بند امیر ښاماران او آمو نهنګانو لوبډلو بلاخره د شپږیزې لیګ نهم پړاو پای لوبې ته لار پیدا کړه او سبا د اتلولۍ معلومولو لپاره سره لوبه کوي.

دواړه هغه لوبډلې دي چې د شپږیزې په پیل او پای کې د نورو لوبډلو په پرتله برلاسې وې.

بندامیر ښامارانو لوبډلې د شپږیزې پیل ډېر زړور او په بریاوو وکړ او آمو نهنګان په پیل کې داسې نه ښکارېدل چې وبه کولی شي پای لوبې ته لار پیدا کړي خو د عظمت الله عمرزي او فضل الحق فاروقي په راتګ سره د دغې لوبډلې توپ وهنه او توپ اچوونه په یو تول برابره شوه او وروستۍ لوبې یې په ښه توپیر وګټلې.

د دغو لوبډلو جوړښت ته په کتو دواړه په یو بل پیاوړي دي، یو خوا د بند امیر ښامارانو لوبډله ده چې لوبغاړي یې هم په توپ وهنه کې مخکې دي او هم توپ اچوونه کې د نوملړ د سر ځایونه لري او بل لور د آمو نهنګان دي چې یوازې د یو فضل الحق فاروقي توپ اچوونه یې هم د بندامیر د ټولو لوبغاړو ځواب ویلی شي او دا راز په توپ وهنه کې د محمد اسحاق، عبدالمالک او زبید اکبري په څېر زړور او بریدګر توپ وهوونکي لري چې د شپږیزې په سږنیو سیالیو کې یې هم د غوره توپ وهوونکو ځایونه خپل کړي.

خو په ټوله کې د بند امیر او آمو نهنګانو وروستیو لوبو ته په پام سره د آمو لوبډلې مورال او روحیه پیاوړې ښکاري ځکه یادې لوبډلې وروستۍ لوبې په جادویي ډول وګټلې او هم په توپ وهنه او توپ اچوونه کې داسې لوبغاړي لري چې د بندامیر له مخکښو لوبغاړو سره چې دا مهال د جدول لومړني مقامونه لري، ډغره وهلی شي.

په همدې حال کې اوس به د دواړو پیاوړو لوبډلو په یو بل برلاسې کېدل او د اتلولۍ ګټل د دوی د لوبغاړو په چمتووالي او ځان باور پورې اړه ولري.

په نړیوال جام کې د افغانستان او سویلي افریقا ترمنځ د نیمه پایلوبې ویشتنځای خراب وبلل شو.

د کرېکټ نړیوالې شورا له لوري له سږني شل اووریز نړیوال جام وروسته، د ټولو لوبو د لوبغالو ویشتنځایونه ارزول شوي دي.

څه کم دوه میاشتې وروسته یادې شورا د ارزونې پایلې خپرې کړي چې پر بنسټ یې د نړیوال جام پر مهال د نیویارک ناساو کاونټي په لوبغالي کې د دوو لوبو ویشتنځایونه او د وېسټ انډیز ټرېنېډاډ کې د براین لارا لوبغالي کې یوازې د یوې لوبې ویشتنځای خراب، غیر معیاري یا نامناسب بلل شوی دی.

نیو یارک ناساو کاونټي لوبغالي کې د سویلي افریقا او سریلانکا ترمنځ لوبه کې سریلانکایي لوبډله په ۷۷ منډو وسوځېده او اېرلېنډ یوازې د ۹۶ منډو په جوړولو سره د هند پر وړاندې پاتې راغی.

د دغه لوبو ویشتنځایونه د نړیوالې شورا له تند غبرګون سره مخ شول او وروسته یادې شورا اعتراف وکړ چې هغه غیر معیاري وو.

په همدې حال کې د هغه لوبغالي ویشتنځای چې ډېر له نیوکو او غبرګونونو سره مخ شوی د افغانستان او سویلي افریقا ترمنځ د نیمه پای لوبې لپاره د براین لارا لوبغالی دی چېرې چې افغان لوبډله د سویلي افریقا پر وړاندې په لومړۍ پاڼۍ کې په ۵۶ منډو وسوځېده او هېڅ لوبغاړي تر لسو منډې جوړې نه شوې کړی.

له دې لوبې وروسته د افغان لوبډلې مشر روزونکي جانتن ټرات هم نیوکه وکړه او ویې ویل دا داسې ویشتنځای نه وو چې تاسو وغواړئ یوه ساده او عادي نیمه پای لوبه په کې ترسره کړئ، باید یو عادلانه سیالۍ اوسي.»

دا په داسې حال کې ده چې افغان لوبډلې په سږني شل اووریز نړیوال جام کې حیرانوونکې او په زړه پورې لوبې وکړې او د سویلي افریقا ماتول هم ورته ګران نه وو خو اوس په ډاګه شوه چې هغه ویشتنځای غیر معیاري او د نړیوال جام د یوې مهمې سیالۍ لپاره مناسب نه وو.

 

د غازي امان الله خان له لوري د هېواد د خپلواکۍ بېرته اخیستو ۱۰۵مې کالیزې په مناسبت د افغانستان نامتو ملي لوبغاړو هم په خواله رسنۍ د دغې ورځې یاد تازه کړ، هېوادوالو ته یې مبارکي وویله او د یو پرمختللي افغانستان هیله یې وکړه.

له دې ډلې پخواني او اوسنیو برحاله لوبډلمشرانو محمد نبي، راشد خان او حشمت الله شهیدي او د ملي لوبډلې ځوان لوبغاړي نور احمد ټولو هېوادوالو ته مبارکي ویلي.

د شل اووریز فارمټ لپاره د افغانستان لوبډلمشر راشد خان په خپله فېس بک پاڼه په پښتو او دری ژبو مبارکي لیکلي او زیاته کړې یې ده، د داسې ورځې په هیله چې هېواد مو په هره برخه کې په خپلو پښو ولاړ وي.

په ورته مهال د یو ورځنيو لوبو لپاره د افغانستان لوبډلمشر حشمت الله شهیدي هم د مبارکۍ ترڅنګ همداراز هیله کړې چې افغانستان یو ځل بیا د جګړې په ډګر بدل نه شي.

ملي لوبغاړي تل په ملي مسایلو او د ملي ارزښتونو په نمانځلو کې د هېوادوالو ترڅنګ دریږي او د وطندوستۍ احساسات پالي همدا لامل دی چې افغانان بې درېغه مینه ورکوي او تل یې په دفاع ولاړ وي.

د نیوزیلنډ یو شمېر ملي لوبغاړو له خپل کرېکټ بورډ د مرکزي قرارداد پر ځای د آزاد قرار داد غوښتنه کړې ده.

د ملي لوبډلې یو شمېر کلیدي لوبغاړو کین ویلیمسن، ټرینټ بولټ، لوکي فرګسن او اډم میلن ته له آزاد قرار داد ورکولو وروسته اوس ډیویډ کانوي او فین الن هم له خپل کرېکټ بورډ د ازاد قرارداد غوښتنه کړې ده.

آزاد قرارداد لوبغاړو ته دا اسانتیا ورکوي چې په خپله خوښه له ملي یا سوداګریزو سیالیو یوازې په یو کې لوبېدل وټاکي.

یو شمېر هغه نیوزیلنډي لوبغاړي چې وار دمخه آزاد قراردادونه لري، سږکال یې د نړیوال جام لپاره له وړاندې تمرینات هم ونه کړل او د ای پي اېل سیالۍ یې ولوبولې.

دا راز له ای پي اېل مخکې په اپریل میاشت کې له پاکستان سره د نیوزیلنډ د پنځو شل اووریزو لوبو د لوبلړۍ لپاره هم د نیوزیلنډ مهم او کلیدي ملي لوبغاړي پاکستان ته نه وو تللي.

نیوزیلنډي لوبغاړي بیا په نړیوال جام کې د خپلې لومړۍ لوبې لپاره سره یو ځای شول.

د یادو لوبغاړو د ازادو قراردادونو پایله په نړیوال جام کې ښه نه وه، او د معمول خلاف بل پړاو ته ونه وتل.

د سوداګریزو لیګونو د رقابت په دوران کې ډېری نړیوال لوبغاړي د ښه امتیازاتو ترلاسه کولو لپاره د ملي لوبو پر ځای د دغو لیګونو سیالیو ته غوره والی ورکوي.

د نیوزیلنډي لوبغاړو له خوا د ازادو قراردادونو د موضوع راپورته کېدل به په ټوله کې نړیوال کرېکټ ته یو ډول ټکان ورکړي او ډېری لوبغاړي به له خپلو کرېکټ بورډونو د ورته قراردادونو په غوښتلو سره د ملي سیالیو پر ځای لیګونه او فرنچائز سیالۍ غوره کړي.

بل لور په کرېکټ کې یوازنی هېواد هند دی چې لوبغاړو ته یې په لیګونو کې د لوبېدو اجازه نه ورکوي، ځکه د راپورونو پر بنسټ د دغه هېواد بورډ په دې باور دی چې که لوبغاړي یې په لیګونو کې بوخت شي ښایي ملي سیالیو ته ارزښت ورنه کړي یا یې په نړیواله کچه د هېواد لپاره پایله ښه نه وي نو د همدې لپاره ورته په کور دننه د سترو او کوچنیو لیګونو د لوبولو امکانات برابروي او له دې لارې یې لوبغاړي ښې پیسې ګټي.

کرېکټ بورډ د مرکزي قرار داد ځینو نالوبېدلو لوبغاړو ته په ۹ نیمږ دقیقو کې دوه کیلو متره منډه شرط کړې

د افغانستان کرېکټ بورډ د غوراوي کمېټې په شپږیزې لیګ کې د لوبېدو لپاره ځینو لوبغاړو ته په ۹ نیمو دقیقو کې دوه کیلو متره منډه شرط کړې.

له افغان کرېکټ بورډ یوې لوړ پوړي باوري سرچینې ای سي ای ته ویلي چې د بورډ د مرکزي قرار دادونو لرونکي او د ملي لوبډلې یو څو پخواني لوبغاړي د غواراوي کمېټې له لوري مکلف شوي وو چې د فېټنس په توګه یوازې د ۲ کیلو مترو منډې ازموینه ورکړي، څو ولیدل شي چې دوی د فزیکي تکړښت له مخې څو سلنه بدلون کړی. چې د مثبت بدلون په صورت کې به په ځینو کورنیو سیالیو کې د لوبېدو چانس ورکړل شي او که نور هم په ښکته تللي وو نو بیا چانس نه ورکول کیږي او نه به په کومه لوبه کې پرېښودل شي.

په ورته مهال په شپږیزې لیګ کې د لوبېدو لپاره له دغو ملي لوبغاړو د یویو ټېسټ نه دی اخیستل شوی ځکه یاد ټېسټ ګران دی او دا چې دوی له ملي لوبډلې لېرې پاتې شوي په کورني کرېکټ کې هم تر ډېره فعال نه وو نو یوازې په  ۹ نیمو دقیقو کې د دوه کیلو مترو منډې ازموینه ترې اخیستل شوې.

په همدې حال کې سرچینې زیاته کړې چې له دغو ملي لوبغاړو سمېع الله شینواري، محمد شهزاد، شاپور ځدراڼ، دولت ځدراڼ او افتاب علم ته داسې یو سېسټم برابر شوی چې د فېټنس په توګه د ۲ کیلو مترو منډې وهلو ټرایل آزموینه ورکړي.

د سرچینې په وینا له یادو لوبغاړو یوازې سمیع الله شینواری، محمد شهزاد او افتاب علم د فېټنس ټرایل ورکړی او پاتې لوبغاړي نه وو حاضر شوي.

بل لور سرچینه وایي چې د قوش تیپې کانال ملي سیالیو کې یې هم له ځینو لوبغاړو سره ګوزاره کړې سره له دې چې په فېټنس کې پاتې راغلي وو خو د لوبولو چانس ورکړل شو خو له دې وروسته به غوراوي کمېټه د فېټنس مسله جدي ونیسي څو هر لوبغاړی خپل فېټنس ته پام وکړي.

 

د ای پي اېل په راتلونکي پړاو کې د بدلونونو لپاره د دغه ستر لیګ د لوبډلو مالکین او تنظیموونکي د سلامشورو لپاره سره را غونډ شوي.

هغه څه چې ډېری لوبډلې پرې سلا دي، دا دي چې د هغو لوبغاړو په اړه باید یوه پرېکړه وشي چې په ای پي اېل کې پلورل کیږي خو لوبو ته نه راځي.

همدارنګه هغه لوبغاړي چې پرته له کوم عذر او دلیل د ای پي اېل سیالیو له دوامه وځي، باید پرې دوه کلن بندیز ولګول شي.

څو لوبډلو پر داسې لوبغاړو د دوه کلن بندیز لګولو وړاندیز کړی خو تراوسه داسې کومه پرېکړه وروستۍ شوې نه ده.

که څه هم له یوه لوري د لوبغاړي پلورل او لوبو ته نه راتلل یا له کوم عذر پرته له لوبو د یو لوبغاړي وتل د لوبډلې تګلاره او ستراتیژي ګډوډوي خو له بل لوري پر داسې لوبغاړو د دوه کلن بندیز لګولو سره به ای پي اېل خپل نړیوال لیدونکي او مینه وال له لاسه ورکړي.

په ورته مهال د ای پي اېل د مالکینو ترمنځ د غونډې پرمهال همدا راز بحث شوی، هغه لوبغاړي چې ای پي اېل ته له نوملیکنې سره هم مهاله بل کوم کوچني لیګ او سیالیو ته د ډېرو پیسو په بدل کې د پلورلو په تمه نوملیکنه کوي باید د نوملیکنې دا شرط ورته محدو شي او یوازې ای پي اېل ته نوملیکنه لازمي وګڼل شي یعنې په دې معنا چې هېڅ لوبغاړی باید له ای پي اېل سره هم هم مهاله بل لیګ ته نوملیکنه ونه کړي.

له څو ورځو راهیسې د ای پي اېل د لوبډلو ترمنځ په بېلابېلو موضوعاتو او په دغه لیګ کې د بدلونونو په راوړلو بحثونه او ناندرۍ روانې دي خو تراوسه د بحث شویو بدلونونو په اړه کومه قاطع پرېکړه نه ده شوې.

 

له ملي لوبډلې سره له دوه نیمو کلونو دندې، مسؤولیت او ستړیا وروسته جانتن ټرات په را روانې دېسمبر میاشت کې له افغانستان سره مخه ښه کوي او له دې څو میاشتې وروسته به په پاکستان کې چمپینز ټرافي وي.

د افغانستان کرېکټ بورډ له جانتن ټرات سره د ۲۰۲۲ کال په جولای کې د مشر روزونکي په توګه تړون لاسلیک کړی وو چې په ټوله کې ۲۰۲۳ کال کې مثبت ثابت شو خو د یو ورځني نړیوال جام پر مهال د نوموړي تر روزنې لاندې افغان لوبډلې کابو نیمه پای لوبې ته ځان نزدې کړی وو.

بیا ځلي افغان کرېکټ بورډ د روان کال د جنورۍ میاشت په لومړۍ نېټه له ښاغلي ټرات سره تړون لاسلیک کړ او په همدې کال کې یې تر روزنې لاندې افغانستان د شل اووریز نړیوال جام نیمه پای لوبې ته ووت خو د تړون له مخې لنډ یې په دېسمبر میاشت کې له افغانستان سره ماموریت پای ته رسیږي.

په همدې حال کې د نوموړي د مشر روزونکي د دندې پر مهال په لویو او د پام وړ لاسته راوړنو کې د انګلېنډ، پاکستان، نیوزیلنډ او اسټرالیا پر وړاندې د افغانستان بریاوې د پام وړ وې.

خو له دې ټولو سره سره، جانتن ټرات هغه نوم دی چې تر ډېره به د خپلې رښتیني دندې له مخې د افغانستان د کرېکټ په تاریخ او د مینه والو په زړونو کې پاتې وي.

ښاغلي ټرات د یو جدي مشر په توګه له افغان لوبډلې سره حتی په ډګر کې د لوبې پر مهال هم کار کاوه او هېڅکله له مشورو او لارښوونو ورکولو ستړی نه شو.

بل لور له لوبغاړو سره د نوموړي جدي او مساویانه چلند هغه څه وو چې هر لوبغاړی یې خپل مسوولیت ته متوجه کاوه او هر یو په خپل کار کې بریالی وو.

د کرېکټ افغان مینه وال هم د ښاغلي ټرات د دندې په پای ته رسېدو ناخوښ دي او د نوموړي د ښې روزنې ستاینه کوي.

په ورته مهال جانتن ټرات وار د مخه د سویلي افریقا لیګ کې له پرېټوریا کپیټلز سره د مشر روزونکي په توګه تړون لاسلیک کړی.

دا په داسې حال کې ده چې ښایي د سویلي افریقا لیګ او چمپینز ټرافي په یو وخت وي نو له دې ښکاري چې ټرات به له افغانستان سره خپل تړون بیا تمدید نه کړي.

د افغانستان کرېکټ بورډ د افغان ملي، الف او ۱۹ کلنو لوبډلو د لوبلړیو لپاره له یو شمېر هېوادونو سره خبرې کړې دي.

د افغانستان د کرېکټ بورډ مشرتابه غړو میرویس اشرف او نصیب خان چې په سریلانکا کې یې د کرېکټ نړیوالې شورا په ناسته کې ګډون کړی وو، هلته د یو شمېر هېوادونو د کرېکټ بورډ له مشرانو سره د افغان لوبډلو پر راتلونکو لوبو سلامشورې کړي.

دغه غونډه چې درې ورځې وړاندې پای ته رسېدلې په اړه یې د افغانستان کرېکټ بورډ په خپله رسمي فېسبوک پاڼه لیکلي چې له چمپینز ټرافۍ وړاندې یې د افغان لوبډلو د لوبلړیو لپاره له یو شمېر هېوادونو سره سلامشوې وکړې.

که څه هم د لوبلړیو د حتمي ترسره کېدو په اړه ډېر جزییات نه دي ورکړل شوي خو کرېکټ بورډ ویلي چې د سویلي افریقا، نیوزیلنډ او وېسټ انډیز له مشرانو سره یې د ملي لوبډلې د لوبلړیو د تنظیم او ترسراوي، له بنګله دېش او زمبابوې سره د الف لوبډلې او همدارنګه له پاکستان او متحده عربي اماراتو سره د ملي ۱۹ کلنو لوبډلې د لوبلړیو د ترسره کولو په اړه خبرې کړې دي.

کرېکټ بورډ ویلي د دغو خبرو پایلې او د لوبلړیو څرنګوالی به په لنډ وخت کې اعلان کړي.

بل لور د کرېکټ افغان مینه وال هم په تمه دي چې د سویلي افریقا، نیوزیلنډ او ویسټ انډیز په څېر له لویو لوبډلو سره د افغانستان دوه اړخیزې لوبلړۍ وګوري.

افغان لوبډلې چې په ډېر کم وخت او چټک مزل سره یې ځان یوه پیاوړې لوبډله راڅرګنده کړه تراوسه له لویو او مخکښو لوبډلو سره لکه سویلي افریقا، اسټرالیا، نیوزیلنډ او انګلېنډ سره لوبلړۍ نه دي لوبولي او یوازې په نړیوالو جامونو کې سره مخامخ شوې دي.

بل لور د افغانستان کرېکټ بورډ ویلي چې د ای سي سي په ناسته کې د نړیوالې شورا مشرتابه او ټولو غړو هېوادونو په تېر نړیوال جام کې د افغان لوبډلې د حیرانوونکو لوبو، بریاوو او لاسته راوړنو ستاینه وکړه.

 

د کرېکټ په لویو نړیوالو، خپلمنځي او کورنیو سیالیو کې مېډن یا خالي اوورونه هغه څه دي چې د لوبې د اړخ معلومولو یا د ګټوونکي او بایلوونکي لوري په روښانه کولو کې کلیدي رول لوبوي.

په هره لوبډله کې تر ډېره هغه توپ اچوونکي ته د توپ اچوونې فرصت ورکول کیږي چې کولی شي اوورونه ښه وباسي او په هر اوور کې لاقل درې یا څلور توپونه یا ټول اوور مېډن یا بې له کومې منډې ورکولو ترسره کړي.

موږ په دې معلوماتي مطلب کې درته په یو ورځني نړیوال کرېکټ کې د افغانستان د مېډن یا خالي اوورونو ترسره کوونکي توپ اچوونکي په ګوته کړې دي.

په دغه ریڪارډ کې په لومړي مقام الرونډر محمد نبي عیسی‌خېل دی، نوموړي په ټوله کې د افغانستان لپاره د پنځوس‌اووریز ڪرېکټ په ۱۶۱ پاڼیو کې ۵۰ مېډن اوورونه ترسره ڪړي دي.

بل خوا په دویم ځای بیا مجیب ‌الرحمن ځدران دی؛ چې په پوره ۷۵ لوبو کې یې د افغانستان لپاره ۳۹ مېډن اورونه ترسره ڪړي.

درېیم مقام له راشدخان سره دی؛ نوموړي هم په ټولو ۱۰۳ پنځوس‌اووریزو لوبو کې 32 مېډن اورونه ترسره ڪړي دي.

په څلورم ځای کې افغان پیلیز چټڪ توپ اچوونکی فضل‌الحق فاروقي ده، نوموړي په ټولو 32 پنځوس اووریزو لوبو کې 14 مېډن اورونه ترسره ڪړي.

او په وروستي پنځم مقام کې بیا ټول‌چاری ګلبـدین نایب دی، چې د همدې فارمټ په ۸۳ لوبو کې یې ۱۲ مېډن اورونه ترسره کړي دي.

 

د پاکستان په پلازمېنه اسلام آباد کې د پښتون ژغورنې غورځنګ پر مبارز او سیاسي غړي ګېلامن وزیر له برید او د نوموړي له شهادت وروسته اوس د کرېکټ د لر او بر مینه والو په پاکستان کې د ترسره کېدونکې چمپینز ټرافۍ پر وړاندې کمپاین پیل کړی.

پاکستان چې د تېرې چمپینز ټرافۍ اتلولي یې ګټلې وه نو پر دې بنسټ د راتلونکي چمپینز ټرافۍ کوربتوب هم دې هېواد ته ورکړل شوی.

اوس په خواله رسنیو کې د کرېکټ د لر او بر افغان مینه والو له لوري په پاکستان کې د چمپینز ټرافۍ د ترسره کېدو پر ضد کمپاین پیل شوی.

دوی د کرېکټ د نړیوالې شورا پر فېسبوک پاڼې هرې ځړونې ته په کمېنټ کې لیکي چې په پاکستان کې د ګېلامن وزیر وژل کېدو ته په پام سره یاد هېواد په سیمه کې امن نه دی.
دا به د نړیوالې شورا لپاره غوره وي چې په بل هېواد کې د چمپینز ټرافۍ د ترسره کېدو په اړه غور وکړي.

دوی همدا راز په خواله رسنیو کې د خپلو ځړونو او خپرونو پر مهال هم د کرېکټ نړیواله شورا ذکر کوي او په پاکستان کې د چمپینز ټرافۍ د نه ترسره کولو خبره یې له غوږه تېروي.

په ورته مهال د هند کرېکټ بورډ هم ویلي د امنیتي اندېښنو له امله ښایي ونه شي کولی پاکستان ته د چمپینز ټرافۍ لپاره ولاړ شي خو بیا هم د خپل مرکزي حکومت پرېکړې ته په تمه دي.

په همدې حال کې د پاکستان امن نه دی د کمپاین غړي هم د هند په څېر د افغانستان په ګډون له نورو هېوادونو غواړي چې دا به ورته ښه وي د خپلو لوبغاړو امنیت او خوندیتوب ته لومړیتوب ورکړي او پاکستان کې د چمپینز ټرافۍ لپاره ولاړ نه شي.
پاسکتان امن نه دی، د چمپینز ټرافي باید هلته ونه شي.

له دې ټولو سره سره، تراوسه د کرېکټ نړیوالې شورا د دغه کمپاین او غوښتنو په غبرګون کې څه نه دي ویلي.