستان کرکټ بورډ دې موضوع کې دبنګله دېش حکومت ترڅنګ ولاړ و، محسن نقوي د پاکستان کرکټ بورډ مشر په خپلو وروستیو خبرو کې ویلي”زه فکر کوم له بنګلدېش سره ناعادلانه چلند شوی دی.
دا سمه نه ده چې د یوه هېواد [هند] لپاره هر څه روا وي، خو له نورو هېوادونو تمه وشي چې بلکل برعکس چلند وکړي.
همدا لامل دی چې موږ دا دریځ خپل کړی او په ښکاره مو ویلي چې پر بنګلدېش ظلم شوی دی.
بنګلدېش باید په نړیوال جام کې ولوبېږي، ځکه هغوی د کرکټ یو مهم او اساسي برخه‌وال دي”.

وروسته له هغې چېبنګله دېش په هند کې له لوبېدو انکار وکړ ، د کرکټ نړیوالې شورا د سکاټلنډ ملي لوبډله د بنګلدېش پرځای په نړیوال جام سیالیو کې شامله کړه ، چې په (سي) ګروپ کې به د انګلستان، ایټالیا، وېسټ انډیز او نیپال سره ولوبیږي.

by Spogmai Gharanai

د ویسټ انډیز خلاف شل اوریزې لوبلړۍ پای او د افغان لوبډلې لخوا د سیریز ګټل

د افغانستان او وېسټ انډیز ترمنځ وروستۍ درې‌لوبیز شل‌اوریز سیریز، چې د ۲۰۲۶ له نړیوال جام وړاندې ترسره شو، د دواړو لوبډلو لپاره د چمتووالي یو مهم پړاو بلل کیږي. دا لوبلړۍ نه یوازې د پایلو له مخې مهمه وه، بلکې د لوبډلې د ترتیب برابرولو لپاره هم مهم ګڼل کېده.


د راشد خان په لوبډلمشرۍ ، د افغانستان کرکټ ملي لوبډلې وېسټ انډیز ته په لومړۍ دوه سیالیو کې ماتې ورکړه خو په دریمه لوبنه کې د ۱۵۲ منډو هدف په پوره کولو کې ياتې راغله او د درې شل اوریزو لوبو لړۍ یې ۱-۲ په خپله ګټه پای ته ورسوله.

افغانستان په لومړیو دوو لوبو کې د لوبې کنټرول په بشپړ ډول په لاس کې درلود. توپوهنه او توپ اچونه دواړه برخې یې منظمې وې.

که څه هم افغان لوبغاړي په دوه لومړنیو لوبو کې ښه ولوبېدل او ښکلې لوبې یې ترسره کړې خو بیا هم په وروستۍ لوبه کې پرته له پیلیزو توپوهونکو نور هېڅ توپ وهونکی د ښو منډو په ترسره کولو او ملګرتیا جوړولو ونه توانېد .

وروستۍ لوبه کې رحمن الله ګربز ۷۳ او ابراهیم ځدراڼ ۲۸ منډې جوړې کړې، او وېسټ انډیزۍ لوبډله وتوانېده افغانستان ته د ۱۳ منډو په توپیر ماته ورکړي.
په دې لوبلړۍ کې مجیب الرحمن او شامر سپرېنګر هغه دوه توپ اچوونکي وو چې هېټرېک یې وکړ. مجیب په دویمه لوبه او سپرېنګر د وروستۍ لوبې په ۱۹م اوور کې د راشد، شاهد کمال او رحمن الله ګربز د وېکټو په اخیستو هېټرېک وکړ.
له راشد خان او کریم جنت وروسته مجیب درېیم افغان لوبغاړی شو چې په شل اوریزو لوبو کې هېټرېک کوي. دا د ۲۰۲۶ کال لومړی هېټرېک وو.

دروېش رسولي په درې لوبو کې د ۱۵۶ منډو په ترسره کولو سره د سیریز غوره لوبغاړی ونومول شو. په منځنۍ برخه کې د دروېش ښه او په زړه پورې توپ وهنه هغه مثبت څه وو چې افغان لوبډلې لپاره به په نړیوال جام کې ښې پایلې درلودلی شي.

بلخوا لوبډلې ته د مجیب الرحمن بیا راتګ او ښه ځلېدل یې، په لومړیو اوورونو کې د افغانستان د بالېنګ برخه لا پیاوړې کړه، د نړۍ بهترنیه ورو بالرانو لرلو ورهاخوا په لوبډله کې د چټکې توپ اچوونې په برخه کې د نړیوال جام په لړ کې د نوین الحق نشتون څه ناڅه د اندېښنې وړ ده، نوموړی د ټپي کېدو له امله وېسټ انډیز سره د سیریز او نړیوال جام له نوملړه لرې کړای شو، او پر ځای یې ضیاالرحمن شریفي د لوبډلې برخه شو.

د دې سیریز ترسره کېدل او د افغان لوبډلې په ګټه یې پای ته رسېدل له نړېوال جام وړاندې د افغانستان لپاره یو ښه خبر دی.
افغان لوبډله په تېر نړیوال جام کې تر نیمه پایلوبې رسېدلې وه.
ټاکل شوې افغان لوبډله د روان کال راتلونکې میاشت په هند او سریلانکا کې ترسره کېدونکي شل اوریز نړیوال جام کې ولوبیږي.

by Spogmai Gharanai

له نږدې څلور لسیزو وروسته، په هند کې د نیوزلینډ د سیریز ګټل

له اوږد انتظار وروسته د هندۍ لوبډلې پر وړاندې د هند په کوربتوب یوورځنۍ لوبلړۍ کې د نیوزیلنډ لوبډلې اتلولي

نیوزیلنډ لوبډلې د برېسوېل په کپټانۍ وکولی شول د ۱۹۸۸م کال وروسته د لومړي ځل لپاره هند لوبډلې ته په خپل کور کې په یوورځني سیریز کې ماته ورکړي.

نیوزیلنډ لوبډلې د ډرېل مېچل په زړه پورې توپوهنې سره د ۷ لوبلړیو د بایللو وروسته په هند کې هندۍ لوبډله ۲-۱ ماته کړه.

د لوبلړۍ په لومړۍ لوبه کې هند د کوهلي ۹۳ منډو او لوبډلمشر ګېل پنځوسیزې پر مټ نیوزیلنډ ته د څلورو وېکټو په توپیر ماته ورکړه.
په دویمه لوبه کې نیوزیلنډ ملي لوبډله برلاسې وه او هند لوبډله یې د ۷ وېکټو په توپیر ماته کړه، ډرېل مېچل د نیوزیلنډ لوبډلې په ګټه ۱۳۱ ناسوځېدلې منډې ترسره کړې وې.

د دواړو لوبډلو ترمنځ درېمه او برخلیک ټاکونکې لوبه د جنورۍ په اتلسمه د هند په کوربتوب ترسره شوه.

هندي لوبډلمشر شوبمن ګېل د پچې په ګټلو د توپ اچوونې پرېکړه وکړه.
که څه هم د نیوزیلنډ لوبډلې د توپوهنې پیل ښه نه وو خو یو ځل بیا د منځنیو توپ وهونکو ډرېل مېچل او ګلېن فېلپس په زړه پورې توپ وهنې نیوزیلنډ لوبډله یو لوی هدف ته ورسوله او سیالې هندۍ لوبډلې ته یې د ۳۳۸ منډو لوړ هدف وټاکه.
ډرېل مچېل یوځل بیا ښه وځلېد او د خپلې لوبډلې په ګټه ېې ۱۳۷ منډې ترسره کړې.
ورسره ګلېن فېلپس هم ښکلې توپ وهنه وکړه او د نیوزیلنډ لپاره یې ۸۸ توپونو ۱۰۶ منډې ترسره کړې.
د هند لپاره توپ اچوونه کې ارشډیپ سنګ او هرشېت رانا درې درې ، محمد سراج او کلدیپ یادوف یوه، یوه وېکټ ترلاسه کړه.

هند ملي لوبډله د هدف په پوره کېدو کې پاتې راغله او ټوله لوبډله یې په ۲۹۶ منډو وسوځیده.
د هند لوبډلې لپاره یوځل بیا وېرات کوهلي ښه ولوبېده او ۱۲۴ ډېرې منډې یې ترسره کړې خو لوبډلې یې بیا هم ونشو کولی بریا ترلاسه کړي.

د نړۍ ستوري لوبغاړي وېرات کوهلي په روانې لوبلړئ کې د خپل لوبیز ژوند ۸۵مه سلیزه او په نړیوالو یوورځنیو لوبو کې ۵۴مه سلیزه ترسره کړه.

کوهلي چې اوس مهال یواځې په یوورځنیو لوبو کې د هند لوبډلې استازیتوب کوي، یواځینی لوبغاړی دی چې د نیوزیلنډ هېواد پر وړاندې تر نورو لوبغاړو ښه ځلېدلې او ډیرې سلیزې ېې وهلې دي.
نوموړي د نیوزیلنډ په وړاندې ټولو فارمټونو کې ۱۰ سلیزې وهلي، چې له ډلې یې ۷ سلیزې په یوورځنیو لوبو کې ترسره شوي.

ډرېل مېچل په درې لوبو کې د دوه سلیزو پر مټ د ۳۵۲ منډو په ترسره کولو د یادې لوبلړئ غوره لوبغاړی ونومول شو.

څه باندې یو کال وړاندې نیوزیلنډ لوبډلې هند لوبډلې ته د دوي په کوربتوب په ټېسټ لوبه کې هم ماته ورکړې وه .

ټاکل شوې د دواړو لوبډلو ترمنځ د پنځو شل اوریزو لوبو لوبلړئ د روانې جنورۍ میاشتې په ۲۱مه نېټه پیل شي.

by Spogmai Gharanai

افغان ۱۹کلن د نړیوال جام سوپر سېکس پړاو ته ووتل

افغان نولس کلنې لوبډلې په روان پنځوس اوریز نړیوال جام کې خپله دویمه لوبه کې د وېسټ انډیز لوبډلې ته په لوی توپیر ماتې ورکړه.

د ۱۹ کلنو نړیوال جام په لړ کې د جنوبي افریقا پر وړاندې له لومړۍ بریا وروسته افغان ځوانان د وېسټ انډیز پر وړاندې د سیالۍ ډګر ته ښکته شول.
لوبډلمشر محبوب خان د پچې له ګټلو وروسته د لومړۍ توپوهنې پرېکړه وکړه.
د افعان لوبغاړو پیل ډېر ښه و او د لوبډلمشر محبوب د ۸۶ او عثمان سادات ۸۸ ډېرو منډو پر مټ یې وېسټ انډیزۍ لوبډلې ته د ۲۶۳ منډو هدف وټاکه.

د بالرانو له ډلې وحید ځدراڼ لوبډلې ته د هدف په دفاع کې لوبې ته ښه پیل ورکړ او په خپلو درېو لومړیو اوورونو کې یې د سیالې لوبډلې ۳ مهم لوبغاړي له ډګره بهر کړل.
وروسته د نورستاني عمرزي په راتګ د وېسټ انډیز لوبډله نوره هم له ستونزو سره مخ شوه او ویې کړای شو چې په ۷ اورونو کې یواځې د ۱۶ منډو په ورکولو ۴ لوبغاړي وسوځوي.

د نورستاني او وحید ترڅنګ خاطر ستانکزی هغه ځوان لوبغاړی وو چې په خپلې بېسارې کارکردګۍ یې د وېسټ انډیز ۱۹کلنې لوبډلې پاتې درې لوبغاړي وسوځول او په خپلو ترسره کړو پنځو اوورونو کې یواځې ۲۰ منډې ورکړې.

د وېسټ انډیز ۱۹کلنو ځوانانو لوبډلې یواځې د ۱۲۴ منډو په جوړولو خپل ټول لوبغاړي له لاسه ورکړل او لوبه یې د ۱۳۸ منډو په لوی توپیر وبایلله.

لوبډلمشر محبوب خان د په ۶۹ توپونو د ۸۶ منډو په ترسره کولو د لوبې غوړه لوبغاړي جایزه ترلاسه کړه.

د افغان لوبډلې په څیر وېسټ انډیز هم خپله لومړۍ لوبه په ښه توپیر له تانزانیا لوبډلې ګټلې وه، خو ویې نشو کړای د افغان توپ اچوونکو په وړاندې ښه ولوبیږي.

که څه هم نولس کلنو ځوانانو په دې وروستیو کې ښې لوبې نه وې ترسره کړې په تېره بیا د ۱۹کلنو آسیا جام سیالیو کې یې د تمې خلاف ښه کارکردګي ونکړه خو لوبغاړو وکولی شول پیاوړي راوګرځي او په روان نړیوال جام کې یې خپلې دواړه ترسره شوې لوبې په ښه توپیر وګټلې.

ټاکل شوې افغان ځوانان د نړېوال جام په اوږدو کې چهارشنبې په ورځ خپلې درېمې لوبې کې د تانزانیا ۱۹ کلنو لوبډلې په وړاندې د لوبې ډګر ته ښکته شي.

by Spogmai Gharanai

حسن عیسی خیل په تجارتي لیګ کې ریکارډ جوړ کړ

د ملي لوبډلې پیاوړي لوبغاړي محمد نبي زوی، حسن عیسی خېل په کور دننه لوبو کې له ښه ځلېدو وروسته بهرنیو لیګونو کې هم ریکارډونه جوړ کړل.

نولس کلن حسن عیسی خېل نن یو ځل بیا په بنګلدېش غوره لیګ سیالیو کې د خپلې لوبډلې نواخالي اېکسپرېس لپاره په زړه پورې پاڼۍ ولوبوله.
حسن په ۷۲ توپونو د ۱۱ شپږیزو او څلور څلوریزو پر مټ ۱۰۷ منډې جوړې کړې او د لوبې له ډکره ناسوځېدلې ووت.
هغه د خپلې لوبډلې لپاره په یوه پاڼۍ کې تر ټولو ډیرې ۱۱ شپږیزې ووهلې.


سره لدې چې ځوان لوبغاړي حسن ته په لومړیو ۷ لوبو کې د لوبېدو فرصت نه وو ورکړل شوی، خو بیا یې هم وکولی شول په وروستیو لوبو کې د غوره ځلېدو سره د خپلې لوبډلې په ګټه د ۲۲۴ منډو په جوړولو د نواخالي لوبډلې د لوبغاړو ترمنځ تر ټولو ډیرو منډو جوړوونکو لوبغاړو په سر کې راشي .

سربېره پر دې د نواخالي اېکسپرېس لوبډلې لپاره تر ټولو ډیرې ۱۸ شپږیزې هم د حسن لخوا وهل شوي دي او ورسره په یوه پاڼۍ کې د نواخالي لوبډلې لپاره د ډېرو شپږیزو وهلو ریکارډ هم له حسن عیسی خېل سره دی.

نوموړی په روان بنګلدېش غوره لیګ کې مخکښ شپږیزې وهونکی لوبغاړی دی.
د رنګپور رایډرز په وړاندې ننۍ لوبه کې د حسن
عیسی خېل او حیدر علي ترمنځ د ۱۳۷ منډو ملګرتیا ترسره شوه چې دا د نواخالي اېکسپرېس لوبډلې لپاره په یوې وېکټه تر ټولو اوږده ملګرتیا ده.

په ورته وخت کې حسن عیسی خېل لومړی افغان لوبغاړی شو چې په یوه بهرني لیګ کې سلیزه ترسره کوي.

تر دې وړاندې ځوان استعداد حسن د نواخالي اېکسپرېس لوبډلې لپاره د ډاکه کپېټلز لوبډلې په وړاندې لوبه کې د ۹۲ چټکو منډو په ترسره کولو د نړیوالو پام ځانته رااړولی وو. دا لوبه د حسن عیسی خېل په لوبیز ژوند کې د بهرني فرنچایز لیګ لومړۍ لوبه وه.

په هغه لوبه کې د کرېکټ په تاریخ کې د لومړي ځل لپاره یو پلار او زوی په یوه ډګر د یوې لوبډلې په ګټه ولوبېدل.

د بنګلدېش غوره لیګ په تاریخ کې هغه شېبه چې محمد نبي او زوی یې حسن عیسی‌خېل یوځای د لوبې ډګر ته ښکته شول، یوازې د افغانستان لپاره نه، بلکې د نړیوال کرکټ لپاره هم یوه تاریخي، احساساتي او نه تکرارېدونکې شېبه وه او د حسن عیسی‌خېل ۹۲ چټکو منډو اننګز دې شېبې ته لا ځانګړی رنګ ورکړی وو.

د ملي لوبډلې تکړه لوبغاړی محمد نبي هیله لري، چې وکولای شي یوه ورځ له خپل زوی سره یوځای د ملي لوبډلې په ګټه هم ولوبېږي.