ګجرات د افغان لوبغاړو پر مټ د ای پي اېل تر ټولو ستر هدف جوړونکې لوبډلې ته ماتې ورکړه
ګجرات ټایټنز د ای پي اېل سیالیو په دوام خپله درېیمه لوبه له سنرایزرز حیدراباد سره ترسره کړه.
ګجرات په خپله دې لوبه کې د درې افغان لوبغاړو د ښې توپ اچوونې پر مټ د ای پي اېل د تاریخ تر ټولو ستر هدف جوړونکې لوبډلې حیدراباد ته ماتې ورکړه او په دې سره یې د هند غوره لیګ کې دویمه بریا خپله کړه.
په دې لوبه کې دا ځل افغان ځوان لوبغاړي نور احمد لکڼوال ته هم د لوبېدو موقع ورکړل شوې وه.
د یادې لوبې پچه حیدراباد وګټله او په ټاکلو شلو اورونو کې یې د اتو وېکټو په له لاسه ورکولو ګجرات ته ۱۶۲ منډې هدف ورکړ. په داسې حال کې چې تازه یې په خپله تېره لوبه ریکارډ ماتوونکی هدف جوړ کړی وو.
نور احمد د سږني ای پي اېل په خپله لومړنۍ لوبه کې د ګجرات لپاره پیل په لاسه راوړنه وکړ او پیلیز او بریدګر لوبغاړی ټراوېس هېډ یې په ۱۹ منډو له مخې لېرې کړ.
نوموړي د یوې وېکټې په اخیستو په خپلو څلورو اورونو کې ۳۲ منډې ورکړې.
همدا راز د ګجرات لپاره د پیل اورونو کې عظمت الله عمرزي د یوې وېکټې په اخیستو په خپلو درې اورونو کې ۲۴ منډې او راشد خان هم د یوې وېکټې په اخیستو په څلورو اورونو کې ۳۳ منډې ورکړې.
د یادو درې افغان لوبغاړو ښه توپ اچوونه د دې لامل شوه چې د حیدراباد توپ وهوونکي له فشار سره مخ شي او د ډېرو منډو جوړېدو مخه یې ونیول شي.
د حیدر اباد لپاره یوازې ابېشېک شرما او عبدالصمد ډېرې ۲۹ منډې وکړې.
د افغان لوبغاړو اړوند لوبډلې ګجرات ټاینټز وکولی شول په ۱۹.۱ اورونو کې د درې لوبغاړو په زیان له ټاکلي هدف ډېرې ۱۶۸ منډې وکړي او بریا ترلاسه کړي.