اسټرالیا د څلورم ځل لپاره او د سږکال د نولس کلنو نړیوال جام اتلولي وګټله.
اسټرالیا په پای لوبه کې د هندي الاصله اسټرالیایي لوبغاړي حرجاس سېنګ د ښې توپ وهنې پر مټ هند ته د ۷۹ منډو په توپیر ماتې ورکړه.
اسټرالیا په یاد نړیوال جام کې پنځه لوبې ګټلې وې، یوه یې بې پایلې پای ته رسېدلې وه او دا راز یې په نیمه پای لوبه کې پاکستان ته په ماتې ورکولو ځان د نړیوال جام تر پای لوبې رسولی وو.
اسټرالیا له سږني کال سره د نولس کلنو نړیوال جام په تاریخ کې څلور ځله اتلولي ګټلې چې په ۱۹۸۸ کال کې د نړیوال جام د لومړني پړاو اتلولي، په ۲۰۰۲ کال کې د نړیوال جام اتلولي، په ۲۰۱۰ کال کې د نړیوال جام اتلولي او سږ کال یې د نړیوال جام اتلولي وګټله.
په همدې حال کې بیا د سږکال فاینلېسټې هندۍ لوبډلې پنځه ځله د نولس کلنو د نړیوال جام اتلولي ګټلې خو سږ کال پرې اسټرالیا لاسبري شوه او د نړیوال جام ټرافي یې خپله کړه.
دا په داسې حال کې ده چې د وروستي یو ورځني نړیوال جام پای لوبې ته هم د اسټرالیا او هند ملي لوبډلې وتلې وې چې اسټرالیا هند ته په ماتې ورکولو سره د ۲۰۲۳ کال د یو ورځني نړیوال جام اتلولۍ ګټلې وه.
