د قوش تپې ملي شل اوریزې سیالۍ له کندهار کابل ته انتقال او له ټاکل شوې نېټې وځنډول شوې

د افغانستان کرېکټ بورډ د کورني کرېکټ په چوکاټ کې د قوش تپې ملي شل اوریزو سیالیو د ځنډولو اعلان وکړو.

د کورني کرېکټ مسؤول نظیم جار عبدالرحیمزي په دې اړه په یو خبري کنفرانس کې وویل چې دغه سیالۍ یې له کندهار کابل ته ولېږدولې او له ټاکل شوې نېټې یو څه په ځنډ د نوي مهالوېش له مخې د می په لومړۍ نېټه پیل او تر ۱۳مې به دوام وکړي.

ښاغلي عبدالرحیمزي یې د ځنډ او له کندهار کابل ته د لېږد لامل تخنیکي او لوژستیکي ستونزې یادې کړې.

نوموړي وویل په دې وروستیو کې مو په کندهار کې د کورني کرېکټ په چوکاټ کې بېلابېلې سیالۍ ترسره کړې خو دا چې په کابل کې مو دا ډېر وخت سیالۍ نه دي ترسره کړي، غوره مو وګڼله د قوش تپې ملي سیالۍ پلازمېنې ته را ولېږدوو.

نظیم جار عبدالرحیمزي یې بل لامل کندهار ته د تخنیکي وسایلو وړل یاد کړل او زیاته یې کړه چې په ښه کیفیت د لوبو د خپرولو لپاره یې ځینې وسایل له بهر هم را غوښتي او د لارې د لېرې والي او خرابوالي له کبله نه شي کولی ټول وسایل کندهار ته ولېږدوي نو ځکه یې د دغو سیالیو لپاره کابل ښه انتخاب وبللو.

په همدې حال کې له قوش تپې وروسته ځینې نورې ملي سیالۍ هم پلان شوي چې تراوسه یې نېټې او وخت نه دی په ډاګه شوی.

ای پي اېل کې د کلکتې له خوا پرلپسې څلورو لوبو کې د ګربز نه لوبولو ته غبرګونونه؛

د ای پي اېل سږني پړاو کې په بېلابېلو لوبډلو کې د افغان لوبغاړو له لوبېدو سره هم مهاله په ځانګړې توګه د رحمن الله ګربز اړوند لوبډلې کلکتې تراوسه ګربز ته د لوبېدو چانس نه دی ورکړی.

کلکتې تر دې دمه په روان ای پي اېل کې څلور لوبې کړي چې درې یې ګټلي او یوه یې بایللې ده خو په دې ټولو څلورو لوبو کې تر اوسه د ګربز د لوبولو څرک نه دی لیدلی شوی.

سره له دې چې ګربز ته په وروستیو دوو لوبو کې د اېمپکټ لوبغاړو په نوملړ کې ځای ورکړل شوی وو خو بیا هم نوموړی د لوبولو لپاره را ونه ایستل شو.

د کلکتې لوبډلې دې کار په خواله رسنیو په ځانګړې توګه د رحمن الله ګربز د افغان مینه والو غبرګونونه راپورته کړې.

رحمن الله ګربز یوازې د کلکتې د خواله رسنیو په پاڼو کې لیدل کیږي چې د دغې لوبډلې د فېسبوک او اېکس پاڼو له خوا یې عکسونه او بېلابېلې وېډیو ګانې له پښتو کېپشنونو سره خپریږي خو لا هم په عملي میدان کې نه دی لوبول شوی.

د کرېکټ افغان مینه وال وایي، ګربز لږ تر لږه د دې وړ دی چې له تېرو څلورو لوبو لاقل په یوې کې د لوبولو چانس ورکړل شوی وی خو د کلکتې لوبډلې مدیریت نوموړی له پامه غورځولی.

دوی د یادې لوبډلې پر خواله رسنیو د پرلپسې عکسونو او وېډیو ګانو په خپرولو هم نیوکه کوي او زیاتوي چې ایا ګربز یوازې د کلکتې لوبډلې د فېسبوک او اېکس پاڼو د چلولو لپاره اخیستل شوی چې تفریحي وېډیو ګانې او عکسونه یې خپاره شي، که د لوبو لپاره اخیستل شوی؟

د کلکتې لوبډلې پر پاڼو په تبصرو کې هم د ګربز مینه وال غوښتنه کوي چې د نوموړي د عکسونو او وېډیوګانو د خپرولو پرځای ورته یوولس کسیزه لوبډله کې ځای ورکړئ، میدان ته یې راوباسئ او ویې لوبوئ.

د کلکتې لوبډلې مدیریت تراوسه د دغو ټولو نیوکو او غوښتنو پر وړاندې کوم غبرګون نه دی ښودلی خو په سږني ای پي اېل کې دغې لوبډلې انګلېنډي لوبغاړي فېل سالټ ته ډېر پام کړی او د لومړۍ لوبې پرمهال یې روزونکي ویلي وو چې فېل سالټ ته یې ځکه موقع ورکړې چې نوموړی د ګربز په پرتله په تمریناتو او له دې وړاندې په سوداګریزو لیګونو ښه کې ښه ځلېدلی وو.
دا په داسې حال کې ده چې رحمن الله ګربز په دې وروستیو کې په شل اوریزو لوبو کې ډېر ښه نه وو ځلېدلی.

په ورته مهال په کلکتې لوبډلې کې بل افغان ځوان لوبغاړی الله محمد غضنفر هم شته چې تازه له خپلې لوبډلې سره یوځای شوی خو دا چې موقع به ورکړل شي او که نه او یا به د ګربز په برخلیک اخته وي؟ په راتلونکو لوبو کې به ولیدل شي.

په همدې حال کې د ای پي اېل په بله لوبډله ګجرات ټایټنز کې درې افغان لوبغاړي، راشد خان، عظمت الله عمرزی او نور احمد لکڼوال لوبیږي چې تراوسه درې واړو ته په څو لوبو کې د لوبېدو چانس ورکړل شوی.

بل لور په لکنو سوپر جاینټز لوبډله کې نوین الحق ته هم پرلپسې په ټولو لوبو کې د توپ اچوونې وخت ورکړل شوی، په ممبۍ انډینز لوبډله کې محمد نبي ته یو ځل د لوبېدو چانس ورکړل شوی او په سنرایزرز حیدرآباد لوبډله کې فضل الحق فاروقي هم د رحمن الله ګربز له برخلیک سره مخ دی.

د ای پي اېل سیالیو په دوام کې د درې افغان لوبغاړو اړوند لوبډلې ګجرات ټایټنز د نوین الحق له اړوندې لوبډلې لکنو سوپر جاینټز سره لوبه وکړه.

د لوبې پچه لکنو وګټله او ګجرات ته یې لومړی د توپ اچوونې بلنه ورکړه.

لکنو په ټولو شل اورونو کې د پنځه لوبغاړو په زیان ګجرات ټایټنز ته ۱۶۳ منډې هدف ورکړ.

د لکنو لپاره مارکس سټوینس ۵۸، کېل راهول ۳۳، نېکولاس پوران ۳۲ او ایاس بوداني ۲۰ ډېرې منډې جوړې کړې.

بل لور د ګجرات ټاینټز لوبډله کې دا ځل یوازې دوه افغان لوبغاړو راشد خان او نور احمد لکڼوال ته د لوبېدو موقع ورکړل شوې وه.

خو د دغو دوو افغان لوبغاړو د توپ جادو هم دا ځل ګجرات له ماتې ونه شو ژغورلی.

راشد خان او نور احمد چې تل یې د ګجرات لپاره په توپ اچوونه کې اغېزمن رول لوبولی په دې لوبه کې ونه شول کولی له یوې زیاتې وېکټې واخلي، راشد په څلورو اورونو کې د ۲۸ منډو په ورکولو یو وېکټ ترلاسه کړه او نور احمد په څلورو اورونو کې د کومې وېکټ له ترلاسه کولو پرته ۲۲ منډې ورکړې.

په توپ وهنه کې هم د راشد او نور د لوبډلې ملګرو د پام وړ ننداره نه درلوده او د تمې خلاف یې ټول لوبغاړي زر له له لاسه ورکړل.

د ګجرات لپاره یوازې سی سودرسن ۳۱، راهول تیواتیا ۳۰ او شوبمن ګېل ۱۹ ډېرې منډې وکړې.

راشد خان چې ډېر کله په توپ وهنه کې هم د ګجرات لپاره مسوولیت منوونکې لوبه کوي او د تېر کال په پړاو کې یې د خپلې توپ وهنې پر مټ د یادې لوبډلې لپاره ډېرې لوبې ګټلې وې، په دې لوبه کې ونه شول کولی توپونه ولوبوي او په صفر منډو وسوځېد.

ګجرات دا لوبه د ټولو لوبغاړو په له لاسه ورکولو په ۱۸.۵ اورونو کې د ۳۳ منډو په توپیر وبایلله.

په همدې حال کې په سیالې لوبډلې کې بل افغان لوبغاړی نوین الحق هم ولوبېد او په څلورو اورونو کې یې د یو لوبغاړي په سوځولو سره ۳۷ منډې ورکړې.

په ټوله کې لکنو سوپر جاینټز دا لوبه د یاش ټاکهور په غوره توپ اچوونې او پنځه وېکټو په اخیستو وګټله.

¹

د پاکستان متقاعدو لوبغاړو د راستنېدو په لړ کې د محمد عامر پر وړاندې د رمیز راجا تریخ غبرګون

پاکستان راتلونکي شل اوریز نړیوال جام کې د ماتې خوړلو له وېرې او د یوې پیاوړې لوبډلې د جوړولو لپاره خپل پخواني متقاعد لوبغاړي را پخلا کوي.

په دې لړ کې د پاکستان پخواني او تازه تقاعد شوي لوبغاړي د یاد هېواد د کرېکټ بورډ په خوښه او سلا بېرته لوبډلې او تمریناتو ته راستانه شول.

تازه د پاکستان پخوانی متقاعد چپ لاسی تېز توپ اچوونکی محمد عامر هم له پاکستاني بورډ سره تر خبرو اترو وروسته بېرته لوبډلې ته راستون شوی.

د محمد عامر د راستنېدو پر وړاندې د پاکستان پخواني لوبغاړي، د کرېکټ بورډ پخوانی مشر او مبصر رمیز راجا تریخ غبرګون ښودلی.

راجا وایي، هغه لوبغاړي چې تورن دي او د خپل هېواد نوم بدوي هېڅکله باید د هېواد د بیا استازیتوب، د بېرته را ګرځېدو او لوبو موقع ور نه کړل شي.

محمد عامر په ۲۰۱۰ کال کې د انګلېنډ پر وړاندې په لارډز لوبغالي کې په مېچ فکسېنګ تورن شوی وو او له امله یې پنځه کاله له کرېکټ کېنول شوی وو.

رمیز راجا د پاکستان له نیوز چېنل سره په خبرو کې وړاندې زیاته کړه چې د محمد عامر له کبله دی هم له پېغورونو او خبرو سره مخ وو. وایي، کله به یې چې کمېنټري او تبصره کوله خلکو به ده ته هم د مېچ فکسېرانو له ډلې خطاب کاوه او ځورول کېدم به.

ښاغلی راجا ټینګار کوي چې که له محمد عامر سره نور خلک خواخوږي وښیي خو زما په کتاب کې دا ډول خلک نه بخښوونکي دي او حتی خدای مه کړه که زما خپل زوی هم ورته کار وکړي زه به یې بیخي عاق کړم.

دا په داسې حال کې ده چې عامر د انګلېنډ پر وړاندې د مېچ فکسېنګ د تور له امله له پنځه کلن بندیز وروسته بېرته له ۲۰۱۶ تر ۲۰۲۰ کال پورې یو ځل بیا د پاکستان لپاره ولوبېد.

محمد عامر په ۲۰۲۰ کال کې د انګلېنډ پر وړاندې په شل اوریزه لوبه کې له لوبېدو وروسته د پاکستاني کرېکټ بورډ د مدیریت له دوه مخي او توپیري چلند شکایت وکړ او له همدې امله یې په یاد کال کې له کرېکټ سره مخه ښه وکړه خو تازه یې له کرېکټ بورډ سره له مثبتو خبرو اترو وروسته تقاعد واخیست او له پاکستانۍ لوبډلې سره په تمریناتو کې یوځای شوی.

1. ↩︎

د سترو معتبرو سوداګریزو لیګونو د مخکښو لوبډلو شل اوریز لیګ، چمپینز لیګ

د هند غوره لیګ، د اسټرالیا بېګ باش، د سویلي افریقا لیګ، پاکستان سوپر لیګ او ورته نورو سوداګریزو لیګونو د مخکښو لوبډلو شل اوریز «چمپینز لیګ» د بیا پیلولو په اړه بحثونه راپورته شوي.

دا مهال د هند، اسټرالیا او انګلېنډ کرېکټ بورډونو ترمنځ د دغه لیګ د بیا په لاره اچولو په اړه سلامشورې روانې دي.

د سوداګریزو لیګونو د شهرت په دې دوران کې اوس د مخکښو هېوادونو کرېکټ بورډونه په دې فکر کې شوي چې اوس یې وخت دی یاد چمپینز لیګ بیا پیل کړي خو د پیل پر وړاندې یې اساسي خنډ د مناسب وخت ټاکل دي.

ویل کیږي چې ښایي د نارینوو د سوداګریزو لیګونو د مخکښو لوبډلو د چمپینز لیګ نه وړاندې د ښځینوو لیګ ترسره شي او کېدی شي د نارینوو د لیګ لپاره راتلونکي یا بل کال کې مناسب وخت وکتل شي.

په ورته مهال د اسټرالیا لوبډلمشر پټ کمېنز هم د دغه لیګ پر پیلېدو ټینګار کړی او ویلي یې دي چې د کرېکټ نړیوالو او سوداګریزو لوبو ترمنځ باید تناسب وساتل شي او په دې برخه کې فوټبال ښه بېلګه کېدی شي.

کمېنز وړاندې زیاتوي چې د کرېکټ یو داسې پلټ فارم جوړولو ته اړتیا ده چې په هغې کې د هند او پاکستان په ګډون د نړیوالو لوبو او سوداګریزو لیګونو مخکښ او نوموتي لوبغاړي ولوبیږي.

کمېنز پورتنۍ څرګندونې په داسې حال کې کوي چې د پاکستان او هند ترمنځ د سیاسي ناندریو له کبله پاکستاني لوبغاړي په هند غوره لیګ کې نه اخیستل کیږي او دا راز هندي لوبغاړي له ای پي اېل پرته په بل هېڅ لیګ کې نه لوبیږي.

پټ کمینز همدا راز وایي، د چمپینز لیګ په ترسره کېدو به په کلنۍ توګه دا هم په ډاګه شي چې په نړۍ کې د کرېکټ کوم لیګ او د لیګ کومې لوبډلې پیاوړې او مخکښې دي.

په همدې حال کې د سوداګریزو لیګونو د مخکښو لوبډلو چمپینز لیګ د لومړي ځل لپاره په ۲۰۰۹ کال کې پیل او تر ۲۰۱۴ کال پورې یې شپږ پړاوه ترسره شوي وو چې له هغې را وروسته د کرېکټ بورډونو د بې پامۍ له کبله همداسې پاتې شو.

دغه لیګ څلور ځله په هند او دوه ځل په سویلي افریقا کې ترسره شوی وو چې څلور ځله د هندي غوره لیګ لوبډلو، دوه ځلې چنای سوپر کېنګز او دوه ځلې ممبۍ انډینز ګټلی وو، یو ځل د سویلي افریقا نیو سوت افریقا وېلز لوبډلې او یو ځل د اسټرالیا سېډني سېکسرز لوبډلې ګټلی وو.

بنګلور د ای پي اېل لومړنۍ لوبډله شوه چې په خپل کور کې ماتې خوري

د ای پي اېل په درشل کې رویل چلېنجرز بنګلور لوبډلې په خپل کوربتوب له کلکتې سره لوبه وکړه.

د لوبې پچه کلکتې وګټله او لومړی یې د توپ اچوونې پرېکړه وکړه.

بنګلور د خپلې توپ وهنې په پاڼۍ کې د پخواني لوبډلمشر ویرات کوهلي په بریدګرې لوبې او چټکو ۸۳ ناټ اوټ منډو مقابلې لوبډلې ته ۱۸۳ منډې هدف ورکړ.

د بنګلور لپاره ویرات ۸۳، کی مېرون ګرین ۳۳ او ګلېن مکسوېل ۲۸ ډېرې منډې جوړې کړې.

د کلکتې د توپ وهنې پاڼۍ کې د معمول خلاف الراونډر او مخکښ لوبغاړی سونیل نارین د لوبې په پیل کې راووت او خپلې لوبډلې ته یې چټک پیل ورکړ.

نوموړي د ۴۷ چټکو منډو په جوړولو سره د پاتې راتلونکو لوبغاړو لپاره هدف نږدې کړ او له مخامخ کېدونکي فشار یې وژغورل.

د کلکتې لپاره وینکاتېش لایر ۵۰، نارین ۴۷، فېل سالټ ۳۳ او لوبډلمشر شریاس لایر ۳۹ ډېرې منډې وکړې.

دا لوبه بنګلور ته په خپل کور کې د اوو وېکټو په توپیر په ماتې ورکولو پای ته ورسېده.

تر دې دمه په ای پي اېل کې ترسره شوې ټولې لوبې کوربه لوبډلو ګټلې وې خو بنګلور یوازنۍ او لومړنۍ لوبډله شوه چې په خپل کور کې یې ماتې وخوړه.

رویل چیلنجرز بنګلور له ۲۰۱۶ کال راهیسې تر اوسه په بنګلور کې د کلکته نایټ رایډرز پر وړاندې بریا نه ده ترلاسه کړې او دا یې په خپل کور کې له یادې لوبډلې شپږمه ماتې وه.

بل لور د ای پي اېل په بله لوبه کې راجستان رویلز د نوین الحق اړوند لوبډلې لکنو سوپر جاینټز ته د ۲۱ منډو په توپیر ماتې ورکړه.

د ممبۍ انډینز لپاره د هاردېک پانډیا تازنۍ لوبډلمشري او پر وړاندې یې مخالفتونه

د ګجرات ټایټنز پخوانی لوبډلمشر هاردېک پانډیا چې د ای پي اېل سږني پړاو کې د ممبۍ انډینز لوبډلمشري کوي، د نوموړي د ټاکل کېدو له پیله تراوسه یې د لوبډلمشرۍ پر وړاندې مخالفتونه او غبرګونونه نه دي ساړه شوي.

پانډیا چې د ممبۍ پخوانی لوبغاړی دی او په تېر پړاو کې ګجرات د لوبډلمشر په توګه اخیستی وو، سږ کال خپلې پخوانۍ لوبډلې بېرته له ځان سره کړ خو د نوموړي یو شرط دا وو چې باید لوبډلمشري ورکړل شي.

د ممبۍ تېر لوبډلمشر روهېت شرما چې په ټول ای پي اېل کې یو له مخکښو لوبډلمشر دی او تر اوسه یې د یادې لوبډلې په څو ګونو اتلولیو کې رول لوبولی له سږنۍ لوبډلمشرۍ کېنول شوی او پانډیا یې ځایناستی ټاکل شوی دی.

د لوبډلمشر په توګه د پانډیا له ټاکل کېدو سره هغه وخت د بومرا په ګډون د ممبۍ یو شمېر لوبغاړو هم مخالفت ښودلی وو.

که څه هم د ای پي اېل تېر کلني پړاو کې د ګجرات لپاره د پانډیا لوبډلمشري د راشد خان په څېر لوبغاړو او اشېش نېهرا په څېر روزونکو سره بریالۍ وه او ګجرات یې تر پای لوبې ورساوه خو سږکال یې د ممبۍ لپاره د لوبډلمشر په توګه د ای پي اېل پرانیسته بریالۍ نه وه.

د نوموړي د لوبډلمشرۍ پر وړاندې نه یوازې د ممبۍ بلکې د نورو لوبډلو مینه وال هم خپل مخالفتونه او غبرګونونه لري او د ممبۍ لپاره پانډیا د لوبډلمشرۍ وړ نه ګڼي.

سږکال ممبۍ خپله لومړنۍ لوبه د پانډیا پخوانۍ لوبډلې ګجرات ټایټنز ته وبایلله او پانډیا د لوبډلمشر په توګه خورا سختې شېبې او فشار تېر کړ تر دې چې میدان ته راغلیو ټولو مینه والو پرې پېغور ډوله چغې او نارې وهلې چې ګواکې لوبډلمشري نه شي کولی.

په همدې حال کې بیا د کرېکټ هندي شننونکي سونیل ګاواسکر د پانډیا د ډاډ او حوصلې لپاره ډېر په ځغرده وویل چې د ممبۍ د مینه وال په توګه یې ملاتړ کوي په داسې حال کې چې شننونکي او کمېنټېټران تل بې طرفه وي او کوم قاطع لوری نه اخلي.

د هاردېک پانډیا لپاره تر دې وروسته د لوبډلمشر په توګه له ګجرات سره مخامخ کېدل خورا سخت دي ځکه نوموړی د یادې لوبډلې پخوانی مشر وو او له ممبۍ لوبډلې نه شي کولی د افغان لوبغاړو په ګډون د ګجرات له لوبډلې سره وجنګیږي.

اسټرالیا له افغانستان سره راتلونکې شل اوریزه لوبلړۍ وځنډوله

د اسټرالیا کرېکټ بورډ اعلان کړی چې له افغانستان سره یې په راتلونکې اګسټ میاشت کې ترسره کېدونکې شل اوریزه لوبلړۍ وځنډوله.

یاد بورډ د ځنډولو لامل په افغانستان کې د ښځو او نجونو اوسنی وضعیت او په نړۍ کې د ښځینه وو د کرېکټ وده په ګوته کړې ده.

د اسټرالیا کرېکټ بورډ وایي پرېکړه یې له حکومت سره په مشوره کړې او له افغانستان سره به د راتلونکو لوبو په اړه د کرېکټ نړیوالې شورا او افغان کرېکټ بورډ سره په جریان کې پاتې شي او تجدید نظر به ورباندې کړي.

له دې داسې ښکاري چې د اسټرالیا کرېکټ بورډ په خپلو ځینو پرېکړو کې خپلواک نه دی او ډېر کله یې حکومت د خپلو سیاسي موخو لپاره په چارو کې لاسوهنه کوي.

دا په داسې حال ده چې په کرېکټ او نورو لوبو کې تل ټینګار پر دې کیږي چې لوبغاړي او اړوندې ادارې یې باید له سیاسي اغېزو او حکومتي لاسوهنو لېرې وي او د دې ترڅنګ باید کرېکټ او سیاست جلا وي، نه باید سیاست ورزشي اړیکې خرابې کړي خو په دې وروستیو کې د پاکستان او هند او اسټرالیا او افغانستان په لوبو د سیاست اغېز له ورایه ښکاري.

اسټرالیا تر دې وړاندې په ۲۰۲۱ کال کې په افغانستان کې د سیاسي بدلون له امله ټېسټ لوبه او بیا ۲۰۲۳ کال په مارچ میاشت کې هېواد کې د بشري حقونو د وضعیت له امله له افغان لوبډلې سره یو ورځنۍ لوبلړۍ لغوه کړې وه.

د اسټرالیا د یادې پرېکړې په غبرګون کې یو شمېر افغان ستورو لکه راشد خان او نوین الحق او ګڼو نورو د یاد هېواد له سوداګریز لیګ سره پرېکون اعلان کړ او تر دې دمه په کې ونه لوبېدل.

له بلې خوا په تېر نړیوال جام کې د اسټرالیا او افغانستان د لوبې پر مهال نوین الحق یاد هېواد ته پېغور هم ورکړی وو چې اوس ورته بشري حقونه مهم نه دي بلکې دوه پواینټونه مهم دي.

شننونکي وایي په ټوله کې د اسټرالیا دا پرېکړه سیاسي رېښه او موخې لري که یاد هېواد واقعاً بشري حقونو ته ژمن وی، نو په تېر نړیوال جام کې به هم له افغانستان سره له لوبې لاس په سر شوی وی او له هغې وړاندې به یې په ۲۰۲۲ کال کې په خپل کور کې نړیوال جام کې د افغانستان د ګډون مخه نیولی وی.

له اجرائیه ریئسانو سره د کرېکټ نړیوالې شورا ناسته او نوې پرېکړې

د کرېکټ نړیوالې شورا د جمعې په ورځ د هېوادونو د کرېکټ بورډونو له اجرائیه رییسانو سره ناسته وکړه، د سپین بال فارمټ پر ځینو اصولو یې تجدید نظر وکړ او ځینې نوي قوانین یې وضع کړل.

نړیوالې شورا تېرکال په دېسمبر میاشت کې په امتحاني ډول یو قانون وضع کړی وو چې د سپین بال فارمټ لوبو کې باید هر اوور پسې بل اوور په ۶۰ ثانیو کې پیل شي که دوه ځل داسې پیل نه شي نو کومه خبره نه ده خو که درېیم ځل هم پیل نه شي نو مقابلې لوبډلې ته پنځه منډې پنالتې ورکول کیږي.

دا قانون له دېسمبر تر اپرېل میاشت په امتحاني ډول وو.
نړیوالې شورا اوس د دغه قانون مثبتو پایلو ته په کتو چې لوبه په کې لنډه او زر خلاصیږي، اوږدمهاله کړ او د راتلونکي شل اوریز نړیوال جام نه به د دغه قانون حتمي پلي کول پیل شي.

بل لور په دې ناسته کې د راتلونکې نړیوال جام د نیمه پایلوبې او پایلوبې لپاره د ریرزف یا احتیاطي ورځې په اړه هم پرېکړه وشوه چې د باران یا بل عذر پر مهال دا لوبې بلې ورځې ته واړول شي.

او په نړیوال جام کې د ګروپ سټېج هغه لوبو کې چې پر مهال یې باران کیږي د پوره لغوه کېدو پر ځای به یې له دې وروسته هغه لوبډله چې دویم توپ وهنه کوي حداقل پنځه اووره لوبوي او د ناک اوټ سټېج لوبو کې به لږ تر لږه لس اووره کیږي څو ګټوونکی او بایلوونکی لوری معلوم شي.

او د ناستې وروستۍ پرېکړه دا شوه چې د ۲۰۲۶ کال د شل اوریز نړیوال جام لپاره به دولس لوبډلې مستقیم لاره پیدا کوي.
په دغو لوبډلو کې به اته هغه لوبډلې وي چې د سږکال شل اوریز نړیوال جام له مخې په نوملړ کې تر اتمې شمېرې ځایونه خپلوي او پاتې څلور لوبډلې به د رنکګېنګ له مخې وځي او اته نورې لوبډلې به د غوراوي پړاو نه له تېرېدو وروسته لار پیدا کوي.