افغانستان د سریلانکا پر وړاندې یوه ټېسټ لوبه، یو ورځنۍ او شل اوریزه لوبلړۍ ولوبوله خو د دې ټولو لوبو له جملې یې یوازې یوه وګټله.

دا چې لاملونه یې څه وو، دلته ورباندې رڼا اچول شوې.

په ټوله کې افغان لوبغاړو هغه ډول چې تمه کېده ښې لوبې ونه کړې.
په افغان لوبډله کې یوه عمده ستونزه د راشد او مجیب نه شتون هم وو چې حتی په مقابله لوبډله یې د نشتوالي اغېز ښکارېده.

راشد خان هغه لوبغاړی دی چې ډېر کله افغانستان پرې په سختو حالاتو کې تکیه کوي او د لوبغاړو د ډاډ او هیلو سترګې ښاغلي خان ته ور اوړي. خو د سریلانکا په سفر کې نه یوازې افعان لوبغاړو ته د راشد نه شتون تشه او ستونزه وه بلکې سریلانکا هم له دې فرصت برخمنه وه چې ډاډه او پرته له کوم رواني فشار او وېرې لوبه وکړي.

افغانستان چې د پیاوړتیا ټکی یې توپ اچوونه ده او بیا سپېن بولېنګ دی د سریلانکا پر وړاندې لوبه کې یې د راشد او مجیب د نه شتون له امله دا مورد خورا پیکه وو او همغه وو چې د سریلانکایي لوبغاړو د بریدګرې لوبې مخه نه شوه ډب کېدلی.

دویم د لوبغاړو د غوراوي معیار وو چې په پام کې نه وو نیول شوی او حتی هغه لوبغاړي هم چې له ډېرې مودې راهیسې هېڅ ښه نه دي لوبېدلي او نه ځلیدلي، لوبډلې ته غوره شوي وو.
پر ځای د دې چې د سریلانکا په څېر نسبتاً کمزورې لوبډلې پر وړاندې باید ځوانو مستعدو لوبغاړو ته پام شوی وی او د لوبېدو موقع ورکړل شوی وی، څو د نړیوال جام او نورو جامونو لپاره د مخکښو او پیاوړو لوبډلو پر وړاندې وار د مخه ځوان لوبغاړي ازمویل شوی او وړ ترې غوره شوی وی.

دریم لوبډله کې د حساب ورکونې، وېرې نه احساس او مسوولیت منلو تومنه نشته، ځینې لوبغاړي پر دې ډاډه وي که هر څو خرابه لوبه هم وکړي بیا هم لوبډله کې شته او ځای ورکول کیږي. او د دې وېره نه لري چې له لوبډلې به
کېنول شي.

څلورم د لوبډلمشرۍ لپاره په وړ او اغېزمنې څېرې غور نه دی شوی، چې باید د وړتیا، مسؤولیت مننې، کارکردګۍ او فردي ځانګړتیاوو له مخې ټاکل شوی وی، ځکه د ځینو مخکښو لوبډلو ډېری لوبې یې لوبډلمشران ورته ګټي خو د افغانستان په اړه بیا خبره برعکس ده، لوبډلمشر د مشرۍ فشار لري او ډېری وخت دا فشار د دې لامل کیږي چې لوبه ترې خرابه شي.

پنځم د لوبې پر مهال ناسمې او نامناسبې پرېکړې وې چې د ماتو یو لامل هم ګڼل کېدی شي، د بېلګې په توګه د پچې ګټلو پر مهال د ډګر ساتنې پرېکړه په داسې حال کې چې افغانستان ډېرې لوبې د لومړۍ توپ وهنې او هدف نه د دفاع په پرېکړو ګټلي خو د سریلانکا پر وړاندې یې پرته له وروستۍ لوبې په ټولو لوبو کې لومړی د ډګر ساتنې پرېکړه کړې وه.

شپږم په افغان لوبډله کې تلپاتې او عمده ستونزه د ذهنیت نه چمتووالی او رواني فشار دی.
چې نه د توپ وهنې پر مهال د یو لوبغاړي له سوځېدو وروسته فشار او د وېکټو له لاسه ورکولو تسلسل اداره کولی شي او نه په توپ اچوونه کې د مقابلو توپ وهوونکو د ډېرو منډو له جوړولو وروسته د هغوی د منډو بهیر ورو کولی یا درولی شي.
بل لور سریلانکا ته د افغان لوبډلې په وخت نه رسېدل او اړین چمتووالی نه نیول.
ځینې افغان لوبغاړي د سیالیو ورځ وړاندې له سوداګریزو لیګونو سریلانکا ته ورسېدل او ورځ وروسته په یوولس کسیزه لوبډله کې لیدل کېدل. په داسې حال کې ستونزمنه ده چې یو لوبغاړی د ذهني او فزیکي لحاظه په بشپړه توګه اماده، او ښه لوبه وکړی شي.
دا په ټولیزه توګه هغه عمده ستونزې وې چې د سریلانکا پر وړاندې لوبلړیو پر مهال په افغان لوبډله کې لیدل کېدې.

افغان لوبډلې د سریلانکا پر وړاندې د شل اوریزې لوبلړۍ د دویمې لوبې په بایللو سره یاده لوبلړۍ هم وبایلله.

که څه هم د لوبې پچه افغانستان ګټلې وه خو توپ اچوونه یې غوره کړه.

په داسې حال کې چې افغان لوبډله د هدف پوره کولو پر محال فشار په ښه توګه نه شي اداره کولی خو یو ځل بیا یې د هدف پوره کول غوره وبلل خو د ډېر کله په څېر بیا هم په کې پاتې راغله.

بل لور د افغانستان په لوبډله کې د راشد او مجیب نه شتون بېل احساسیږي لکه د تېرو او نننۍ لوبې په څېر چې افغان لوبډلې د توپ اچوونې برخه کې د سریلانکا مخه ونه شوه نیولی.

افغان لوبډلې د توپ اچوونې ښه پیل نه درلود که هر څو یې د سریلانکا لوبغاړي هم ژر له مخې لېرې کړل خو بیا یې هم په وروستیو کې د سریلانکایي لوبغاړو د تېزې توپ وهنې مخه ډب نه شوه کړی او همغه وو چې یو ځل بیا یې پر افغان لوبډلې ډېرې منډې وکړې او ۱۸۸ منډې هدف یې ورکړ.

افغانستان یو ځل بیا هم په توپ وهنه کې بېکار پیل لرلو او پیلیز او منځني لوبغاړي یې زر له لاسه ورکړل چې له امله یې د هدف پوره کول ستونزمن شو او پاتې لوبغاړو فشار واخیست.

افغان لوبغاړي د معمول په څېر د هدف پوره کولو پر مهال په ځان ډېر باوري نه ښکاري او هر لوبغاړی د وېکټې له لاسه نه ورکولو مدیریت نه شي کولی او نه هم د لوبغاړو له زر-زر سوځېدو وروسته فشار کابو کولی شي لکه په نننۍ لوبه کې چې هېڅ لوبغاړي د توپ وهنې د مسوولیت پوره کولو باور نه درلود.

افغانستان نننۍ لوبه هم په لوی توپیر ۷۲ منډو وبایلله او په دې سره یې په ټوله کې د سریلانکا پر وړاندې د بریا خپلولو تمې پرې شوې.

افغان او سریلانکایي لوبډله یوازې یو لوبه لري چې د چهارشنبې په ورځ به یې ولوبوي نور د دواړو لوبډلو سفر پای ته رسیږي خو له بده مرغه افغان لوبغاړو ته له کومې لاسته راوړنې پرته.

افغانستان له یوې ټېسټ لوبې او یو ورځنۍ لوبلړۍ وروسته د شل اوریزې لوبلړۍ لومړنۍ لوبه هم سریلانکا ته ورکړه.

د لوبې پچه افغانستان ګټلې وه او په خپله خوښه یې د ډګر ساتنې پرېکړه وکړه.

سریلانکا په ۱۹ اورونو کې د ټولو لوبغاړو په سوځېدو ۱۶۰ منډې جوړې کړې.

افغانستان په توپ اچوونه کې ښه پیل واخیست او د سریلانکا د لوبغاړو په زر اوټ کولو یې مقابله لوبډله تر فشار لاندې راوړله.

د افغانستان لپاره فضل الحق فاروقي، نوین الحق او عظمت الله عمرزي غوره توپ اچوونه وکړه او د کمو منډو په ورکولو فاروقي درې او عمرزي او نویم دوه -دوه لوبغاړي وسوځول.

خو له پاور پلی وروسته سریلانکایي لوبغاړو فشار کابو کړو او د لوبډلمشر هسرنګا په غوره توپ وهنې یې افغانستان ته نسبتاً ښه هدف ورکړ.

افغان لوبډلې په دویمه پاڼۍ کې توپ وهنه ښه پیل کړه خو یو وار بیا یې خپل مسؤولیت ادا نه کړ او د توپ وهنې د مسوولیت ادا کولو ډېر کم څرک په کې ښکارېده، د پیلیز لوبغاړي رحمن الله ګربز زر سوځېدو په پاتې لوبغاړو فشار زیات کړ.

که څه هم هدف دومره لوړ نه وو او افغانستان په پاور پلی کې ښه توپ وهنه وکړه خو د لوبغاړو د بې احتیاطه توپ وهنې له امله یې ونه شول کولی د وېکټو له لاسه ورکولو تسلسل ودروي چې لوبه یوازې لوبډلمشر ابراهیم ځدراڼ ته پاتې شوه او نوموړي هم ونه شول کولی له وروستي اوور ښه ګټه پورته کړي، ښه پای ورکړي او همغه وو چې لوبه یې په ډېر کم توپیر په وروستي اوور کې په څلورو منډو سریلانکا ته وبایلله.

افغانستان او سریلانکا به د دویمې شل اوریزې لوبې لپاره د دوشنبې په ورځ مخامخ شي.

د افغانستان او سریلانکا د ټېسټ لوبې دریمه ورځ او د افغان لوبغاړو هیله بخښوونکې او غوره لوبه

افغان لوبډلې د سریلانکا خلاف یواځینۍ ټېسټ لوبه کې نن د تېرو دوو ورځو په پرتله نسبت ښه توپ اچوونه او توپ وهنه وکړه.

افغان تازه دمو لوبغاړو نن سریلانکا پرېنښوده چې ډېرې منډې جوړې کړي او یوازې د ۲۹ منډو په کولو یې پاتې څلور لوبغاړي هم له لاسه ورکړل.

په افغان توپ اچوونکو کې نوید ځدراڼ د سریلانکا څلور لوبغاړي له میدان وویستل او د توپ اچوونې یوه داسې ننداره یې وړاندې کړه چې په تېرو دوو ورځو کې کمه تر سترګو کېده.

د نوید ځدراڼ له نننۍ غوره توپ اچوونې داسې برېښي چې ښایي افغانستان د اوږد مهال لپاره یو ښه چټک توپ اچوونکی پیدا کړي.

په ورته مهال نن افغان لوبډلې د خپلې توپ وهنې په پاڼۍ کې هم خپل مسوولیت تر ډېره پر ځای کړ، د ابراهیم ځدراڼ او نورعلي ځدراڼ غوره توپ وهنې د افغانستان د بریا هیلې یو څه را ژوندۍ کړې.

د توپ وهنې په دویمه پاڼۍ کې تره او وراره، نور علي ځدراڼ او ابراهیم ځدارڼ افغانستان ته هغه پیل ورکړ چې شدیده اړتیا یې وه. دواړو تر سلو زیاتو منډو ملګرتیا وکړه، او افغانستان ته یې یو ښه ځاې کې قرار ورکړ.

خو تر دې دمه افغانستان لا د سریلانکا د منډو قرضدار دی او باید ۴۲ نورې منډې وکړي چې د سرېلانکا منډې پوره کړي او له هغې وروسته یو مناسب هدف وټاکي تر څو د لوبې د ګټې یا مساوات چانس ولري.

په همدې حال کې په نننۍ لوبه کې رحمت شاه هم د خپلې لومړۍ ښې توپ وهنې په څېر یو ځل بیا نن ښه توپ وهنه وکړه او د دریمې ورځې تر پایه له ابراهیم ځدراڼ سره په ناسوځېدلو منډو ولاړ دی.