د افغان ملي لوبډلې غوره توپ اچوونکی او د کرېکت د نړۍ ستوری راشد خان د اسټرالیا د سوداګریز لیګ بېګ باش په راتلونکي پړاو کې نه لوبیږي.
د خان د نه لوبېدو لامل د نوموړي د ملا درد ښوول شوی.
د بېګ باش مسوولینو هم د یاد لیګ په رسمي فېس بک پاڼه د راشد خان د نه لوبېدو خبر تایید کړی او ویلي یې دي چې نوموړی د ملا په برخه ټپي کې دی او د بېګ باش له ۱۳ پړاو وتلی دی. په دغه لیکلو کې زیاته شوې چې«موږ به دې یادوو راشده.»
![](https://acauk.net/wp-content/uploads/2023/11/A4FAE380-4AD8-4DC9-854F-602E7ABB2785-1024x772.jpeg)
د رسنیو د راپورونو له مخې د راشد خان ملا درد کوي او له همدې امله د درملنې لپاره برېټانیا ته تللی.
دا په داسې حال کې ده چې تېر کال د اسټرالیا کرېکټ بورډ له افغانستان سره یو ورځنۍ لوبلړۍ لغوه کړه او لامل یې هم افغانستان کې د طالبانو له خوا د بشري حقونو نقض ګڼلی وو.
![](https://acauk.net/wp-content/uploads/2023/11/39818DC9-707B-44B8-9F43-B70DC4029A1A-683x1024.jpeg)
اوس د کرېکټ ډېری شنونکي په دې باور دي چې ښایي راشد خان له افغانستان سره د اسټرالیا د لوبو د لغوه کولو له امله د بېګ باش راتلونکي پړاو له لوبولو لاس اخیستی وي خو تراوسه د افغانستان کرېکټ بورډ او راشد خان په دې اړه په رسمي توګه څه نه دي ویلي.