د افغانستان ملي لوبډلې د مشر روزونکي په توګه د انګلنډي جانتن ټراټ څه باندې څلور کلنې دورې له پای وروسته کرکت بورډ بل انګلنډی روزونکی د ملي لوبډلې د روزنې لپاره وګوماره.
د افغانستان کرکټ بورډ د انګلستان هېواد تکړه روزونکی ریچارډ پایبس د ملي لوبډلې د مشر روزونکي په توګه وټاکه.
ریچارډ الېکسانډر پایبس د اېنګلنډ په شمال ختیځ کې زېږېدلی .
نوموړی ښي لاسې چټک توپ اچوونکی دی چې په خپل لوبیز ژوند کې ملي لوبډلې ته د رسېدو وړاندې د ټپي کېدو له امله له کرکټ کولو لاس په سر شو او د څو جراحي عملیاتونو وروسته یې روزنې ته مخه کړه.
نوموړی د پاکستان ، بنګلدېش او وېسټ انډیز ملي لوبډلو روزونکی هم پاتې شوی. او په خپل روزنیز ژوند کې یې د بیلابیلو لوبډلو لپاره د پام وړ لاسته راوړنې لرلې دي .
ریچارډ پایبس د ۱۹۹۹ کال نړیوال جام پرمهال د پاکستان ملي لوبډلې سالاکار روزونکی وو چې پکې پاکستانۍ لوبډله تر پایلوبې ورسېده، خو پایلوبه کې یې له آسټرالیا ماته وخوړه.
همدارنګه نوموړی د سویلي افریقا په فرسټ کلاس کرکټ کې هم تر ټولو بریالی روزونکی وو ، ریچارډ ته د سویلي افریقا د کرکټ اتحادیې له لوري د ۲۰۰۸_۲۰۰۹ او ۲۰۱۰_۲۰۱۱ کلونو کې د غوره روزونکي جایزه ورکړل شوه.
په ورته مهال پایبس په هند غوره لیګ سیالیو کې د کلکته نایټ رایډرز لوبډلې روزونکی هم پاتې شوی. نوموړی په ۲۰۰۹م کال کې د کلکتې لوبډلې روزونکی وو چې وروسته بیا د جنوبي افریقا د کیپ کوبراس روزونکی وټاکل شو .
نوموړي په دوو فصلونو کې کوبراس د هېواد ترټولو بریالۍ لوبډله وګرځوله.
ریچارډ پایبس په ۲۰۱۲ کال د مې میاشت کې د بنګلدېش لوبډلې روزونکی وټاکل شو، د نوموړي د روزنې په دوره کې بنګلدېش شل اوریز نړیوال جام ته د چمتوالي لپاره په ۱۶ ترسره شویو لوبو کې ۱۲ لوبې ګټلې وې، خو وروسته له پنځو میاشتو روزنې د بنګلدېش کرکټ بورډ سره د تړون په سر د اختلاف له امله پایبس له خپلې دندې استعفا ورکړه.
همدارنګه نوموړی د ۲۰۱۳ څخه تر ۲۰۱۹م کال پورې د وېسټ انډیز لوبډلې روزونکي، د ظرفیت لوړونې مرکز مشر او ډایرکټر په توګه هم دندې ترسره کړي.
نوی روزونکی، ریچارډ پایبس به د روان کال مارچ میاشت کې د سریلنکا په وړاندې ترسره کېدونکې لوبلړئ وړاندې د ملي لوبډلې سره یوځای شي.
