په ۲۰۲۵ کال کې د کورنیو سیالیو له اړخه په افغانستان دننه هم ګرم کال و چې فرسټ کلاس، واخان جام، لېسټ اې، شپږیزه، ګرېډ ون او ګرېډ ټو سیالۍ د یادونې وړ دي.

لومړی د احمد شاه ابدالي فرسټ کلاس لوبې له می میاشتې تر جون پورې د ننګرهار په کوربتوب د څلورو لوبډلو ترمنځ ترسره شوې چې میوند اتلانو یې د اتم پړاو سیالیو اتلولي وګټله.

په ټوله کې د فرسټ کلاس د پای لوبې په ګډون ټولې ۱۳ لوبې ترسره شوې چې څه باندې یوه میاشت یې دوام وکړ.
شپږ لوبې بې پایلې شوې او پاتې شپږو کې درې د ماهیپر ستورو او یوه– یوه لوبه میوند اتلانو، پامیر لېجنډز او هندوکش سټرایکرز وګټله.

په دې سیالیو کې د توپ وهوونکو له ډلې تر ټولو ډېرې منډې شاهدالله کمال جوړې کړي چې د شپږو لوبو په لسو پاڼیو کې یې د دوه سلیزوپر مټ ۵۴۱ منډې وکړې.

ورپسې په ترتیب سره په دویم مقام حشمت الله شهیدي د څلورو لوبو په لسو پاڼیو کې د درې سلیزو پر مټ ۴۹۵ او په درېیم مقام رحمن الله ځدراڼ د شپږو لوبو په لسو پاڼیو کې ۴۷۶ منډې جوړې کړې.

سږکال په فرسټ کلاس لوبو کې د یوې پاڼۍ تر ټولو لوړې انفرادي منډې حشمت الله شهیدي جوړې کړې چې ۲۰۵ منډې یې وکړې.

په همدې حال کې د توپ اچوونکو له ډلې د فرسټ کلاس په سږنیو لوبو کې شرف الدین اشرف تر ټولو ډېرې وېکټې واخیستې چې د شپږ لوبو په دولس پاڼیو کې یې ۳۶ لوبغاړي سوځولي دي.

ورپسې په دویم مقام یمین احمدزي د شپږو لوبو په دولس پاڼیو کې ۲۶ وېکټې او په درېیم مقام ضیاء الرحمن اکبر د پنځو لوبو په نهو پاڼیو کې ۲۵ وېکټې ترلاسه کړې دي.

د یوې پاڼۍ تر ټولو غوره توپ اچوونه بشیر احمد افغان کړې چې د ۴۹ منډو په ورکولو یې ۶ لوبغاړي سوځولي.

په ورته وخت، فرسټ کلاس لوبو پسې په جون میاشت کې د کندز ولایت په کوربتوب د واخان شل اوریزې سیالۍ ترسره شوې او د هندوکش لوبډلې په اتلولۍ پای ته ورسیدې.

هندوکش سټرایکرز، ماهیپر ستوري، میوند اتلان او پامیر لېجېنډز د سږ کال ملي شل اوریز لیګ ګډون کوونکې لوبډلې وې.

پایلوبې ته پامیر لېجېنډز او د ماهیپر ستورو لوبډلې وتلې وې.
چې په پایله کې یې هندوکش سټرایکرز وکولی شول د یوې وېکټې په توپیر پامیر لوبډلې ته ماته ورکړي او د شل اوریز جام اتلولي خپله کړي.

په دې ټورنمنټ کې تر ټولو ډېرې منډې ذبید اکبري جوړې کړې چې د هندوکش سټرایکرز لپاره یې ۱۶۷ منډې ترسره کړې او مخکښ ویکټ اخیستونکي یما عرب وو چې د خپلې لوبډل لپاره یې ۱۱ لوبغاړي وسوځول.

د یادونې وړ ده چې واخان شل اووریزې سیالۍ تېرکال د قوشتېپې سیالیو په نوم ترسره شوې وې.

په ۲۰۲۵ کال کې په ټوله کې د کرېکټ د مینه والو لپاره د بېلابېلو جالبو پېښو له کبله ډېر ځانګړی وو او د همدغو پرمختګونو له مخې کرېکټ لا ډېر پراخ شو او وغوړېد.

په دې کال کې د کرېکټ چمپینز ټرافۍ سیالۍ له اوږدې مودې اته کلونو وروسته بېرته ترسره شوې، چې د کرېکټ مینه‌والو ته یې ځانګړې ارزښت درلود.
په دې سیالیو کې د نړۍ یوازې اته غوره لوبډلو ګډون کړی و، چې له امله یې هره لوبه د پایلوبې په کچه مهمه بلل کېده.

په دې ټورنمنټ کې د ځینو سیالیو ځایونه د سیاسي او امنیتي شرایطو له امله بدل شول، چې دا خپله د چمپینز ټرافۍ یو له مهمو بحثونو څخه و. خو سره له دې هم سیالۍ په منظم ډول ترسره شوې او د نندارچیانو پام یې ځانته راواړاوه.

چمپینز ټرافۍ د ځوانو لوبغاړو لپاره د ځان ښودلو ښه فرصت هم و. یو شمېر نويو لوبغاړو د سترو لوبډلو پر وړاندې په زړه پورې لوبې وکړې او نړیوال کرېکټ ته یې د خپل راتګ اعلان وکړ. لکه د افغان لوبډلې پیلیز توپ وهوونکي صدیق الله اتل چې د اسټرالیا پر وړاندې په زړه پورې توپ وهنه وکړه.
همدارنګه ځینې مشهور او تجربه‌لرونکي لوبغاړي بیا د تمې خلاف د فشار لاندې پاتې راغلل.

په ورته وخت د توپ اچوونکو او توپ وهوونکو ترمنځ توازن د دې ټورنمنټ بله ځانګړنه وه. په ډېرو لوبغالو کې داسې سیالۍ ولیدل شوې چې دواړه خواوې په کې اغېزناکې وې، چې دې کار لوبو ته لا زیات خوند ورکړ.

بل لور د دغو سیالیو جالب اړخ له کلونو وروسته د هندۍ لوبډلې اتلولي وه. د هند ملي لوبډلې له ۱۲ کالو وروسته د یو ورځنیو نړیوالو لوبو جام وګټلو.

هندۍ لوبډلې په چمپنتز ټرافۍ سیالیو کې هېڅ لوبه ونه بایلله او په پای لوبه کې یې هم مخکښې لوبډلې نیوزیلنډ ته په ماتې ورکولو سره دغه جام وګاټه.

په ټوله کې، د ۲۰۲۵ کال چمپینز ټرافۍ نه یوازې د لوړې سیالۍ شاهد و، بلکې د کرېکټ د نړیوال نظم، ځوان استعدادونو او د لوبې د بدلونونو څرګند انځور یې هم وړاندې کړ.

هند لوبډلې د سپټمبر په ۲۸مه نېټه په دوبۍ نړیوال کرکټ لوبغالي کې په زړه‌راښکونکې پایلوبه کې پاکستان ته د پنځو وېکټو په توپیر ماته ورکړه.

هند او پاکستان د لومړي ځل لپاره د اسیا جام پایلوبه کې د یو بل سره مخامخ شول.

د پایلوبې پچه هند وګتله او د توپ اچوونې پرېکړه یې وکړه.

د پاکستانۍ لوبډلې پیلیزو توپوهونکو ښه پیل واخیست، خو وروستیو  کې لوبغاړي یې د ډېرو منډو او ملګرتیا په جوړېدو کې پاتې راغلل. پاکستان د صاحبزاده فرهان ۵۷ او فخر زمان ۴۶ منډو په مټ هند ته د ۱۴۷ منډو هدف وټاکه.

کلدیپ یادو د څلورو ،بومرا، اکسر پټیل او ورون چکروتي هر یو د دوه دوه لوبغاړو په سوځېدو بریالي شول.

هندۍ لوبډلې وکولی شول د لوبې وروستي اوور کې د شیوام ډوبي ۳۳ او تېلک ورما ۶۹ ناسوځېدلو منډو پر مټ پاکستان ته د پنځو وېکټو په شتون ماته ورکړي.

روان ټورنمنټ کې دا دریم ځل وو چې پاکستانۍ لوبډله د هند په وړاندې د سیالۍ ډګر ته ښکته کیږي او ټولو درې لوبو کې له ماتې سره مخ شوه.

ابیشک شرما د ۳۱۴ منډو په جوړولو د ۲۰۲۵ کال اسیا جام سیالیو مخکښ منډې جوړوونکی او کلدیپ یادو د ۱۷ لوبغاړو په سوځولو مخکښ وېکټ اخیستونکي لوبغاړي شول.

دا دریم ځل وو چې هند لوبډلې اسیا جام بې له کومې ماتې پای ته ورساوه. تر دې وړاندې په ۲۰۱۶ کال اسیا جام کې د اېم اس ډهوني او ۲۰۱۸ اسیا جام کې د روهېت شرما په لوبډلمشرۍ هند لوبډله توانېدلې وه چې اسیا جام بې له کومې ماتې پای ته ورسوي.

ابیشک شرما  ۷ لوبو کې د ۳۱۴ منډو په ترسره کولو په یو شل اوریز اسیا جام کې د ډېرو منډو ترسره کولو ریکارډ په خپل نوم کړ. نوموړی شپږم هندی لوبغاړی شو چې په درې پرلپسې لوبو کې یې له پنځوسو ډیرې منډې ترسره کړې.

د شل اوریز اسیا جام سیالیو په یو فصل کې د ډیرو وېکټو اخیستو ریکارډ هم د کلدیپ یادو په نوم شو، تر ده وړاندې د اماراتو امجد جاوید په ۲۰۱۶ کال کې ۱۲ وېکټې ترلاسه کړې وې.

د ۲۰۲۵ کال اسیا جام سیالۍ داسې مهال ترسره شوې چې د هند او پاکستان هېوادونو ترمنځ سیاسي ستونزې د اپریل ۲۲مې د پهلګام برید وروسته ډیرې شوې وې چې د برید په پایله کې۲۶ هندي سرتیري وژل شوي وو ، له همدې امله ډیرو هندي مینه والو د پاکستان په وړاندې د لوبو نه کولو غوښتنې هم کړې وې.

د دې هېوادونو د لوبډلو ترمنځ د لوبې په ډګر کې هم د سیاسي ستونزو او اختلافونو اثرات لیدل کېدل. د دواړو هېوادونو ترمنځ په ترسره شویو درې لوبو کې هندي لوبغاړو پاکستاني لوبغاړو ته د لاس ورکولو څخه ډډه وکړه آن تر دې چې لوبډلمشر سوریاکومار د پایلوبې له ګټلو وروسته، د اسیایي شورا او د پاکستان کرکټ بورډ مشر محسن نقوي په لاس د ټرافي د اخیستلو څخه انکار وکړ، د نوموړوي په وینا د دا کار یې د هندۍ لوبډلې د لوبغاړو په غوښتنه وکړ.

دا چې هند لوبډلې له محسن نقوي څخه د ټرافي اخیستلو نه انکار وکړ، نوموړي ټرافي او د هندي لوبغاړو مډالونه له ځان سره ویوړل چې دا کار د هند کرکټ بورډ لخوا وغندل شو.

د هندوستان د کرکټ بورډ منشي، دیواجیت سیکیا ، د پاکستان کرکټ بورډ لخوا ترسره شوې کړنه وغندله او ویې ویل:

“موږ پرېکړه کړې وه چې د اسیا کپ ګټلې ټرافي د ACC د مشر لخوا نه ترلاسه کوو، ځکه هغه د داسې هېواد استازی دی چې دا مهال زموږ سره په شخړه کې دي. خو هغه ددې حق نلري چې جام او مډالونه له ځانه سره یوسي”.

نوموړي ویلي چې د محسن نقوي دا کار ډېر د افسوس وړ او له ورزشي اخلاقو څخه لرې دی او هیله مند دی چې جام او مډالونه ژر تر ژره بېرته هند ته وسپارل شي.

د اسیا جام له ګټلو وروسته د هند صدراعظم نرېندرا مودي هم په ټولنیزو رسنیو کې لیکلي چې د ( سندور پوځي عملیاتو ) کې یې پاکستان ته د سپورټ په ډګر کې هم ماته ورکړه.

په ورته مهال لوبډلمشر سوریاکومار یادو هم په خپلو خبرو کې وویل چې د اسیا جام څخه ترلاسه شوې خپلې ټولې پیسې هندي پوځ ته ډالۍ کوي.

لدې سره هند لوبډلې وکولی شول د نهم ځل لپاره د اسیا جام اتلولي په خپل نوم کړي.

د افغانستان پریمیر لیګ د ترسره کېدو په تړاو یو ځل بیا په ټولنیزو رسنیو کې غوغا جوړه ده او کرېکټ بورډ يې په اړه د معلوماتو پهورکولو کې پاتې راغلی، تازه را رسېدلي معلومات دا دي چې د کرېکټ له نړیوالې شورا سره د APL موضوع بحث شوې ده خو د اماراتو کرکټ بورډ، د څو اوونيو په تېرېدو لا هم د افغانستان د کرکټ غږ ته د «هو يا نه» ځواب نه دی ورکړی.

د افغان کرکټ بورډ وياند سيد نسيم سادات د تېرې اګسټ مياشتې په ۲۵مه اې‌سي‌اې ته ويلي و چې « افغان کرکټ بورډ لخوا ټاکل شوې کاري کميټې د اګسټ  په ۱۹مه په اماراتو کې خپل‌منځي ناسته کړې، له هغه وروسته يې د کرکټ له نړیوالې شورا سره ناسته کړې؛ د کرکټ نړیوالې شورا د غوښتنليک جوړولو لپاره ورته لارښوونې ورکړي، او د اګسټ مياشتې په ۳۰مه به د متحده‌ عربي‌ اماراتو له کرکټ بورډ سره د APL د کوربه لوبغالي په اړه بحث وکړي، که اماراتو ورسره ونه ‌منله نو عمان ته د APL د کوربه په سترګه ګوري.»

دا هغه خبر و چې موږ د اګسټ په ۲۶مه خپور کړ؛ د همدې میاشتې له ۳۰مې وروسته ACA له افغان کرکټ بورډ سره بیا اړيکه ونيوله؛ له ځنډ وروسته د بورډ وياند ښاغلي سادات زموږ د پوښتنو ځواب کې وويل چې غونډه ځنډېدلې او د روانې سېپټمبر مياشتې نهمه او لسمه يې د غونډې نوې ممکنه نېټې يادې کړې

د سېپټمبر په لسمه موږ له ښاغلي سادات سره بيا اړيکه درلوده؛ په لږ ځنډ، د بورډ ځواب دا و چې «ښاغلی نصيب خان، د افغان کرکټب ورډ اجرايوي مشر اماراتو ته تللی ترڅ و اړوند موضوعات بحث کړي، د پايلو په اړه به يې له موږ سره معلومات شريک شي.»

خو له يوې اوونۍ وروسته، د افغان کرکټ بورډ لخوا موږ ته هیڅ ډول معلومات رانه ‌کړل شول؛ موږ د سېپټمبر په ۱۷مه ښاغلی نسيمسادات بيا وپوښت، ځواب يې دا و چې ( افغان کرکټ بورډ، لا هم د اماراتو د کرکټ بورډ د « هو » يا « نه » ځواب ته په تمه دی )

 زموږ د لومړي خبر او اوسني راپور ترمنځ ۲۳ ورځې ووتې خو ښکاري چې د لومړيو مالوماتو او اوسنيو هغو ترمنځ ډېر توپير نه ‌دی راغلیاو د APL کيسه ځنډېدلې.

دا په داسې حال کې ده چې د افغان کرکټ بورډ مشر ښاغلي ميرويس اشرف له کرکټ بورډ سره وروستۍ مرکه کې چې کابو دوه مياشتې وړاندې خپره شوې وه، ويلي و چې په اګسټ مياشت کې به د APL په اړه پوره او مهم معلومات رسنيز شي، د لوبو وخت، ځای او د لوبډلو شمېر به اعلان شي.

له جنجالونو او ستونزو سربېره په متحده عربي اماراتو کې د ۲۰۲۵ کال اسیا جام سیالیو په لړ کې د هند او پاکستان کرکټ لوبډلو ترمنځ سیالۍ د هند په بریا پای ته ورسېده.

د سیالۍ پچه پاکستان وګټله او د توپ وهنې پرېکړه یې وکړه.

پاکستان د صاحبزاده فرهان د ۴۰ او شاهین افریدي د ۳۱ منډو پر مټ هندۍ لوبډلې ته د ۱۲۸ منډو هدف وټاکه.

کلدیپ یادوف ۳ ، جسپرېټ بومرا او اکسر پټېل دوه دوه ، هارډېک پنډیا او ورون چکروتي د سیالې لوبډلې یو یو لوبغاړی وسوځوه.

هند لوبډلې د هدف ترلاسه کولو کې ښه پیل واخیست، ابیشک شرما او تېلک ورما هر یو د ۳۱ منډو او لوبډلمشر د ۴۷ ناسوځېدلو منډو په مټ یاد هدف په ډېرې آسانۍ سره د ۳ لوبغاړو په سوځېدو د لوبې په ۱۶م اوور کې پوره کړ او د ۷ وېکټو په توپیر یې ماته ورکړه.

د پاکستان لپاره په توپ اچونه کې صایم ایوب ښه وځلېده او د ۳۵ منډو په ورکولو یې د هند درې لوبغاړي وسوځول.

کلدیپ په څلورو اورونو کې د  ۱۸ منډو په ورکولو او د ۳ لوبغاړو په سوځولو د لوبې غوره لوبغاړی وټاکل شو.

سره لدې چې هند کرېکټ بورډ په ۲۰۲۵ کال آسیاي جام کې د ګډون پرېکړه کړې وه خو بیا هم د سیالۍ یوه ورځ وړاندې په هند کې ګڼو وګړو او سیاسي څهرو ددې لوبې د نه کولو غوښتنه کړې وه او یاده سیالۍ له سختو نیوکو سره مخ وه.

د دواړو هېوادونو ترمنځ شته جنجالونه او ستونزې هغه مهال رامنځته شوې چې پنځه میاشتې وړاندې د اپرېل په ۲۲مه نېټه د پاهلګام ترهګریز برید په پایله کې پاکستاني ځواکونو د هند په جمو او کشمیر کې ۲۶ تنه ووژل.

هند کې سیاسي مشرانو له پاکستان سره د سیالۍ ډګر ته ښکته کېدل یو ناسم کار بللی او د لوبې د بایکاټ غوښتنه یې کړې وه.

د UBT مشر ( Uddhav Thackeray ) د دې سیالۍ د نه ترسره کېدو په اړه د صدر اعظم د هغې خبرې په تړاو چې ویلي یې وو “اوبه او وینه یو ځای نه شي بهېدلی.” وویل:

“که چېرې اوبه او وینه یوځای نشي بهېدلې نو بیا څنګه وینه او کرکټ یوځای کیدی شي؟ څنګه جګړه او کرکټ یوځای کیدی شي”؟

د سیاسو څهرو او عامو وګړو سربېره د هند کرکټ یو شمیر پخوانیو لوبغاړو هم ددې لوبې د نه ترسره کېدو غوښتنې کړې وې.

پخواني هندي لوبغاړي منوج تیواري هم د دې لوبې په ترسره کېدو غبرګون ښودلی او د یادې لوبې په وړاندې یې بایکاټ وکړ.

تیواري وویل چې: “ د هند او پاکستان هېوادونو ترمنځ دا ستونزه له کلونو راهیسې روانه ده. له پلوامه څخه تر پاهلګام او پتهانکوټ، او تر ټولو نورو ګڼو ترهګریزو بریدونو پورې، او هېڅ هندي وګړي دا پېښې نه دی هېر کړي”

هغه زیاته کړه :” زه هېڅکله د سپورټ مخالفت نکوم ؛ زه پخپله د کرکټ لوبغاړی وم خو ددې لوبې په ترسره کولو موږ د انسانانو ژوند د لوبې سره پرتله کوو او دا کار هېڅکله باید ونه شي”.

همدا راز دوه میاشتې وړاندې ، د هند تقاعد شویو ستورو لوبغاړو د انګلستان په لیجنډز لیګ لوبو کې د پاکستان په وړاندې د لوبو کولو څخه ډډه وکړه او یاده لوبه یې لغوه کړه.

د هند او پاکستان لوبډلو ترمنځ تر دې دمه ۱۴ نړیوالې شل اوریزې سیالۍ ترسره شوي چې هند ۱۰ او پاکستان۳ لوبې ګټلي دي.

پاکستان په وروستي ځل د ۲۰۲۲ کال اسیا جام سیالیو کې چې په دوبۍ کې ترسره شوې وه،  هند ته ماته ورکړې وه.

هند په ۲۰۲۴  شل اوریز نړیوال جام کې په نیویارک کې پاکستان د شپږو منډو په توپیر ماته کړ. په دې لوبه کې جسپریت بومرا په زړه پورې توپ اچونه وکړه او د لوبې اړخ یې بدل کړ.

بلخوا د دواړو هېوادونو ترمنځ ترسره شویو لوبو کې مخکښ منډې جوړوونکی ویرات کوهلي او ډیرو وېکټو اخیستونکو لوبغاړو کې هارډېک پنډیا لومړي ځای کې شتون لري .