د ممبۍ انډینز لپاره د هاردېک پانډیا تازنۍ لوبډلمشري او پر وړاندې یې مخالفتونه

د ګجرات ټایټنز پخوانی لوبډلمشر هاردېک پانډیا چې د ای پي اېل سږني پړاو کې د ممبۍ انډینز لوبډلمشري کوي، د نوموړي د ټاکل کېدو له پیله تراوسه یې د لوبډلمشرۍ پر وړاندې مخالفتونه او غبرګونونه نه دي ساړه شوي.

پانډیا چې د ممبۍ پخوانی لوبغاړی دی او په تېر پړاو کې ګجرات د لوبډلمشر په توګه اخیستی وو، سږ کال خپلې پخوانۍ لوبډلې بېرته له ځان سره کړ خو د نوموړي یو شرط دا وو چې باید لوبډلمشري ورکړل شي.

د ممبۍ تېر لوبډلمشر روهېت شرما چې په ټول ای پي اېل کې یو له مخکښو لوبډلمشر دی او تر اوسه یې د یادې لوبډلې په څو ګونو اتلولیو کې رول لوبولی له سږنۍ لوبډلمشرۍ کېنول شوی او پانډیا یې ځایناستی ټاکل شوی دی.

د لوبډلمشر په توګه د پانډیا له ټاکل کېدو سره هغه وخت د بومرا په ګډون د ممبۍ یو شمېر لوبغاړو هم مخالفت ښودلی وو.

که څه هم د ای پي اېل تېر کلني پړاو کې د ګجرات لپاره د پانډیا لوبډلمشري د راشد خان په څېر لوبغاړو او اشېش نېهرا په څېر روزونکو سره بریالۍ وه او ګجرات یې تر پای لوبې ورساوه خو سږکال یې د ممبۍ لپاره د لوبډلمشر په توګه د ای پي اېل پرانیسته بریالۍ نه وه.

د نوموړي د لوبډلمشرۍ پر وړاندې نه یوازې د ممبۍ بلکې د نورو لوبډلو مینه وال هم خپل مخالفتونه او غبرګونونه لري او د ممبۍ لپاره پانډیا د لوبډلمشرۍ وړ نه ګڼي.

سږکال ممبۍ خپله لومړنۍ لوبه د پانډیا پخوانۍ لوبډلې ګجرات ټایټنز ته وبایلله او پانډیا د لوبډلمشر په توګه خورا سختې شېبې او فشار تېر کړ تر دې چې میدان ته راغلیو ټولو مینه والو پرې پېغور ډوله چغې او نارې وهلې چې ګواکې لوبډلمشري نه شي کولی.

په همدې حال کې بیا د کرېکټ هندي شننونکي سونیل ګاواسکر د پانډیا د ډاډ او حوصلې لپاره ډېر په ځغرده وویل چې د ممبۍ د مینه وال په توګه یې ملاتړ کوي په داسې حال کې چې شننونکي او کمېنټېټران تل بې طرفه وي او کوم قاطع لوری نه اخلي.

د هاردېک پانډیا لپاره تر دې وروسته د لوبډلمشر په توګه له ګجرات سره مخامخ کېدل خورا سخت دي ځکه نوموړی د یادې لوبډلې پخوانی مشر وو او له ممبۍ لوبډلې نه شي کولی د افغان لوبغاړو په ګډون د ګجرات له لوبډلې سره وجنګیږي.

اسټرالیا له افغانستان سره راتلونکې شل اوریزه لوبلړۍ وځنډوله

د اسټرالیا کرېکټ بورډ اعلان کړی چې له افغانستان سره یې په راتلونکې اګسټ میاشت کې ترسره کېدونکې شل اوریزه لوبلړۍ وځنډوله.

یاد بورډ د ځنډولو لامل په افغانستان کې د ښځو او نجونو اوسنی وضعیت او په نړۍ کې د ښځینه وو د کرېکټ وده په ګوته کړې ده.

د اسټرالیا کرېکټ بورډ وایي پرېکړه یې له حکومت سره په مشوره کړې او له افغانستان سره به د راتلونکو لوبو په اړه د کرېکټ نړیوالې شورا او افغان کرېکټ بورډ سره په جریان کې پاتې شي او تجدید نظر به ورباندې کړي.

له دې داسې ښکاري چې د اسټرالیا کرېکټ بورډ په خپلو ځینو پرېکړو کې خپلواک نه دی او ډېر کله یې حکومت د خپلو سیاسي موخو لپاره په چارو کې لاسوهنه کوي.

دا په داسې حال ده چې په کرېکټ او نورو لوبو کې تل ټینګار پر دې کیږي چې لوبغاړي او اړوندې ادارې یې باید له سیاسي اغېزو او حکومتي لاسوهنو لېرې وي او د دې ترڅنګ باید کرېکټ او سیاست جلا وي، نه باید سیاست ورزشي اړیکې خرابې کړي خو په دې وروستیو کې د پاکستان او هند او اسټرالیا او افغانستان په لوبو د سیاست اغېز له ورایه ښکاري.

اسټرالیا تر دې وړاندې په ۲۰۲۱ کال کې په افغانستان کې د سیاسي بدلون له امله ټېسټ لوبه او بیا ۲۰۲۳ کال په مارچ میاشت کې هېواد کې د بشري حقونو د وضعیت له امله له افغان لوبډلې سره یو ورځنۍ لوبلړۍ لغوه کړې وه.

د اسټرالیا د یادې پرېکړې په غبرګون کې یو شمېر افغان ستورو لکه راشد خان او نوین الحق او ګڼو نورو د یاد هېواد له سوداګریز لیګ سره پرېکون اعلان کړ او تر دې دمه په کې ونه لوبېدل.

له بلې خوا په تېر نړیوال جام کې د اسټرالیا او افغانستان د لوبې پر مهال نوین الحق یاد هېواد ته پېغور هم ورکړی وو چې اوس ورته بشري حقونه مهم نه دي بلکې دوه پواینټونه مهم دي.

شننونکي وایي په ټوله کې د اسټرالیا دا پرېکړه سیاسي رېښه او موخې لري که یاد هېواد واقعاً بشري حقونو ته ژمن وی، نو په تېر نړیوال جام کې به هم له افغانستان سره له لوبې لاس په سر شوی وی او له هغې وړاندې به یې په ۲۰۲۲ کال کې په خپل کور کې نړیوال جام کې د افغانستان د ګډون مخه نیولی وی.

له اجرائیه ریئسانو سره د کرېکټ نړیوالې شورا ناسته او نوې پرېکړې

د کرېکټ نړیوالې شورا د جمعې په ورځ د هېوادونو د کرېکټ بورډونو له اجرائیه رییسانو سره ناسته وکړه، د سپین بال فارمټ پر ځینو اصولو یې تجدید نظر وکړ او ځینې نوي قوانین یې وضع کړل.

نړیوالې شورا تېرکال په دېسمبر میاشت کې په امتحاني ډول یو قانون وضع کړی وو چې د سپین بال فارمټ لوبو کې باید هر اوور پسې بل اوور په ۶۰ ثانیو کې پیل شي که دوه ځل داسې پیل نه شي نو کومه خبره نه ده خو که درېیم ځل هم پیل نه شي نو مقابلې لوبډلې ته پنځه منډې پنالتې ورکول کیږي.

دا قانون له دېسمبر تر اپرېل میاشت په امتحاني ډول وو.
نړیوالې شورا اوس د دغه قانون مثبتو پایلو ته په کتو چې لوبه په کې لنډه او زر خلاصیږي، اوږدمهاله کړ او د راتلونکي شل اوریز نړیوال جام نه به د دغه قانون حتمي پلي کول پیل شي.

بل لور په دې ناسته کې د راتلونکې نړیوال جام د نیمه پایلوبې او پایلوبې لپاره د ریرزف یا احتیاطي ورځې په اړه هم پرېکړه وشوه چې د باران یا بل عذر پر مهال دا لوبې بلې ورځې ته واړول شي.

او په نړیوال جام کې د ګروپ سټېج هغه لوبو کې چې پر مهال یې باران کیږي د پوره لغوه کېدو پر ځای به یې له دې وروسته هغه لوبډله چې دویم توپ وهنه کوي حداقل پنځه اووره لوبوي او د ناک اوټ سټېج لوبو کې به لږ تر لږه لس اووره کیږي څو ګټوونکی او بایلوونکی لوری معلوم شي.

او د ناستې وروستۍ پرېکړه دا شوه چې د ۲۰۲۶ کال د شل اوریز نړیوال جام لپاره به دولس لوبډلې مستقیم لاره پیدا کوي.
په دغو لوبډلو کې به اته هغه لوبډلې وي چې د سږکال شل اوریز نړیوال جام له مخې په نوملړ کې تر اتمې شمېرې ځایونه خپلوي او پاتې څلور لوبډلې به د رنکګېنګ له مخې وځي او اته نورې لوبډلې به د غوراوي پړاو نه له تېرېدو وروسته لار پیدا کوي.

په شل اوریزه لوبلړۍ کې د ایرلېنډ له خوا د افغانستان ماتې خو د ځوانو لوبغاړو ځلېدل

افغانستان د ایرلېنډ پر وړاندې د شل اوریزې لوبلړۍ لومړۍ لوبه د ۳۸ منډو په توپیر بایلوده.

په لوبه کې دا ځل د تېر خلاف د نوملړ ټولو ځوانو لوبغاړو ته د لوبېدو موقع ورکړل شوې وه.

د لوبې پچه افغانستان وګټله او لوبډلمشر راشد خان لومړی د ډګر ساتنې پرېکړه وکړه.

افغانستان د خپلو ځوانو استعدادونو پر مټ د توپ اچوونې ښه پیل درلود.

راشد خان له اوږد ځنډ وروسته یو ځل بیا په خپل پخواني سټایل او جادو را وګرځېد.

په ډګر ساتنه کې هم د افغان لوبغاړو خواري له پامه د غورځولو نه ده.

راشد خان او ننګیال خروټي د توپ اچوونې په زړه پورې ننداره وړاندې کړه.

راشد درې او ننګیال دوه لوبغاړي وسوځول او کمې منډې یې ورکړې.

په لومړیو کې پر ایرلېنډي لوبغاړو د افغان توپ اچوونکو او ډګر ساتونکو فشار او اغېز ډېر وو وېکټې یې زر له لاسه ورکړې خو په وروستیو اورونو کې هېري ټېکټر بریدګره لوبه وکړه ۵۶ ناسوځېدلې منډې یې جوړې کړې او د ایرلېنډ هدف یې تر یو نیم سلو منډو ورساوه.

افغانستان د ایرلېنډ د ۱۵۰ منډو په تعقیب کې پاتې راغی او په ۱۱۱ منډو یې ټول لوبغاړي له لاسه ورکړل.

افغان پیلیزو لوبغاړو ونه شول کولی ښه پیل واخلي، رحمن الله ګربز په صفر او صدیق اتل په یوه منډه وسوځېده.

له دې وروسته منځنیو لوبغاړو لکه ابراهیم ځدراڼ او عظمت الله عمرزي هم لوبه ونه شوه کړی.

د افغانستان یوازې درې چټک لوبغاړي په صفر منډو وسوځېدل او پاتې لوبغاړو هم د هدف پوره کولو لپاره ملا ونه تړله.

د افغانستان لپاره یوازې اسحاق رحیمي غوره او تېزه توپ وهنه وکړه او په ۲۲ توپونو یې ۳۳ منډې جوړې کړې له اسحاق وروسته محمد نبي ۲۵ او اعجاز احمدزي ۱۶ ډېرې منډې وکړې.

د ایرلنډ لوبډلې بېن وایټ د افغانستان څلور لوبغاړي، جوش لېټل درې، مارک اداير او بري مکارتې یو یو توپ وهوونکی وسوځاوه.

که څه هم د ځوانو لوبغاړو په راتګ سره د افغانستان بریا ته هیلې وې خو له محمد اسحاق او ننګیالي پرته نور لوبغاړي ډېر ګټور او اغېزمن تمام نه شول.

خو مینه وال وایي، ګټه په تاوان کیږي، د ځوانو لوبغاړو لومړنۍ نړیوالې لوبې دي. دا چې ولوبېدل او ځینو یې له ځانه وړتیا ښکاره کړه، افغانستان په دې سره د عصري کرېکټ لپاره نوي استعدادونه ترلاسه کړل چې همدا بسنه کوي.

افغانستان او اېرلېنډ به د دویمې شل اوریزې لوبې لپاره سبا سره مخامخ شي.

د ایرلېنډ پر وړاندې د افغان لوبغاړو شل اوریز نوملړ او د ګڼو نویو ځوانو لوبغاړو هرکلی

افغان کرېکټ بورډ د ایرلېنډ پر وړاندې د شل اوریزې لوبلړۍ لپاره د ګڼو ځوانو لوبغاړو په ګډون د افغان لوبډلې نوملړ په ډاګه کړ.

د تېر خلاف دا ځل داسې نویو ځوانو لوبغاړو ته موقع ورکړل شوې چې دا یې لومړنۍ نړیوالې په ځانګړې توګه شل اوریزې لوبې دي.

په نوملړ کې د دولس لوبغاړو عمرونه له ۲۴ او د ۵ لوبغاړو له ۲۲ کلونو کم دي.

دا ښایي لومړی ځل وي چې په یو وار په لوبډله کې دومره ځوانو لوبغاړو ته ځای ورکول کیږي.

په ځوانو لوبغاړو کې صدیق اتل، محمد اسحاق، اعجاز احمدزی او ننګیال خروټی شامل دي.

ننګیال او اعجاز په لومړي وار په شل اوریز نوملړ کې اخیستل شوي. دا به د دواړو لوبغاړو لومړنۍ شل اوریزې نړیوالې لوبې وي.

دا په داسې حال کې ده چې ننګیال خروټي په وروستۍ یو ورځنۍ لوبه کې د خپلې وړتیا په ښکاره کولو ثابته کړه چې اوس مهال تر بل هر وخت پر ځوانو لوبغاړو باور او تکیه کېدی شي.

د افغان کرېکټ بورډ دا اقدام د مینه والو له خوا په لومړي ځل له دومره پراخ هرکلي او ستاینې سره مخ شوی.

په ورته مهال له څه نا څه اوږد ځنډ وروسته راشد خان او مجیب هم له رغېدو سره سم افغان لوبډلې ته را ګرځېدلي دي.

افغانستان او ایرلېنډ به د مارچ په ۱۵مه شل اوریزه لوبلړۍ پیل کړي.

افغان لوبډلې ایرلېنډ ته په دریمه یو ورځنۍ لوبه کې د ۱۱۷ منډو په ستر توپیر ماتې ورکولو سره د یادې لوبلړۍ اتله شوه.

افغانستان یو ځل بیا د معمول په څېر دا لوبه هم د لوبغاړو په جادویي توپ اچوونې وګټله.

د لوبې پچه اېرلېنډ ګټلې وه او د خپلو لوبغاړو د قوت نقطې ته په کتلو یې د تل په څېر لومړی توپ اچوونه وټاکله.

افغانستان که څه هم د توپ وهنې پیل ښه وکړ او پیلیز لوبغاړي رحمن الله ګربز نیمه سلیزه جوړه کړه.
خو بل پیلیز لوبغاړی ابراهیم ځدراڼ دا ځل ونه توانېد ډېرې منډې جوړې کړي او خپله وېکټ یې زر له لاسه ورکړه چې همغه وو د لوبغاړو د سوځېدو تسلسل دوام وکړ او پرلپسې څو چټکې وېکټې لاړې او هدف هېڅ ښه مخکې ولانړ.

د افغانستان لپاره تر ټولو ښه ملګرتیا د لوبډلمشر حشمت الله شهیدي او محمد نبي ترمنځ وشوه چې ۹۷ منډې ملګرتیا یې وکړه او هدف یې له ۲۰۰ منډو واړوو.

په ورته مهال افغان لوبغاړو وروستۍ یو ورځنۍ لوبه په روژه خوله وکړه او د نبي او شهیدي د توپ وهنې پر مهال یې د ماښام له اذان سره سم خپله روژه ماته کړه.

د لوبغاړو له روژه ماتي او لمونځ وروسته د افغانستان د توپ اچوونې په پاڼۍ کې ځوانو توپ اچوونکو په ځانګړې توګه ننګیالي خروټي په خپلې لومړۍ یو ورځنۍ نړیواله لوبه کې حیرانوونکې ننداره وړاندې کړه.

د افغانستان لپاره فضل الحق فاروقي د ډېر کله په څېر بیا هم د توپ اچوونې ښه پیل وکړ او د اېرلېنډ یو لوبغاړی یې په پیل کې وسوځاوه.

له دې وروسته محمد نبي او ننګیال خروټي په فوق العاده او په زړه پورې توپ اچوونې سره د افغانستان لپاره په دغه لوبه کې سترې کارنامې وکړې.

نبي یو وار بیا ثابته کړه چې د نړۍ بهترین الراونډر دی.
نوموړي د خپل لوبیز ژوند بهترینه توپ اچوونه وکړه، د پنځه لوبغاړو د سوځولو تر څنګ یې ۴۸ منډې جوړې کړې. او په ټوله کې یې د یو مشر او مجرب لوبغاړي رول ادا کړ.

بل خوا ننګیال خروټی چې لومړنۍ نړیواله لوبه یې وه، په خپل لومړنۍ اوور کې یې دولس منډې ورکړې او تر فشار لاندې وو، خو نبي یې لاس ونیو او حوصله یې ورکړه او هماغه وه چې د ایرلینډي لوبغاړو د منډو جوړولو خنډ او وېکټو اخیستو سبب شو.

ننګیال له شاپور او مجیب وروسته دریم افغان لوبغاړی دی چې په خپله لومړنۍ یو ورځنۍ لوبه کې څلور لوبغاړي سوځوي.

شننوکي په دې باور دي چې نوموړی په راتلونکې کې د محمد نبي ښه ځای ناستی جوړېدلی شي.

په همدې حال کې د یادې لوبې د غوره لوبغاړي جایزه محمد نبي، د سټایلېش لوبغاړي ننګیال خروټي او د لوبلړۍ غوره لوبغاړي جایزه رحمن الله ګربز ته ورکړل شوه.

د پاکستان سوپر لیګ یا پي اېس اېل د دوام په درشل کې د نوین الحق اړوند لوبډلې د نهم ځل لپاره نیمه پای لوبې ته لار وویسته او د دویم ځل لپاره یې د اتلولۍ ګټلو لپاره د مینه والو هیلې را ژوندۍ کړې.

د پېښور زلمو لوبډلې په روان پي اېس اېل کې ټولې نهه لوبې کړي چې له دې ډلې یې پنځه ګټلي، درې بایللي او یوه یې بې پایلې پای ته رسېدلې.

دا د یادې لوبډلې نهم وار دی چې نیمه پای لوبې ته لار پیدا کوي او څلور ځله پای لوبې ته وتلې؛ خو پرته له یو ځل اتلولۍ ګټلو بېرته هر وار تش لاس را ستنه شوې ده.

په همدې حال کې په سږني سوپر لیګ کې له پېښور زلمو سره یوازنی افغان لوبغاړی نوین الحق دی.

نوین ته د پېښور زلمو په پنځو لوبو کې د لوبېدو چانس ورکړل شوی او په هره هغه لوبه کې چې نوین الحق ورسره نه وو، بایللې یې دي.

که څه هم د توپ اچوونې پر مهال د نوین د منډو د ورکړې کچه زیاته وي خو بیا هم په مهمو شېبو کې اغېزناکه توپ اچوونه کوي او د لوبغاړو په سوځولو د پېښور زلمو د بریا لپاره لاره هواروي.

په ورته مهال د سوپر لیګ په سږني پړاو کې تر ټولو ډېرې مخکښې منډې جوړونکی لوبغاړی د پېښور زلمو لوبډلمشر بابر اعظم دی چې ۴۴۷ منډې یې کړي او په توپ اچوونه کې انګلېنډی لوبغاړی لوکو ووډ دی چې په اتو لوبو کې یې لس وېکټې اخیستي دي.

د افغانستان ملي لوبډلې پیلیز توپ وهوونکي نور علي ځدراڼ پرون د ایرلېنډ پر وړاندې د لوبې له پیل مخکې له هر ډول نړیوال کرېکټ تقاعد اعلان کړ. له لوبې وړاندې افغان لوبډلې نوموړي ته په احترام ودرېدل او د کرېکټ د رواج سره سم، د بیټونو د کارډ اف آنر په جوړولو رخصت او له نوموړي مننه وکړه.

ځدراڼ په ۲۰۰۹ کال کې په کرېکټ پیل کړی وو چې په دې ۱۵ کلن مزل کې یې ټولې دوه ټېسټ، ۵۱ یو ورځنۍ او ۲۳ شل اوریزې نړیوالې لوبې وکړې.

نوموړي د ۵۱ یو ورځنیو نړیوالو لوبو په ۵۰ اننګزونو کې ۱۲۱۶ منډې او د ۲۳ شل اوریزو نړیوالو لوبو په ۲۳ اننګزونو کې ۵۹۷ منډې جوړې کړې.

په یو ورځنیو لوبو کې د ځدراڼ تر ټولو ډېرې منډې ۱۱۷ دي او په شل اوریزو کې ۶۳ دي چې په ټوله کې یې د یوې سلیزې او یوولس نیمه سلیزو پر مټ نږدې ۲ زره منډې جوړې کړي دي.

ځدراڼ که څه هم پخپله د کرېکټ سره مخه ښه وکړه خو افغان کرېکټ ته یې د خپلې روزنې لاندې د کورني دوه نور ځوانان ابراهیم ځدراڼ او محیب ځدراڼ روزلي چې اوسمحال د افغان ملي لوبډلې برحاله غړي دي.

دا په داسې حال کې ده چې په دې وروستیو کې په لوبډله کې د پوخ عمره لوبغاړو پر شتون نیوکې زیاتې شوي او غوښتنه دا ده چې ځوانو او وړ لوبغاړو ته دې ځای ورکړل شي.

افغانستان ته په ماتې ورکولو ایرلېنډ د ټېسټ فارمټ په تاریخ کې لومړنۍ بریا ثبت کړه

د افغانستان او ایرلېنډ ترمنځ یوازنۍ ټېسټ لوبه د سیالې لوبډلې په بریا پای ته ورسېده.

په ټوله کې د افغانستان لپاره د دې لوبې تر ټولو نسبتاً ښه ورځ دویمه ورځ وه چې په ۲۶۳ منډو د ایرلېنډ ټوله لوبې په دویمه ورځ د افغان لوبډلې پیل په دې ښه نه وو چې د سور توپ فارمټ نه د تمې خلاف یې دوه لوبغاړي زر له لاسه ورکړل.

خو په همدې حال کې لوبډلمشر شهیدي له نورعلي ځدراڼ سر تر یو وخته پر ویشتنځای ودرېد او له ځدراڼ او له دې وروسته یې له ګربز سره د منډو ښه ملګرتیا وکړه.

خو پرون په دریمه ورځ لوبډلمشر شهیدي او ګربز ته سترګې وې چې وبه کولی شي افغانستان ته ښه پیل ورکړي مګر شهیدي د ورځې په سر کې وسوځېد او له دې وروسته ناصر جمال نه چې په تېرو لوبو کې ښه نه دی ځلېدلی، تمه کېده چې له ګربز سره به منډو ته چټکتیا ورکړي خو ویې نه شول کولی تر ډېره پر ویشتنځای پاتې شي او په دوه منډو اوټ شو چې په دې سره ډېر مسوولیت او فشار ګربز ته ور وګرځېد.

له جمال وروسته کریم جنت هم د ګربز ملا ونه شوه تړلی او له ګربز مخکې یې کډې بار کړې چې په دې سره نوموړی اړ شو د معمول په څېر د لوبې لوری بدل کړي ورو او محتاط ولوبیږي چې په همدې حال کې یې وېکټ هم له لاسه ورکړه.

افغان لوبډلې د ایرلېنډ په دویمه پاڼۍ کې د توپ وهنې ښه پیل درلود.
او نوید ځدراڼ په همغه سر کې دوه لوبغاړي وسوځول خو دې هم د ایرلېنډ د لوبغاړو اراده کمزورې نه کړه او د ۱۱۱ منډو هدف یې د څلورو لوبغاړو په زیان ترلاسه کړ.

افغانستان ایرلېنډ ته د دې لوبې په بایللو سره تاریخ ور بدل کړ او ایرلېنډ د سور توپ په فارمټ کې لومړنۍ بریا ثبت کړه.

دا په داسې حال کې ده چې دا سږکال په ټېسټ فارمټ کې د افغانستان پرلپسې دویمه ماتې ده، تر دې وړاندې یې سریلانکا ته هم یوازنۍ ټېسټ لوبه ورکړې وه.

په ورته مهال د افغانستان پرلپسې ماتو مینه وال خواشیني کړي او د لوبغاړو پر غوراوي یې غوغاوې راپورته کړي.
دوی د لوبډلې پر انتخاب نیوکه لري او ټینګار کوي چې لوبغاړي د واسطو او شناخت پر بنسټ غوره کیږي خو افغان کرېکټ بورډ تراوسه د مینه والو اندېښنو ته غبرګون نه دی ښودلی.

هندي بورډ له یو لړ نویو بدلونونو سره د خپلو لوبغاړو قراردادونه خپاره کړل

د هند کرېکټ بورډ په بېلابېلو کټګوریو کې له نویو بدلونونو سره د خپلو لوبغاړو د مرکزي قراردودونو نومونه اعلان کړل.

یادې ادارې خپلو دېرشو لوبغاړو ته په څلورو کټګوریو کې قراردادونه ورکړي چې ای پلس، ای، بي او سي کټګورۍ یې د یادولو دي.

په ای پلس کټګورۍ کې یوازې څلورو لوبغاړو ته مرکزي قرار داد ورکړل شوی، په ای کې له دریو نویو لوبغاړو سره شپږ لوبغاړو ته، په بي کې د دوو لوبغاړو په شا ته تګ او یو لوبغاړي په مخ ته تګ سره پنځو لوبغاړو ته او په سي کټګورۍ کې د لسو نویو لوبغاړو په ګډون ۱۵ لوبغاړو ته مرکزي قرار داد ورکړل شوی.

همداراز د ایشان کیشن، شریس ایر او اومېش یادو په ګډون شپږو لوبغاړو ته سږکال مرکزي قراردادونه نه دي ورکړل شوي.

سږکال د هندي بورډ له خوا د دغو قراردادونو د معاش په اړه څه نه دي ویل شوي خو تېر کال یې د همدې کټګوریو له مخې د ای پلس کټګورۍ لوبغاړو اووه کروړه هندۍ روپۍ، د ای قرارداد پنځه کروړه هندۍ روپۍ، د بي درې کروړه او د سي کټګورۍ یو کروړ هندۍ روپۍ معاش ښودل شوی وو.

په ورته مهال له مرکزي قراردادونو ور ها خوا د هند د غوراوي کمېټې له بورډ غوښتي چې پنځو نورو تېزو توپ اچوونکو ته هم احتیاطي قراردادونه ورکړي چې د لوبغاړو د روغتیایي ستونزو پر مهال وکولی شي لوبه وکړي او له وړاندې چمتو اوسي.

په یادو پنځو لوبغاړو کې اکاش، ډیپ، اومران ملک، ویجی کومار، یاش دیال او کدیراپا شامل دي.